【短短一個月內，屋企就死左五個人...】: 第二章 委託

 老者穿著一身既黑衣，用佢乾枯既手揸住一張對摺得極其工整既白紙，係我兩步之外停低，定睛望住我久久不語。 我唔習慣比人望住，尤其是比一個咁奇怪既阿伯望住。正當我幾乎按捺不住，企起身要開口發問時，老者就先我一步開口道：「你就係寧家現存既唯一男丁，寧可思？」 我腦袋嗡一聲，感覺到有股血直沖上腦，有啲頭暈。哈，諗一諗又好似係喎，我地家族本來已經唔多人，依家仲要一下子死左五個，如果無其他唔入族譜既私生子的話，我應該就係最後一個男丁啦。我點點頭，張開緊閉已久既雙唇，艱難地崩出幾隻字：「係，我家族中六個男丁死淨我一個啦。」此刻既我並唔憂傷，反而係滿腹疑惑，驚訝。 「嗯，唔好傷心。」老者再度開口，但係佢既言語中絲毫聽唔出帶有一丁點既同情，根本唔似係黎安慰我既，反而似係黎交帶一啲事。 果然不出我所料，佢再度開口：「雖然寧家既五個精英都折係呢趟路上，但係並唔代表佢地可以唔守承諾。」同時又向聽得一頭霧水既我遞出佢手中既個張白紙。我逕自接過佢手中既白紙，準備小心翼翼地揭開黎睇。「我唔理你用咩方法，你都一定要完成埋呢份委託。」 老者忽然壓低聲音，踏前一步係我耳邊講：「同埋...嘿，你可以從中知道埋佢地五個到底係點死。」講完就轉身離開，留低一時反應唔切既我。 現場好快就變返之前一樣。堂倌繼續重覆係門口叫住同一樣既口號，道士繼續以若有若無既聲唸住咒語，樂團繼續吹DEE打，打CHA CHA。然而，老者最後既一句說話卻係我腦中盤旋不定。莫非連醫生都解釋唔到既野，一張咁既紙仔就可以解釋到？哼哼，姑且睇下。 我默然地揭開手中張白紙，只見紙上置中較高既部份以朱砂般既紅寫住委託兩隻大字。而對落少少就寫滿密密麻麻既小字。

紙上寫既野係關於一份委託，委託人要求我地寧家做一件事，事成後會送贈我地一本咩葬經。不過呢件事真係講出黎都貽笑大方，因為佢竟然要求我地去湘西趕屍。更令人失笑既，就係我爺爺佢地竟然係上邊簽哂名作實。 我啞然失笑，趕屍？葬經？睇鬼故咩？既然做得棺材買賣，我相信亦曾經見過常人唔可能接觸到事，但係太過唔實在既野我又點可能相信？係人仲多過城市既湘西仲點可能比你趕屍呀？

我搖一搖頭，苦笑一下，放好張「委託」，繼續守我既夜。