時間回到現在—

「冇耐之後,忍無可忍嘅情況下,媽媽都係決定同爸爸離婚。」小秋接著說:「但好景不常,哥哥佢跟住為咗我....」

忽地,樓下傳來大量的汽車響安聲。

「咦,下面嗰個係咪楓?」Gary指著樓下。

紅綠燈馬路中心,楓和一名小孩相撞,小孩被撞得倒在地上,而楓手上的書則四散在馬路上。交通燈已轉成紅燈,但他們仍然待著沒有移動,引來巨量的汽車響安聲。





「啊!哥哥!」小秋驚訝。

楓開始行動,徐徐走近那小孩前面。

「楓佢...想點?」Peter再次想起昨晚楓在夢中的屠殺,心中開始不安起來。

「你睇下。」Gary望著楓的舉動。

楓抱起了那小孩,把他安置好在路邊,原來小孩的膝蓋跌得血流不止,無法忍痛站起來,楓便去抱走他。





「我地落去幫手!」Peter說。

趕到現場後,發現楓和小孩已經離開,他們幫忙拾起四散在馬路的書本。

「呢啲書....全部都係佛洛伊德.....」Peter猛然發現。

雖然書本已經被汽車碾過,封面頁變得有點破爛,但仔細觀察的話,作者名也能看見。

「喂,Peter你睇下嗰邊。」Gary指向商場的入口。





「嗰個係.....露仁夾?」Peter憶起昨晚的對決:「鬼鬼祟祟咁,跟住佢睇下佢做咩。」

「好,小秋你都一齊嚟啦。」Gary叫上小秋:「反正今晚入夢都會見到佢地。」

「今晚入夢?」小秋未明其意。

「你唔想知你阿哥係夢到做啲咩咩?」Gary說。

「嗯....都想嘅。」小秋回話。

「想就得啦,我地行下,陣間跟甩佢架喇。」語未,他三人便跟蹤露仁夾,來到商場的後方。

露仁夾站在了逃生牌的下方,四處張望有沒有被人察覺他存在,可惜他發現不到故意躲藏起來的三人。

經過檢查後,露仁夾便從他那風褸口袋裡拿出一枝白色筆,把逃生牌上的人形公仔塗掉,只剩下一個白色的四方形。





本來的逃生牌是以綠色作為底色,襯托白色字體,多數為橫置的長方形,左邊是Exit字樣,右邊是指示箭咀,而中間是人形公仔往門逃跑的姿勢。

奇怪是,不知把人形公仔塗掉的用意是甚麼。

基於是屬於屋邨的舊式商場,平常只有住戶往來出入,沒有嚴格的保安監控,露仁夾方可進行如此行為而無人發現。

「條友又會咁鬼無聊,仲細咩玩埋呢啲嘢。」Gary輕蔑他的行為。

「係囉,呢種惡作......」Peter話到一半,忽地想起某些事。

Gary似乎也想起同樣事情,馬上和Peter對上眼,同一時間說:「Marla講過個奇怪標誌就喺呢啲逃生牌上面,唔通..... 」

「捉住佢嚟問清楚!」話音一落,他們馬上衝到露仁夾背後。





「喂!點解要整呢啲標誌出嚟!咁多人入夢同你有咩關係!」Gary一口氣發出多條問題。

「頂!畀你地嚇死。」露仁夾在做虧心事時被發現,當場嚇了一跳。

「你講!你究竟係咩身份!」Peter追問。

「咩咩身份呀,都唔知你地講乜。」露仁夾再解釋:「如果你問塗白佢係咩意思,我可以答你,呢個係夢嘅入口。」

「夢嘅入口?呢塊逃生牌?」Gary看著門上的逃生牌,感覺匪夷所思。

「唔只呢塊,我仲塗咗好多塊。」露仁夾笑說:「一開始應該只係得一塊塗咗,係我不斷將個入口傳開去,先至有咁多人連夢入嚟玩!」

「原來係你條友!」Peter動怒:「你知唔知個夢有機會影響現實世界?唔可以咁隨便畀人亂入去!」

「我知呀!就係知先會咁做!」露仁夾再說:「喺夢到殺咗人,就可以喺現實奪取嗰個人嘅嘢,咁所以多啲人入嚟畀我殺,我咪可以得到更多嘢囉!」





「你痴線架?有冇諗過嗰個人嘅感受?如果佢唔知情,無端白事畀你殺,都好無辜喎!」Peter回駁。

「咁又點,總之我係唔會停,由一開始十幾二十人,去到而家過百人,都係我嘅功勞!大家都因為我先有得入夢玩!點解我唔可以攞翻回報?」露仁夾繼續堅持己見。

「歪理。」小秋忍不住發聲:「你根本就係自私鬼。」

「唔同你地講咁多,總而言之,我唔會放棄。」說罷,露仁夾便轉身離開。

「究竟點解呢個標誌會令人連到入夢?」Gary問。

「我都好想知,今晚連夢我會問我哥哥。」Peter說。

「你又知你哥哥會知點解?」Gary好奇。





「係作為細佬嘅....直覺?」Peter回話。

調查結束後,三人各自回家。

而Peter說想借楓的書回家一看,之後再還給他,於是就捧著一疊書回到家中。

「嘩,你發燒呀?都未見過你借咁多書嚟睇。」Peter母親揶揄他。

「係呀係呀,你鍾意點講就點講。」Peter猛然想起夢中見回哥哥的事:「係喎,我琴晚發夢見到阿哥。」

「你五年開始就成日都講發夢見到佢架啦。」母親不而為然。

「今次唔係....佢個感覺好真實,好似復活咗咁。」Peter一臉認真地說。

「.........咁睇多啲書都係好事嚟嘅,唔使咁多幻想。」說罷,母親便回到房間中。

「弗洛伊德.....呢個人所認識嘅夢,其實係咪我地認識嘅夢。」Peter翻著手上的書,越看越著迷,不知不覺已來到晚上。

「差唔多時間,今晚應該有好多新衝擊要面對。」

..................
........................... 

RPG城———

「你個白臉仔!憑咩要我信你,無啦啦出現,講埋哂啲冇人明嘅嘢!」一進夢,便聽到阿淵與人對罵。

「我係最熟悉呢夢嘅人,呢點你絕對可以信我。」Vincent正與阿淵討論:「睇你都係聰明人,你知道我講嘅嘢係真定假。」

「.......」阿淵未能相信Vincent的片面之詞:「證據呢?冇證據你話你係我老母都得架啦。」

「你想要證據?好簡單。」語未,一隻機械臂從Vincent身後伸出,架住了阿淵的頸部。

「呢隻係!?」阿淵怒問:「你喺邊到得翻嚟?死賊仔!還畀我呀!」