消失的五年: 《十七》

話就話要盡快搵到嗰三個人，但點先可以搵到張完整嘅畢業相，呢個先至係重點，依家全世界都通緝緊我，我根本無可能打比啲同學，「喂，我吖，你有冇當年張畢業相啊？」，既然係咁 …… 我只好試下呢個方法！ 


把握時間，我將所有嘢入番落個公文袋，離開之前，有一樣嘢必須即時解決，就係嗰個隱藏嘅追蹤器，响我身上面，除咗衫褲鞋襪之外，淨低嘅就得番銀包、電話同公文袋嗰幾樣嘢，咁多樣嘢，最有可能藏到追蹤器嘅，就係電話同對鞋！ 


我即時將部電話連接電腦，將所有有用嘅資料同相片暫時存放，之後，再插入張新嘅電話卡，入晒所有電話號碼，攞番張卡，我就一嘢將部電話掉落地，「砰」一聲，成部 "三叔" 隨即分體，果然如我所料，真係有個疑似追蹤器嘅物體，諗都唔諗走入廁所沖出大海！ 


為安全起見，我就問阿叔 






「阿叔，你著幾多號鞋？」 


「十號囉！」阿叔就答 


咁就啱喇，我問阿叔借咗對波鞋，連隨將自己嗰對掉出門口個大垃圾桶度，就响我準備開門嗰陣，我聽到門外好嘈，仲有對講機聲，我用防盜眼一睇，見到外面有一大班人，仆街，咁快殺到！ 






困獸鬥，無路走，攞齊所有嘢，諗緊點走之際， 


「叮噹，我地係警察，麻煩你開開門吖！」 


「咩事啊？」阿叔望住我講 






「阿叔，佢地係嚟搵我，依家我無時間解釋咁多，總之，我係比人陷害，你要信我！」講完之後，我就諗住衝入房擒窗逃走。 


「阿東，呢邊啊，你推開前面個櫃！」阿叔指住牆角個櫃 


我即時衝過去，推開個櫃，响櫃後面竟然有個鐵閘，阿叔就話 


「呢條路原本通過對面座大樓，幾年前拆咗，你依家由呢度入去，行前少少，下面就係一個天井，一層樓高，自己小心，阿叔等你番嚟再飲過茶！」 


「…… 再見喇，阿叔，你都小心啲！」 






一推開個閘，我就向前行，果然，下面有個天井，話高唔高，但已經無得揀，吸啖氣，死就死啦！

「砰」一聲，雙腳著地，去勢未止，向前一傾，我伸手向牆一推，咁至可以停定，嗄嗄嗄 …… 仆你個街，細個嗰陣玩跳樓梯就覺得好過癮，但係啱啱由一樓跳落嚟，定一定神，望番上去，真係嚇撚死人吖！ 


大難不死，就開門逃走，响濕滑嘅後巷一直行番出莊士敦道，望一望周圍無警察，就急步過馬路，行落灣仔地鐵站！ 


一落到去，人山人海，咁就啱晒我，入閘，搭扶手電梯落月台，响褲袋攞番部救護車嘅電話出嚟，插番張新卡，一開， 


時間 : 11:38 


同我預計嘅時間差唔多！