【王道】《我每晚都會發畀阿哥追殺嘅惡夢》: 第十八章————拯救—４（極樂篇）
「我個腦浮現到你喺到諗緊咩....你明明就係個好人....點解你要同啲衰人同流合污？」
「原來你....有咁嘅能力...即係我一直扮落去都冇意思。」阿蓮放鬆了他本來繃緊的臉，慢慢坐在地上。
「你仲未答我問題...」
「你唔係識讀心咩？直接睇咪得。」
「我只係睇到你腦入面即時嘅諗法....」
「你冇必要知，照樣喺到等時間過就得。」
「你保護緊我？你講你嘅感受出嚟啦...我見到你好孤獨....內心全部都係自責同內疚，講出嚟如果有咩幫到手，我一定幫架！」
「小妹妹，本來呢啲事就唔應該捲埋你地入嚟，我都唔明點解醫生一定要捉個細路。」
「你話Peter？！你地想對佢做咩？」
「你應該好重視你個朋友....」
阿蓮看一看Marla那憂心忡忡的臉，
「我講畀你知，到底發生咩事....呢件事要由１個月前講起....」
１個月前————
一間空無一人的房子裡，阿蓮坐在梳化上，靜靜看著手中兒子的照片，回憶起種種的以往從前。
阿蓮的妻子早在兒子出生時就已經去世，餘下父子兩人相依為命，他白天在地盤工作，即使每夜回到家筋疲力竭，也無怨無悔，依舊辛勤工作打拼，為的就是支撐起這頭家的生活。
「老豆....星期四家長日你係咪會嚟？」
「嗰日家長日咩？老豆冇攞假去唔到，下次早啲同我講嘛。」
「其實我月頭已經同你講過....你又唔記得...」兒子低著頭說。
「喔....！係老豆大慒，冇記性！買返玩具畀你好冇？」
「我已經小學五年級啦...大個仔唔使玩具，你留啲錢啦。」
兒子雖然生於單親家庭，父親又忙於工作，他自小缺乏家人憐愛，但這也造就了他年紀輕輕就開始懂事，不會為父親帶來壓力。
到了家長日當天，兒子的同學們都有父母親陪伴出席，看見他們一雙一對，齊齊整整的出入，心裡總是酸溜溜的。
家長日的班房中，所有桌椅都被排列在後方，黑板前空出大片位置放上兩張二合為一的桌子，４張椅前後圍繞著它。
「你今次都係自己一個？」老師問。
「係....」
兒子看一看旁邊空出來的兩張椅，
「老豆佢要返工，冇時間過嚟。」
「好...呢到喺你張成績表，評語我會再抽時間打畀你爸爸講。」
老師思考數秒，
「你記得叫佢聽電話，我地成日都打唔到畀佢。」
「我知道喇....」兒子一步出班房門外，便看見自己的同班同學，他們父母正在遠處一旁閒聊。
「喂！」同學推撞了他一下。
兒子皺著眉頭，露出害怕表情。
「我地媽咪話你係掃把星！剋死哂爸爸媽媽！所以先要自己一個嚟家長日！」
同學一起用力推撞他，
「你以後都行開啲呀！如果唔係就剋死埋我地！」
「我.....」兒子摔倒在地，同學們都指著他哈哈大笑。
怎料這一切都被遲來的阿蓮看在眼內，他馬上跑到兒子身旁，攙扶他起來。
「嘩！走呀！」兒子的同學一看到皮膚黝黑的壯漢，怕得馬上跑開。
「老豆？點解你會嚟咗嘅？」兒子見到父親，心中又驚又喜。
「老豆今朝一早返去請臨時假，返嚟返遲咗，對唔住，你冇事嘛？」阿蓮拍拍兒子沾上塵的褲子。
「我冇事呀！老豆嚟咗我好開心！不過我已經攞咗成績表喇....」
「咁我地行啦，帶你去食好嘢，忘記哂啲唔開心佢。」
「老豆呀，我想去花店行吓先呀。」
「做咩無啦啦想去花店？」阿蓮很是疑惑。
「你帶咗我去先啦～」
阿蓮看兒子調皮嬉笑的臉，不知打著甚麼鬼主意，就如他所願帶他去花店看看。
到達花店，兒子馬上跑進去看東看西，哇的一聲，像是找到了不知明的寶物，拿著就放在手後走到父親前面。
「可唔可以用下星期啲零用錢買呢朵花呀？」他拿出一朵有許多金黃色的小花瓣圍著中間花蕊的花朵，猶如一顆燦爛的太陽。
「呢朵係...向日葵？」
「係呀！早幾日上堂學咗花語，向日葵代表住沉默的愛，我覺得好似老豆咁，雖然平時好少講嘢，但我知你係因為要返工養我所以攰到唔想講嘢.....」
兒子繼續哀求父親，
「同埋，老豆都好似太陽咁溫暖....所以我想買呢朵花，就算你有時唔喺到，都可以代你陪我！」
阿蓮摸著兒子的頭，微笑不語，也許他為自己兒子的懂事，感到無限欣慰，被這朵向日葵花照暖了心窩，心中複雜的情緒用言語已難表達。
「但係花會好快凋謝，我地揀隔離包向日葵乾花好冇？」阿蓮提議。
兒子瞧了一眼那包乾花，心中大喜，本以為乾花會是霉舊難看，但意想不到另有一種特色，散發與別不同的美。
「好呀！咁買呢包啦。」兒子心滿意足的收納了它，而且乾花更方便擕帶，不用只在家中放置。
隔天，
兒子高興地把那包向日葵乾花放進書包，帶回學校，心想有著父親的信物陪伴，也許孤單之苦也能減輕一點。
「喂，掃把星，你幾時先退學呀？」他的同學一巴掌打在他的後腦。
「我媽咪話啲死窮鬼就盡快退學出去做嘢！」
「仲留喺到篤口篤鼻！」幾名男同學圍著他指罵拍打。
上次家長日的那幾位同學，又開始對他進行各種侮辱，原來他們作惡已經不只一次，長久以來都恃著兒子不會反抗，對他加以羞辱並以此為樂。
但行徑則越發過份，想一得二，初時只是嘴皮上的刁難，到後期開始動手，無所不為，兒子常常都掩著傷口回家，不想讓父親擔心，再添煩憂。
而且父親教導兒子凡事忍耐，不可胡亂發惡，兒子對這些話一一銘記，他手裡握著乾花，低頭一言不發，忍受是他習慣了的處理方式。
「咦，你隻手拎住啲咩？」同學發現了那東西。
同學們開始搶他手上的乾花，按住他的手腳，強行搶奪。
「.........」兒子噘著嘴巴，對他們怒目切齒，但仍然不發一言。
「點呀？好想拎翻？你除咗條褲喺班房行個圈就還畀你囉～」同學輕挑地說。
兒子握緊拳頭，既不敢發怒，又欲取回乾花，無可奈何之下，只好照做，當時正值小息時間，只有當值風紀站在門外看守班房。
班上的同學們看見兒子如此舉動都紛紛起哄，對他恥笑起來，班上的擾攘聲傳到了風紀耳中，便通知老師處理事件。
老師在班房門外查問兒子時，他依舊沒有反抗，選擇沉默，隔窗只見那些欺負他的同學，手拿乾花，把它捏碎，再扔進垃圾桶。
兒子臉上沒有任何表情，但兩行淚珠禁不住流向下方，他只是呆呆的，看著乾花成為碎片，也把他溫暖的太陽，永遠扔在了黑暗的垃圾桶。
最後，兒子放下一封信，趁父親上班時，在家裡的露台向人生道別。
親愛的老豆：
對不起，老豆。
我要先離開了，我不想再成為你的負擔，你很累。
你教我的凡事忍耐我有做到，不過要做到也很辛苦，其他人都不會明白我，很孤獨。
如果有一個世界人人都可以互相了解，體諒對方，沒有人會被欺負，是否會很快樂？
我想跟老豆一起住在那個世界。我很不捨得老豆，很想繼續和老豆一起玩，但我真的很辛苦了，對不起。
兒子上
「我連佢喺學校畀人欺凌咗咁耐都唔知呀，要等佢死咗先喺校方把口得知，日日淨係識返工，連個仔唔開心都察覺唔到，由得佢自己咁孤獨面對，我算係啲咩老豆....」
阿蓮眼裡帶著悲傷，繼續說，
「你知唔知我有幾想可以代替佢呀.....佢仲只係個小學生，佢咁細個已經被逼去到揀呢條路，我冇辦法去想像佢有幾咁痛苦先會咁做......明明佢仲有大好光陰。」
聽到這裡，Marla邊聽邊看著阿蓮腦海中的畫面，不禁流淚。
「佢過身之後，我完全冇哂生存動力，連份工都辭埋，每日就坐喺屋企望住佢幅相，希望佢可以翻嚟我身邊.....。」
阿蓮低頭回憶，
「就喺之後某一日，我夜晚發夢遇上崔翼望。」
在夢中，崔翼望跟阿蓮說了他的理念和計劃，他曾經找過不少人選，但全數人都只當這是一場夢，沒有放在心上。
阿蓮想起了兒子的說話，他想起了現實世界的冷漠，想起了生活的無情，失去生存意義的他便願意一搏，去相信這個夢世界的存在，答應了崔翼望。
崔翼望教了他不少在夢裡的知識，包括殺人奪物，想像能力等等，找上阿蓮的原因就是看上了他的強壯身軀，可以在想像能力發揮出破壞性的功效。
「最後我發現我嘅能力係用花。」阿蓮看著牆上的花。
「用花？即係點？」
「我嘅能力係清醒之花，係可以將所以想像能力解除，仲可以令夢入面嘅人醒翻。」
「佢咁大男人，用花嘅能力硬係怪怪地咁。」Marla聽完後心裡想著。
「其實我自己都覺得怪。」阿蓮笑說。
「吓？乜我講咗出嚟咩？」Marla又摀住自己的嘴巴。
阿蓮沉默不語，與Marla互相對望著了一會。
「你係咪仲未清楚自己嘅能力？」阿蓮問。
「其實我啱啱先知我識讀心。」
「咁你唔只識讀心，你仲識直接係人地個腦講嘢。」
「......原來我識咁多嘢架咩？」
Marla回過神來，
「咪住先，既然你有呢個能力，咁可唔可以幫手救我朋友？」
「...........」阿蓮沒有回應。
「你都唔想見死不救架？」
「呢個計劃好多嘢我都知道，就係唔明點解崔翼望咁執著個細路，但我仲要同崔翼望合作，所以....對唔住。」
「我見過嗰個崔翼望，聽佢講嘢，佢只不過係一個自大狂，點解仲要幫佢？」
「我知道崔翼望只係想做新世界嘅獨裁者，我唔認同佢，但而家嘅四人團隊，缺一不可，所以我會喺事成之後，用清醒之花趕走其他三個人。」
「我明白你有苦衷，不過....我係你個仔嘅話，我唔會想你逃避。」
「逃避....？」
「覺得現實痛苦，就想逃去一個自己嘅理想世界，既然不甘現狀，點解嘗試下改變先？你認為你個仔同你咁耐以嚟嘅生活一啲都唔開心咩？你咁樣做就等於否定咗佢曾經存在過喺世界！」
「但...但係佢話過想要一個美好世界.....」阿蓮罕有地變得不知所措。
「我諗個美好世界.......應該喺有你陪佢就夠。」
說到這裡，阿蓮已經失聲痛哭。