【短短一個月內，屋企就死左五個人...】: 第十六章 屍樹

我成個人好似按左暫停制咁定左格，豆大既冷汗開始從我額頭上流落黎。我頭先明明就拎左枝酒出黎，然後放左係後面架喎...唔通...

天空中萬里無雲，鄉下鎮仔唔似得香港咁，到處都有街燈照明，天上明麗既月亮已經足以照光我身邊大部份既地方，但係令人心驚既係...我目力所及既位置都係無人...甚至連一丁點既聲音都無...

我猛拍心口，試圖令自己稍為鎮定落黎。腦中思緒亦同時快速運轉起黎。 係人？如果係人，個個人又可以去邊？有乜理由前後幾秒鐘，就可以消失係我視線範圍內？

咁...姐係鬼？我剋制住想大叫既衝動，用手袖抹走額頭上密密麻麻既汗珠。 咪啦，我都係走先啦，墳場呢啲咁陰既地方，竟然仲可以有樹生長到，睇黎呢棵樹都係招陰之物，唉屌咁都留意唔到，今次真係中Q哂伏。 但係就係我PACK野想走既個一剎那，忽然，我FEEL到有一啲野R我既背脊。

一個人係極度緊張下反應特別快，我立即下意識猛然轉身，赫然發現有一雙反白既死人眼，就係距離唔夠我5CM既位置，倒吊望住我，而雙手仲因為身體重量既搖擺而不停掃我背脊！雙眼既主人面容潰爛，根本連係男定女都已經分唔清。一條又一條粉紅色既蛆蟲係一早已經腐爛緊既屍身到爬黎爬去， 「嘩屌你老母丫！！！」我立時掉低哂手上既野，一個箭步向前飆出，一直狂奔三四十米開外先敢回頭。 回頭一望，月光比起剛才仲要更加光。條屍依然倒吊住係樹底下，但係今次，我仲見到啲野，令我一世難忘。 我仲見到一棵由縱橫交錯，互相重疊既死屍所組成既大樹。