《憶海》 自從意外之後，我得到咗超能力: 第一部第三十七章

此時，我向著舞台大喊。

「杜秋淼加油呀，唔使咁緊張。」我大喊。

全場的焦點立刻由秋淼轉移到我身上，令我頓時覺得十分尷尬。

她聽到我叫喊後，抬起頭望著我，笑一笑然後深呼吸便繼續演奏。

「啪啪啪啪啪⋯」觀眾的掌聲證明了她的心機沒有白費。





「先生，希望你遵守演奏廳嘅規矩，唔好喧嘩，你咁樣係會影響表演者嘅心情同阻礙觀眾欣賞。」有一個工作人員走前來跟我說。

「唔好意思，我會注意下。」我連忙再三道歉。

秋淼是弦樂組最後一個參賽者，因此現在是小休的時間。

「妳拉得好好呀，觀眾都拍晒手掌。」我走到後台跟秋淼說。

秋淼沒有什麼反應，面色蒼白。





「嘻嘻，咁就好啦⋯⋯」秋淼突然暈倒向前仆。

「啪嗒。」小提琴亦摔倒地上。

「秋淼，妳無事呀嘛？」我連忙扶著她。

「秋淼？」

「秋淼！」





但秋淼並沒有醒過來回應我。

伊利沙白醫院。

正當我在病房門前等待時，有一個中年女人朝我走過來。

「你好呀，請問你係咪劉焱煒？」中年女人問。

「係呀，妳係⋯⋯？」我疑惑地問。

「我係秋淼嘅媽媽，秋淼平時成日都提起你，真係唔該曬你幫手送秋淼嚟醫院。」秋淼母親和藹地道謝。

「你地關係好似好好咁，你地識咗幾耐啦？」

「唔係呀，我同秋淼識咗幾個月渣。」





「吓……」秋淼母親若有所思地說「原來係咁。」

「秋淼⋯⋯佢無事呀嘛？」我擔心地問。

「呃⋯⋯佢啱啱醒左，都係由佢同你講好啲。」秋淼母親面有難色地說。

走進病房，看見秋淼靠牆坐在病床上，幸好她仍朝氣勃勃，沒有什麼大恙。

「焱煒，你嚟左呀？」秋淼興奮地說。

「乜嘢嚟左呀？我送妳嚟醫院㗎。」我裝著沒好氣地說。

「係咩⋯⋯嘻嘻」秋淼傻傻地笑了起來。





「傻妹⋯⋯醫生有無話妳點解暈低左？」

「醫生話我休息太少，所以先體力不支暈低姐，訓返一覺無事㗎啦。」秋淼笑說。

「呼⋯⋯」我呼了一口氣「嚇死我，啱啱妳呀媽個樣好擔心咁，我以為妳有啲咩事添。」

「哦⋯⋯我媽媽好緊張我㗎，所以先會咁擔心姐。」她苦笑說「不過佢成日都係咁誇張。」

「係啵⋯⋯比賽個度主辦單位打左電話俾妳呀。」我突然記起說。

「咁佢講左啲咩呀？」秋淼緊張地問。

「就係⋯⋯妳攞左季軍呀，佢叫妳得閒去返單位補領獎盃獎狀。」

「真係㗎？好嘢！」秋淼興奮得整個人彈起來抱著我說。





我陪秋淼聊了一個多小時才戀戀不捨地離開。

而秋淼留院數天後亦很快出院。