消失的五年: 《十六》

應該唔會錯，死者個名叫聶振華，即係肥仔華！


我記得中四、中五嗰兩年，肥仔華同我係同一班，當年算係熟嗰隻，一齊打波，一齊食飯，畢業之後就少咗聯絡，最多都係每年聚餐見一次咁大把，如果無記錯，佢好似未結緍，响波鞋街度賣波鞋，仲同過我地講話買鞋搵佢有折。


郭健東啊郭健東，仲話學人報仇，連死者係邊個都唔撚知，咁重要嘅線索都無留意，報條毛呀！！


雖然知道咗個死者係肥仔華，但佢又同件事有咩關係呢？因乜事要陷害我殺佢呢？






咪住，咪住，我諗到啲嘢 ……


離開合和，响皇后大道東等緊過馬路，唔知咩原因，天空上面忽然多咗好多好多黃色氣球，唔係十個八個，望上去起碼有二、三百個，藍天白雲，一下子變成一片黃海，所有途人都比呢個奇景所吸引，紛紛攞出手機拍攝！


唯獨我，比眼前呢個畫面嚇到唔識反應，因為所有黃色氣球上面，都印有紅色嘅哈哈笑臉，無獨有偶，同合照上面嗰個一模一樣，望住一個又一個上升緊嘅氣球，究竟係我多心，定係有人專登咁做？






「阿東，過馬路喇！」阿叔拍一拍我，就講


「哦！」我望望已經轉咗綠燈


我無再理會啲黃色氣球，就扶住阿叔慢慢過馬路，突然，响對面嘅行人天橋傳嚟一連串音樂，馬戲班常用嗰種音樂，我好奇咁向上望，抬頭嗰刻，一條黃色嘅廣告 banner 竟然從橋頂跌落我眼前，上面寫住






「SURPRISE！老朋友」


老朋友？仆你個街 ……


一次又一次比人當玩具咁愚弄，好似所有嘢都喺佢掌握之內咁，點解條仆街會咁清楚我嘅行蹤？答案好明顯，就係佢一早已經裝咗個追蹤器响我身上！


「阿東，你個口流血啊！」阿叔指住我嘴唇，就話


「係咩？嘴唇爆擦啫！」嬲到咬爆嘴唇都唔知，於是用手指抹一抹






冷靜過後，繼續扶阿叔番祖屋，我無試圖去搵放出氣球嘅位置，亦無深究邊個放條 banner 落地，因為呢刻有一樣嘢更為重要！


入到屋，我即時攞番張大合照出嚟，一睇，無嘅？搵多次，真係無喎 ……


反覆搵咗幾次，都搵唔到肥仔華，但我好肯定當年肥仔華係有影畢業相，咁即係 …… 即係嗰四個窿當中有一個就係肥仔華！！



以我推斷，依家肥仔華死咗，咁 …… 係咪暗示其餘嗰三個都可能會 …… 死？


如果我所估計係真嘅話，要解開成件事嘅迷團，就需要盡快搵到其餘嗰三個人，否則 ……