【王道】《我每晚都會發畀阿哥追殺嘅惡夢》: 第十四章————極樂—２（極樂篇）
瘋了，這群人真的瘋了！
我是到了一個怎樣的世界，一看到他們這德性我就不寒而慄....必須要想辦法逃，此地不宜久留。
「我明喇，原來呢到先係現實世界！醫生萬歲！Yeah！」
他們聽到我這樣說後，又變回那張虛假的笑臉，各自繼續自己的事。
我立刻觀察四周有沒有可利用的東西作為逃跑工具，在離開民居不遠處的遊樂場攤位，正擺放著好幾套小丑戲服和化妝品，其他的攤位檯面上還有種類不少道具，附近還有一個大型的吊鐘，用彩色繩索作為連接懸掛在一座樓前面，腦海中已經有對策開始浮現。
我靜悄悄走到攤位旁，拿起一把連同刀鞘的飛刀放在褲袋後，然後步近到合適的位置，在旁人看不見的死角，
嗖——！
我用力把刀甩了出去，
砰！！！
我的投擲技能果然不負所望，成功把繩索切斷。
在眾人被摔下來發出巨響的吊鐘吸引其間，我用極快速度奔向小丑戲服的位置，直接套上連身衣，戴上爆炸頭假髮，把白色化妝品塗上臉上，再加上一個紅鼻子，變妝完成。
我低著頭，小心翼翼的走到出口，為不露出馬腳，以正常步速掠過道路，眼見出口就在前方，成功在望！
「咦，Peter你換哂衫準備出去邊到?」剎那間，入口的職員叫停了我。
「唔撚係掛，我化到咁你都認得我？」
「喔，我認得你隻手個號碼。」職員指住我的右手。
「係...係喎...」３８６，我竟然忘了這個顯眼的烙印。
「咁你一路順風喇，小心啲。」職員以親切的態度迎送我出去。
我也沒多想就走出閘口，也被歡送我出去的這個舉動嚇怔了一會，說起上來他們也沒有提及過我不能自由出入，枉我還在想辦法逃脫，穿上一身小丑戲服，真是個傻瓜！
離開一段路後，脫下一身笨重的裝束，馬上拔腿就跑，用全速希望盡快遠離這鬼地方。
跑到一個勉強看不見遊樂場的地方才停下來，在夢中，不會饑餓，也不會犯困，但疲勞卻是實實在在，
「嗄...嗄，跟住落嚟，應該點做先好...」
我無力的坐在地上，可以做的只有等待夜幕的來臨。等待期間我不斷整合和思考所發生的事，崔翼望把那些植物人帶進夢裡是有甚麼目的？更建立了這個瀰漫著一股邪教味的社會....還有就是，把我困在夢境的原因到底是...？我該如何回到現實世界。
良久，我把所有回憶都仔細解讀，但都無法得出結論。
這個夢境是沒有黑夜與白天的區分，天空長期都掛著太陽，我也不知時間流逝了多少，只有漫長的等待。
一道門在我前方慢慢出現，門縫緩緩打開，是一個熟悉的身影，
「Hugo….」看見他就有種說不出的感動。
「喂，做咩咁抑鬱咁坐喺到呀？」
背後出現的這把聲....！
我馬上回頭把她抱緊，牢牢的抱緊！
「Marla....你終於到....」是一直沒有傾訴的對象，一個擁抱就把這天發生的不安和壓力都釋放出來。
「你個淫蟲吖，係到乘機抽Marla水！」Gary也到了，實在是太好。
「Peter你做咩呀？你又好似有啲唔妥咁，發生咩事？」Marla問。
我把他們離開後發生的事，以及我在「極樂」的所見所聞都全數說給了他們聽。
「真係估唔到個醫生竟然會做呢啲事。」Hugo用姆指和食指托著下巴，作出一個思考的動作。
「即係原來你一直都冇醒過？我仲以為你要留醫所以先繼續唔返學..」Gary說。
「咁你而家點算？」Marla問。
「唉，我都唔知呀....又困住喺個夢到...」我苦惱地抓著頭。
「你醒唔返嘅呢個情況其實好危險，你嘅肉體有咩事都冇人知。」
Hugo嚴肅地看著我，
「況且我地係個夢到苦惱都唔會有用，要係現實世界解決，唯一可以做就只有報警求助。」
他繼續說，
「你同我講醫務所嘅位置，到時我帶警察上去，同埋我會通知你父母，呢啲係我地幾個中學生可以做到嘅事...」
我把醫務所的地點和媽媽的手機號碼告訴了他們，
「有時我都分唔清，係我地太蠢，定係你太醒，哈哈！」
同伴的出現，讓我又能重拾一點希望。
「咁你就留係安全地方等我地救你返現實世界啦。」
「好。」
等待的時間漫長，相聚的時間短暫，我又要開始漫無目的的等待。
翌日，現實世界——
Hugo他們三人首先通知了Peter的父母，
「我知呀，Peter佢同我講咗啦。」Peter母親在電話另一頭回應。
「但情況唔係咁簡單，佢而家隨時永遠都醒唔返...」Hugo嘗試向她解釋事情嚴重性，但話未說完就被打斷。
「得啦得啦，係有危險先會留醫啫，點會留醫反而有危險，同埋佢個病係咁麻煩架啦，我地都習慣哂，唉唔講住啦，返緊工仲有嘢忙緊，係咁啦拜拜。」
嘟嘟嘟.....
莫講要相信Hugo，顯然Peter母親對此事更是毫不在意。
但也無阻他們決定報警求助的心，起初警方也對他們的話半信半疑，在三人的多番請求下，還是心軟跟他們上去醫務所搜索一番，結果也是只有一場空，根本沒有任何病人在進行臨床測試，就連那間醫務所都找不到，餘下只有一間等待出租的舖位。
「嗱，同你地上嚟搵埋，咩都查唔到，玩還玩，唔好浪費阿sir時間。」警察也只當他們是小孩玩遊戲，完全沒有認真處理的意思，說罷，他便轉身乘撘升降機離開。
「可惡，呢到點會連cctv都冇。」Hugo向牆上揮拳。
「唔好咁啦....我地都盡咗力...」Marla試著安慰Hugo。
「唔會真係開口中，Peter畀人捉咗去改造掛？」Gary說。
「當然唔係改造啦。」後樓梯的門被打開，一把陌生的男聲說話。
「喔～好彩唔係改造，嚇得我吖。」
Gary鬆了口氣，然後看一看那名男子，
「咦咪住先，你係邊個呀？！」
「我叫崔翼望，相信你地都已經聽過我個名。」
他把一隻手插進醫生袍的口袋，另一隻手則拿著點燃的香煙，
「想唔想知Peter去咗邊？」
「你究竟係咩人...你想將Peter點！」Hugo沉著的看著崔翼望。
「難得咁齊人，就同你地講下。」
崔翼望用一個銳利的眼神掃過三人，
「反正你地知道咗都係咩都做唔到。」
「........」三人沉默不語，等待他開口說明。
「你地有冇諗過點解世界需要醫生？因為有疾病，有傷亡，有人要醫生幫去治療。」
崔翼望吸入一口香煙，再把煙緩緩呼出，
「但點解會有咁多傷亡？就係因為呢個世界冇一個完美秩序，人類任意犯錯，戰爭、貪婪、破壞、嫉妒，咁多年嘅歷史都印證住人類有幾咁愚蠢。」他露出一個令人發寒的笑容，「所以我地需要一個新世界！一個冇罪惡，冇傷害嘅完美世界！而我就係呢個新世界嘅醫生！唔使再治療班冇用嘅人，而係治療世界！」
「你身為醫生仲食煙，一樣係傷害自己身體嘅愚蠢行為。」Hugo對崔翼望冷嘲熱諷。
「好快你地就再見唔到你地嘅好朋友，聽朝之前就會令他嘅肉體消失。」
崔翼望用一個輕藐的眼神看著三人，
「都唔係，住埋入我嘅「極樂」世界咪見到囉，不過未必畀你地入，哈哈！」
「肉體消失？！你想做啲咩！」
「好快你地就會知。」崔翼望扔下香煙頭在地上，離開了現場。
「咪走呀！」三人打算追上，不讓他就此走去，但再打開樓梯門時，崔翼望已經消失得無影無蹤。
崔翼望坐在他的辦公室，默默看著桌面上的一個營養液瓶。
「翼望哥，今晚就將個細路分解？」在崔翼望面前站著一位成熟女性，身穿一件牛仔外套夾帶白色背心，展露出完美腰段，也披著一把長曲髮，顯現其獨特的野性魅力。
「冇錯，今晚之後，我地就正式擁有「極樂」世界。」
他舉起那瓶營養液，
「咁大個世界，就會放喺呢個咁細嘅容器入面。」
崔翼望把椅子一轉，牆上印上一幅巨型的建築構圖，裡面入遊樂園的出現，還有形形式式的不同設施和建築。
「而家仲差阿淵嘅構成部份，咁就大功告成。」崔翼望說。
「但萬一我嘅能力有咩出錯....」那個女性說。
「你放心啦皮皮，我已經安排阿蓮入夢好好咁睇住，確保事情萬無一失。而且你知道，阿蓮毀滅之花呢個能力係我地嘅最終手段。」
崔翼望從口袋拿出香煙，把它點燃，
「首先要做就係帶返Peter入遊樂場，唔好畀佢有機會同佢啲朋友會合。」
回到三人處於的地點——
「點算呀，佢話Peter嘅肉體會消失係咩意思？」Marla擔心地問。
「我地要入夢去通知Peter呢件事，同埋照常理推斷，逢係毒藥就必然會有解藥。」
Hugo繼續論證他的推理，
「我諗佢地都唔想困係夢入面出唔返嚟，一定有解決辦法。」
「咁我地今晚就一齊去搵辦法救Peter出嚟啦，雖然唔知會發生咩事。」Gary說。
三人約定在夢中相見開始拯救行動。