在基地被毀之前,阿輝、楓、小秋,三人正在糾纏。

「點解你寧願跟呢個衰人都唔同我走...」小秋對楓說。

「呢個世界....真係有分衰定好咩....」楓說。

「楓就講得啱啦,善與惡從來都好難定義。」阿輝接著說:「一個人行為唔好,未必係壞人;行為良好嘅,都未必係好人。」

「你唔好再係灌輸啲錯誤嘅道理畀我哥哥!」小秋怒罵。





「打個比喻,一架救護車趕去救重傷嘅人,但途中唔小心撞到一隻亂過馬路嘅狗,隻狗奄奄一息,為咗盡快救人,佢地選擇唔理隻狗由佢死。」阿輝說。

「......」小秋沒有作聲。阿輝再問:「同樣都係生命,佢地放棄世人認為冇咁重要嘅狗,趕去救人類,咁樣係啱定錯?」

二人都未有回應,善與惡的定義確實難分。

「難聽啲講句,楓就好似嗰隻狗咁,畀人放棄,但就有啲扮哂好心嘅人去幫佢,其實都只係拎道德光環戴喺自己身上。」阿輝指著小秋:「你夠膽講你唔係驚你地打唔贏楓先過嚟叫佢翻去?」

「....!」楓彎起八字眉看著小秋。





「唔係呀!我唔係呀!」小秋急忙否認。

「作賊心虛,你現哂形啦!」阿輝死咬小秋不放。

「哥,你要信我,我嚟搵你,係因為你...」

「唔好再講。」楓摀住小秋嘴巴,令她無法再說話。

楓身邊出現一縷縷紫色的煙霧,小秋被這煙霧籠罩,除了楓自己,其他人在紫煙範圍中是無法呼吸。





「嗚....」小秋雙眼紅筋暴現,痛苦的淚水有如泉湧,口唇臉部開始青紫。

「我唔知...我已經唔識分....」楓也痛苦地看著瀕死的小秋。

此時,嗜血獸方向傳來爆炸聲。阿輝看著那邊,心想終於解決那煩人的基地,再看看身旁的楓正在殘殺自己的妹妹。

嘴角不禁上揚,一切已經勝算在握。

「順便提提你,我能力係測謊機。」阿輝邊離開邊說:「你阿妹頭先冇講過大話,係我呃你。」

楓聽到後極度震驚,紫煙馬上解除,抱著奄奄一息的小秋。

楓因自己的愚笨再次遭到叛背,更中計傷害了至親,即使在夢,他也無法原諒自己。

「係因....因為....你係我....哥哥....」小秋含糊不清地吐出一句說話。





這次,楓沒有誇張的情緒化。

他只是,靜靜地看著小秋。

靜靜地,

在內心痛苦著。

阿輝到了掠奪團大軍那邊,領著他們,準備離開。

「阿輝,我地就咁走?唔用毒殺埋佢地一了百了?」掠奪團眾人不明離開原因。

「我玩online嗰時最鍾意呃哂人地啲裝備,等佢地好似狗咁求我畀翻佢。」阿輝再說:「明唔明?」





「你個人真係好賤格。」在這場戰爭中未曾露面的Vincent終於出現,擋在了掠奪團前方。

「遲哂大到喎你,仲以為你縮埋係個龜殼到唔敢出嚟。」阿輝揶揄他。

「老實講,你真係將人性表露無遺。」Vincent繼續說:「喺醜陋嗰方面。」

「人性本惡呀,每個人心底都有骯髒無比嘅事,只係佢地講唔講出嚟。」阿輝說:「如果冇我呢啲醜陋嘅人,又點樣畀你做偽善者?」

「無錯,畀人出賣或者出賣人,畀人傷害或者傷害人,好多人都經唔起呢啲人性嘅考驗,不斷係痛苦邊緣掙扎。」Vincent說。

「講得啱,我相信今晚都係咁發生呢啲人性考驗。哈哈!」阿輝回話。

Vincent反駁:「君子有所為不所不為,但就係因為我地可以掙扎,我地可以選擇,所以先證明到人唔只得黑暗面,仲有光輝嘅一面。」

「.........」阿輝臉色一轉:「你到底想點。」





Hugo猛然從空而降,壓制了阿輝的行動。

「就係想咁。」Hugo手中拿著藍火蟻毒瓶。

Hugo用前臂勒著阿輝的頸,另一隻手把毒瓶放在他的嘴邊作為威脅。

「所有人退後!」Hugo對掠奪團說。

「呢枝...係我畀你嘅毒素?」阿輝問。

Hugo沒有回話,繼續挾持阿輝。

「你估我唔知你係卧底咩?」阿輝只是微笑地說:「枝毒係假架!」





阿輝毫不猶豫地把毒瓶內的液體喝光:「見到未呀Vincent,你以為派個卧底過嚟就可以反勝咩?你以為我真係咁蠢咩!」

「.........」Vincent沒有回話。

阿輝從口袋拿出一枝真毒瓶,反過來壓制Hugo:「睇下邊個威脅邊個?」

「唔好呀!放開Hugo呀!」Peter等人大驚。

「你地跪喺地扮狗求下我,或者都有得傾。」阿輝猙獰地笑著。

「好好好,我地跪啦,唔好傷害佢!」Peter等人向他屈服,跪下求饒。

Vincent始終無動於衷,沒有理會阿輝的要求。

「頭先仲講得咁好聽,你咪一樣咁自私,咩光輝嘅一面,呸!」阿輝繼續追擊Vincent:「你都喺掙扎入面輸畀人性咋!」

「自爆系統發動。」Hugo體內發出系統語音。

就在那零點幾秒之間,阿輝想了千百萬個可能性,知道自己中了致命的埋伏。

可惜未能給予時間他作出反應,爆發聲已經響起。

轟—!

Hugo產生爆炸,直接把阿輝的身體正面燒至焦黑壞死,變得面目全非,融爛不堪,恰如恐怖電影中那種血肉模糊的怪物。

「嗄....」阿輝仍有半口氣,在地上爬行蠕動。

「呢個Hugo分身體內同樣裝住毒素,再加埋你頭先手上嘅毒素,你唔使再諗入翻夢。」Vincent對半死的阿輝說。

「唔好...求下你救我...你要我做咩得!我知你有解藥架係咪?你咁神通廣大!」阿輝發了瘋似的舔著Vincent的鞋:「我扮狗都得架!求下你!我唔可以冇咗呢個夢!!」

「一切都係因為我信你。」Vincent接著說:「我信你個人係咁賤格咁醜陋,先會咁順利令你中計。」

Vincent一腳端開阿輝,任由他在藍色火光中自燃。

「終於都搞掂咗佢。」Hugo梳回了那個經典的「蛋撻頭」和黑色粗框眼鏡,從後方的瓦礫中走出來。

「Hugo...」Peter等人還是慒然不知當中事情。

「你連自爆都學識埋...?」Gary怔了。

「Vincent,你想你自己解釋,定我解釋?」Hugo問。

「請隨便。」Vincent示意讓Hugo解釋。

原來Vincent早已安排好一切,當初Hugo已經暴露身份,阿輝沒有抹殺Hugo。

Vincent知道後仍堅持他繼續卧底任務,就是預計到阿輝是個行為卑賤低劣的人,留Hugo一命想必是利用他打回自己人,看他們自相殘殺為樂。

所以就一早叫阿淵製造Hugo的分身,自己也趁這時間,學習了提煉的能力,把藍火蟻毒素提取出來,放進Hugo分身內,讓他看時機換掉身體,完成最後一擊。

而知道此計劃的只有Vincent、Hugo和阿淵三人,這計策更利用了其他不知情人士的驚恐反應去令阿輝深入陷阱。

但預計以外的就是Hugo的雙腿被Peter廢掉,差點就壞了大事,幸好Peter不想傷害同伴,便讓Gary治療他,勸他不要再戰。

「可唔可以講翻廣東話?即係Hugo到底幾時學識自爆?」Gary就算聽到詳細解釋,憑他那石頭腦袋仍是搞不明白。

「即係....我地贏咗。」Hugo沒力氣再說一遍,但他想起計劃的其他變數:「不過最意外都係,你地竟然守唔住基地。」

「我本來係預計你地守住基地,我地搞掂阿輝,完勝掠奪團,而家只可以叫險勝。」Vincent說。

「....... 」Peter沉默不語,只是眉頭緊皺,雙眼看著地上。

其他掠奪團的餘黨,沒有了阿輝和露仁夾兩個頭領,彷彿是失去了巫妖王的死亡騎士,沒有蛇頭只剩蛇身。