【短短一個月內，屋企就死左五個人...】: 第十七章 狐鬼掩眼

樹葉最底層係一堆黑壓壓既不知名樹葉，而打上，直至樹頂頂端既部份，竟然變成左一堆堆既死屍！粗略一數，估計應該有接近上千條屍係上邊！有啲係垂直懸掛係到，有啲係橫躺係到，係黑暗中唔仔細啲睇，真係無可能發覺呢一棵竟然係死屍偽裝出黎既樹！ 我驚嚇得完全出唔到聲，喉嚨只能夠發出一啲喀喀既音節，背脊既冷汗瞬間浸濕我既T SHIRT。我實在無法想像呢個世界上竟然存在住一啲咁令人心寒既野，更令人心寒既就係我事前竟然完全發覺唔到呢棵野唔係真正既樹黎！我心入邊拼命想叫自己走，然而雙腳竟然不受控制地震起上黎！ 就係我完全無計可施既時候，忽然間，我聽到一把雄厚既男人聲從我背後爆出！ 「仆你個街！邊個敢郁我啲人我就收邊個！」

係張天師既聲！果然，我一另轉頭，就見到穿著住一身灰色既張天師怒目圓睜，指住屍樹既方向大喝。企係一旁既阿牛則一臉不解，而趕屍客棧掌櫃風山秋已經係唔知幾時，慢慢靠近到我既右後方幾步既位置。 遠處既屍樹彷彿好似有生命咁，識得聽人話般，係比張天師喝一喝之後，竟然迄自晃動左幾下，樹上既屍體突然開始變得愈黎愈細，先係手腳開始變短，然後消失，跟住個頭開始化灰，最後身軀突然爆出大量火焰，又再瞬間熄滅！到最尾，竟然就變返做一棵正常既樹！ 「有無嚇親？嘿嘿，呢種係我地湘西特有既狐鬼掩眼。佢唔會困住你係一個地方都繞圈，佢係會直接嚇到你郁都郁唔到，到最後你就會因為比佢迷住而跑向死神。」風山秋輕輕搭住我既膞頭，一絲絲既溫暖從佢手掌心中傳入我既身體中，頓時令我個心安定返啲。 「狐鬼，唉，千百年以黎，湘西既狐鬼除極都係除唔盡。」