消失的五年: 《十八》

「下一站金鐘 …… 」，門一開，我跟住其他人嘅步伐過對面月台，唔知係咪我多心，感覺好似比人監視住咁，我小心奕奕咁向左右兩邊斜望一下，又唔覺有咩特別，於是我就排隊等上車！ 


忽然，我感覺到有人拉我衫尾，轉身一睇，係一個五、六歲嘅男仔，眼仔碌碌，左手揸住個變形金剛公仔，佢笑笑口咁話 


「叔叔，比你㗎！」個男仔講完之後，就遞咗個封信比我，我就問 


「小朋友，邊個比你㗎？」 






「個叔叔話佢叫 "老朋友"！」 


佢一邊答，一邊指住胸口，我望一望，係一個黃色嘅哈哈笑襟章。 


「唔該你！」 






個男仔蹦蹦跳咁就走咗，我打開個信封，入面有張紙，上面寫住 


"哈哈哈 …… 以為自己好聰明，好利害搵到個追蹤器？哈哈哈 …… 我求其放舊垃圾落去，又幾好玩喎，哈哈哈 …… 全香港都有我嘅人，我要搵你易過借火，唔好做咁多無謂嘢，你喺我眼中只不過係一隻曱甴，快手啲嚟搵我啦，我等得咋，有人唔等得好耐！ 


老朋友" 






仆街、仆街、仆你個街 …… 


吔吔吔 …… 一怒之下，我將張紙撕爛晒，一切一切佢都瞭如指掌，無可能，無可能，佢無可能咁神通廣大，一定有追蹤器，一定有！ 


呢刻條仆街可能哩埋响附近偷睇緊我，我要保持冷靜，上到車，我咩到無做，沉住氣，好快就到咗旺角站，我要把握時間！


時間: 12:13


一出旺角地鐵站，我一支箭衝去奶路臣街，眼前就係旺角電腦中心，上到二樓，轉右再直行，响個角位有間細細地嘅鋪頭仔，有個三十零歲嘅男人正招呼緊客人，隔咗一陣，見個客人走咗，我就行前同佢講






「老細，好唔好生意吖？」


「點 …… 點 …… 點解你會喺度㗎？入嚟先講！」個男人好驚訝咁講


入到鋪頭，個男人就拉閘關鋪，跟住轉身就話


「咁多年無見，你去咗邊啊，老表」


無錯，呢個瘦瘦削削嘅男人就係我表弟 -- 許俊洋，我地由細玩到大，感情好好，絕對信得過，但係我無將件事講比佢聽，唔係信唔過佢，而係我懷疑我身上仲有追蹤同偷聽器，於是我改用手寫代替口講！






我响張白紙上面寫低大概發生過咩事，表弟睇完之後，表現出難以置信嘅表情，同一時間，我攞咗張記憶卡出嚟，交比佢，再喺張紙上面寫低我嘅要求，表弟做咗個 OK 嘅手勢回應，表示攪掂就 Whatsapp 我！


咁多年無見，應該有講唔完嘅話題，但呢刻，時間唔容許我咁做，就喺我準備離開嗰陣，我諗到一樣嘢，响張紙上面寫咗幾隻字，表弟諗咗一陣，就喺寫咗個地址比我，臨走時佢拍一拍我膊頭，一切盡在不言中！


行番落地下，我走入一間運動鋪，隨手揀咗套運動衫褲加頂帽，換完後就比錢離開！