【王道】《我每晚都會發畀阿哥追殺嘅惡夢》: 第十七章————拯救—３（極樂篇）
地上灑滿機械零件，Hugo看著失去動能的機械阿淵張口結舌。
「見識到我嘅修羅．風魔分身之術未？係咪好驚呢？」伴隨一陣笑聲，Hugo背後再次出現阿淵。
「呢招個名又長又難讀......不過都唔係重點，你仲有幾多個分身？」
「你估我會唔會蠢到同你講？但係我作為呢到嘅creator，你可以當成個地方都係我嘅身體。」
「即係點.....？」
「即係.....咁。」說罷，阿淵手指向Hugo頂上的天空。
Hugo視線向上望，怎發現一座高樓大廈正在他上方往下墜。
「我屌.....！」Hugo用盡全身力氣往別處跑，奈何大廈的體積龐大，殃及範圍已難逃脫。
砰———！！
大廈直擲在地上，大量的瓦礫碎落一地。
「哈哈哈！就係咁嘅意思！呢到係我可以自由控制！」阿淵興奮大笑。
地面突然伸出一雙手抓住阿淵的腳腕，原本結實鞏固的水泥地，變成柔軟的液態物資，阿淵被向下一拉，半身陷入其中，反之，那雙手的主人冒然而起，全身跳上地面。
「係....你？！」阿淵目瞪口呆地看著再次出現的Hugo。
液態的地面也變回堅硬的結構，阿淵下半身被卡住無法動彈。
「差小小就窒息.... 好彩上水上得快。」
Hugo利用他的想像能力把地變成水，及時逃生，
「今次再扑爆你個頭，睇下你仲係咪分身。」
「唔好呀！唔好殺我住先！」阿淵拼命阻止Hugo。
「見你咁驚，即係我捉到正身啦。」
Hugo思考數秒，想到了點子，
「如果你同我講你地有咩陰謀，我就唔殺你啦。不過都要困住喺到。」
「.......哼，咁你殺我囉，我實有辨法搞死你！總之我係唔會出賣同伴。」阿淵寜死不屈。
「咁你受死啦。」話音一落，Hugo拿起一塊大碎石用力擲在他的頭上。
但結果出現似曾相識的畫面，散落的不是血液腦漿，而是一堆機械零件。
「又係機械人？你到底有幾多個分身？不過嚟幾多都好，我都會全部殺哂！」Hugo雖然嘴上強勢，但心裡百思不得其解，既然是分身，一開始又何懼自己殺掉他？
而且這個由阿淵自由控制的區域，更是對自己萬般不利。
「係咪好驚喜，好意外呢！你唔使諗住可以打得贏我，因為你唔會搵到我喺邊！」阿淵的聲音從廣播器中發出。
「........！」
同時，Hugo看著一枚飛彈向著自己直奔而來，他向旁邊彈跳避開，在地上翻滾幾圈，猛然看到臉前有一顆小型炸彈，即時向後彈跳躲避。
Hugo不斷閃避著一波又一波的攻勢，走得氣喘吁吁，但隨著攻擊越多，威力和規模也逐漸變小。
「我放棄喇，其實你地嘅理念又錯唔哂。」剎那間，Hugo舉起雙手表示投降。
「你....你想點？」阿淵繼續使用廣播器說話。
「我想投降，加入你地，打打下，我覺得咁樣自相殘殺冇意思，世界的確需要崔醫生呢種人去拯救。」
「又會咁突然....？」
「唔怕同你講，我曾經對荒謬嘅現實好失望，失望到想走去自殺，但我本住改變世界嘅諗法，決定生存落去，所以而家既然有個好方法，點解唔試？」
「咁你捨得你啲朋友咩？」阿淵仍然對Hugo的倒戈感到存疑。
「其實我根本冇當佢地係朋友，我只係睇中呢個夢嘅特性，係夢殺完人就可以喺現實奪取他人嘅嘢。」
Hugo繼說解釋，
「其實我好佩服你地，可以咁有系統去創造呢個世界，好過班傻仔連想像能力都唔識用，你有創造能力，我有改變物質能力，呢個組合簡直完美。你同我都係聰明人，應該知點做先係。」
「我點解要信你？」
「因為我仲有個仇未報。」
「仇....？」
「我曾經畀Peter殺過一次，我仲未拎翻畀佢奪走嘅嘢。」
「咁你都唔會有機會報到仇，醫生今晚就會將佢分解，將佢意識留喺呢個世界，你殺佢嘅話佢就會永遠死亡，醫生唔會畀你咁做。」
「.........！咁...唔殺佢，都可以折磨佢出氣，你咁叻創造嘢，可以幫我整啲刑具出嚟對付佢。」
「咁你想要中式定西式嘅刑具？唔同時代都有唔同刑具，用法都層出不窮。」
「估唔到你連刑具都咁一絲不苟，不愧係呢個區域嘅creator。」
「哈，呢個區域算得啲咩，你都未去過「極樂」嗰邊睇。」
「「極樂」係咪一開始嗰座大樂園？全部都係你整？真係好厲害。」
「都唔係啫，用我嘅能力，花多啲時間就整到。」
「我都想見識下你嘅創造能力到底係點發揮.....」
「.........」
阿淵沉默數秒，
「好，識英雄重英雄，我地交流下想像能力啦。」
說罷，地上便浮現一個個的油漆箭咀，指示一條路給Hugo，他沿著指示一直走到遠處的一座大樓。
啪嚓一聲，大樓門外便出現一條通往地下的階梯，Hugo也探進這個空間，通過重重關口之後，終於看到期待而久的真身。
「歡迎嚟到我嘅工作室，封神．千劫！」阿淵坐他的電腦椅上。
他面前有為數不少的掛牆式電子螢幕，桌面上擺放著五、六塊鍵盤，暗淡的房間靠著螢幕散發光線，地上佈滿雜亂無章的電線，牆上有不同的按鈕。
「你好....今次你係真人？」Hugo伸出友誼之手。
「冇錯，我一直都係呢到做嘢。」阿淵也同樣伸出手，讓Hugo確實的感受到他的體溫，「雖然我好鍾意匿埋做嘢，但呢個係我能力嘅限制，我只可以透過喺到打code創造嘢出嚟。」
「限制？」Hugo用手一掃螢幕，想看看映著甚麼。
「唉，係呀，我整啲嘢越複雜，創造時間就越耐，真係好煩，就好似頭先啲分身咁，整一個就要用我幾日時間。」阿淵再嘆一口長氣，「我都冇諗過你可以咁快解決哂我兩個分身。」
「原來係咁....」Hugo拿起地上亂放的電線，嘗試整理。
「而家距離我實現夢想嘅路又接近一大步，仲有埋你幫手，簡直如虎添翼。」
「你嘅夢想....係咩？」Hugo把手扶在桌子上。
「我夢想係做一個成功嘅youtuber，我最鍾意就係實況玩minecraft，係入面起好多宏偉建築，但無論點努力都好，始終都冇人賞識我，冇人like我啲片，但嚟到呢到，我就可以大展拳腳，所有「極樂」居民都會好崇拜我！」
「聽落....你夢想都幾偉大....，但我頭先就咁睇，「極樂」居民都唔係好多咋喎？」
「呢方面唔使擔心，醫生有妙計，事成之後佢會將呢個世界推廣畀所有植物人嘅親屬，既然都係醒唔到，點解唔係夢入面過得更快活？」
「咁同現實有咩分別？一樣都係會死。」
「呢個世界同現實最大分別就係，我地係唔會老死，醫生可以將佢地個腦同身體分開，放喺醫生特制培養液入面，意識就永遠保存，你個朋友都一樣係咁。」
「有可能做到咩？我記得醫學上未有咁高技術....」Hugo摸一摸桌面上的鍵盤。
「哈！呢個世界仲有大把嘢你唔知，99％人類都只係知道表層嘅事，深層嘅事只有極少數人知道。」
「我仲有一個疑問，點解搵搵下植物人，要捉走Peter？我明明記得佢只係有血友病。」
「呢點我都唔知，淨係知道醫生講過佢係呢個世界嘅關鍵。」
「嗯，我明白哂喇，唔該你。」Hugo一把抓住他的電腦椅，推他到牆邊，「你可以功成身退！」
說罷，房間內所有的物件，不論螢幕、電線、鍵盤，甚至那張大桌子，都像有磁力般被吸向阿淵的椅上，瞬間他就被夾在椅子和不同物件中間，動彈不得。「點解會咁！？」阿淵被大桌夾在牆上，激動地問。
「我頭先掂過嘅嘢已經變哂做鐵質，最後等你答哂我問題，再將你張凳變成強力磁石，一次過將你夾住。」
「我竟然會信你....」
「我永遠都唔會背叛我朋友。」
Hugo再解釋，
「殺你分身嗰時已經知你係唔受硬嘅人，再見你啲攻擊越嚟越弱，整合推理，就嘗試下哄唔哄到你中計，點知順利成咁。」
「咁你仲唔快啲解決我。」
「唔得，萬一你再入夢咁咪前功盡廢。困住你喺到先係上策。」
Hugo看一看那些壓在阿淵身上的螢幕，
「同埋頭先我已經透過你啲天眼見到Peter係咩地方，我要去幫佢。」
回到監獄，
「你唔會傷害我。」Marla又衝口而出，那句話就好像把阿蓬的想法正接打進自己腦中一樣。
「.......我會。」阿蓮打開監牢門，走進去用大剪刀架在Marla的頸上。
「點解要扮惡？」Marla皺眉看著阿蓮。
「收聲，唔好再講嘢。」阿蓮用懾人的雙眼盯著Marla。
「你....好傷心.....」Marla禁不住淚珠在眼眶打轉。
「等我殺咗你嘅時間你更加傷心。」阿蓮繼續恐嚇她。
「你心入面有個小朋友喺到。」
「...........」
阿蓮愣住，向後退了幾步，
「你係邊個？點解會知....」