我發了一個「」給他,便放下電話,不再管他了,並立刻把他送我的卡拿出來再看一遍。可是我左看右看也找不到任何隱藏的細字,或是藏着小字條之類。

「有咩玄機啊究竟...」

「你又打橫又打直咁,點睇啊?又摷到啲嘢亂晒!」母親手上拿着一碗湯進來,看到信件散滿床鋪,她就忍不住嘮叨兩句。

「哎呀知道喇,我會執返㗎喇。」

「快啲飲咗碗湯,然後沖涼瞓啦!」



「okok即飲即沖。」無可奈何之下我只好放下生日卡,先去洗澡,而母親就回到房裡睡覺不再管我了。

熱水傾瀉下來,被風吹得冷冰冰的臉龐一下子變暖了,整個人亦精神了許多。再次回想這段日子,我以為跟卓行的相遇只是插曲,現在才知道這是我人生的主線,兜兜轉轉,相識十年迎來我們的第一年,過程有點漫長,卻不失浪漫。

我哼起我們的歌,沒有一絲傷感,通通變成戀愛的節奏。

啪——啪——

「喂!仲唱歌,快啲沖完出嚟!」



差點忘了現在正是夜深,母親催促我。我馬上關掉花灑,擦乾身體穿好衣服,站在鏡子前,禁不住多看幾眼現在的自己,我真的回來了。

然後,我回到房間,繼續嘗試參透「卡」中玄機。

「真係打橫睇打直睇都睇唔掂喎...咦?」既然橫看沒甚麼特別,我便把文字打直看,果然讀出來就有隱藏的信息!

我點都等你
一生有你足矣
今年第三年
又一年生日等你




他這個傻瓜。

卓行
最後上線於今天 上午1:02
真係一生有我就夠? 上午1:04


憑甚麼就這樣認定了我,他這個大傻瓜。

卓行
在線上
真係一生有我就夠? 上午1:04


係啊 我不嬲目標好清晰 上午1:05
點解你咁有信心? 上午1:05


男人嘅直覺 上午1:05
傻佬 女人就話有直覺啫 上午1:06




男人唔可以有? 上午1:06
喂啊! 上午1:07


真心㗎 第一次心動 係因為你 
其他女仔我睇唔上眼 上午1:08
講到我咁好上午1:09


對我嚟講就係最好 上午1:09
呢個答案有滿分上午1:10


夜喇 快啲瞓喇 上午1:11
咁生日卡呢?! 上午1:12


他下線了,竟然不回覆我,可惡!不過我知道他會信守承諾,算吧,先睡一覺好的。

卓行
最後上線於今天 上午1:11
goodnight my love上午1:14


陽光悄悄跑進房間喚醒了我,矇矓中我抓起手機,看到卓行發來的早安訊息。



卓行
最後上線於今天 上午11:34

親愛的女朋友:
雖然你生日未到 但請你落樓睇下信箱
早起的男朋友 上午11:16


我立刻起來梳洗,隨便穿了衞衣運動褲加一雙人字拖便下樓,打開信箱,有一封粉紅色的信。

我走到一旁,逼不及待打開信封,是一張立體卡,一打開就有立體的生日蛋糕,背後有卓行秀麗的字跡。

芯言:

生日快樂!



其實要寫呢張卡,我猶豫咗好耐,但有啲說話唔講,我又怕自己後悔,怕一生都唔會再有機會講。

我鍾意你,好鍾意好鍾意。

鍾意到我由中一一直期盼你會再返嚟,一直守喺你身邊,返嚟一次就夠,比個機會我同你表白。

我唔知面對面嘅時候有冇勇氣開口,所以用文字寫低,作為一個記錄。

如果你始終會走,我可以等你,直到未來見。

好嗎?
卓行
19/1/2012


這就是我們的未來
你的男朋友


29/11/2018


這張卡就像他埋下的時間錦囊,我很慶幸,我還是來到了這個未來。

卓行
在線上
上午11:57


「其實都無得你揀唔好,哈哈。」卓行的聲音從我身後響起,我震驚了一秒,就掩着自己的臉。

「點解你喺到㗎?」

「做郵差囉,確保郵件有送到收件人手上,點知你個信箱亂唔亂一陣揾唔到就...」

「又哈我!」我狠狠打他一下。

「痛啊!」

「抵你!」

「你做咩遮住自己啫?」他試圖拿開我的手。

「我素顏啊,點知你喺到。」

「嘿嘿,唔緊要啦,遲早都睇一世。」

「我無話要嫁比你喎。」

他拖着我的手,帶我走出大廈大堂。

「喂,去邊啊我哋?」

「呢個時候食早餐有啲晏,去食午餐啦。」

「我咁嘅造型,唔出去啊...喂!」




後來,他牽着我,走了好遠好遠的路。