消失的五年: 《二十二》

「無可能，邊有可能，家怡同 Michael 死咗？無可能，佢地仲响加拿大，佢地未死嘅，一定係條仆街嚇鳩架我啫，唔會有事，唔會有事嘅 …… 」我揸住個電話筒自言自語 


「如果真係有事，我一定要你 · 墊 · 屍 · 底！！！」 


我放低電話筒，攞出手機打比家姐，家姐一定知佢地加拿大嘅電話號碼 


"你所打嘅號碼暫時未能接通，請你啲再打過嚟啦 ……" 






唔通？再打多次，都係一樣，既然手機唔得，就打番屋企，但係 …… 等咗好耐都無人聽，究竟發生咗咩事，家姐電話唔通，老豆媽子應該喺屋企㗎喎，佢地去晒邊度？ 


深呼吸一下，無論發生咩事，我都要冷靜，唔可以亂，既然係咁，雖然危險少少，但都係上去順利邨睇下安心啲！ 


上的士，同司機講向順利邨方法行，果然，去到順利邨，離遠已經見到架警車停咗响利祥樓樓下，於是我就喺的士站落車，上商場，繞個大圈，行去利恆樓嗰邊，上到平台，不期然停低，望一望，眼前呢個平凡嘅公園，我好記得細個嗰陣，我做完功課家姐就會帶我落嚟玩滑梯，玩到黃昏，我地就會番屋企食飯 …… 可惜依家條滑梯已經唔存在。






見到有人開門，我就急急腳跟住入大堂，正常情況下，我搭低層雙數嗰部上十樓，但依家咁嘅情況，安全起見，搭高層上十八層，再行番落去，睇下咩環境。 


一出轉左，行落三層，就係十五樓，我慢慢行出井字型嘅走廊，兜咗個圈，望落五層，唔覺有便衣同警察之類响附近。 


於是我再行落兩層，貼近牆，小心翼翼探頭望落下面，人，我就見唔到，但係 …… 點解咁㗎？發生咩事啊？點解 …… 門口出面有 …… 支 …… 白蠟燭㗎？






老豆、媽子、家姐，你地唔好有事啊！ 


連番嘅打擊，我已經唔能夠再保持咩嘢冷靜，就算有危險都好，我都唔理得咁多，跑落十樓，攞出鎖匙，門一開，前面就係神枱，响最頂嗰格多放咗一張相，一張媽子嘅 …… 黑白相！ 


點解會咁㗎！！！ 媽 ………… 


媽、媽、媽吖 ………… 


「媽，嗚嗚 …… 我不孝，你臨終我都 ..... 唔能夠喺你身邊 …… ！！」我跪咗响地，不斷自責 






啊啊啊 ..... 


「磅、磅、磅」我响神枱前，大力叩咗三個響頭 


就响呢個時候，有人用鎖匙開門，我即時哩埋喺門後面，門一關，睇清楚，係家姐！ 


見到家姐，我嘅情感亦都忍唔住要崩潰， 


「嗚 …… 家 …… 姐，點解 …… 會咁？」 






「啊！！ 細佬 …… 點解你會喺度？」家姐驚訝咁問 


「家姐 …… ，媽子 …… 點解咁㗎？」我無理會，不停咁問 


「細佬 …… 其實我尋晚都想同你講，不過你收咗線 …… 你都知媽子洗咗腎好多年，精神同身體都一年比一年差，你嘅失蹤，佢又點會唔知，佢又點唔擔心吖，日子一日一日咁過，上個月終於 ……」家姐拍一拍我，就講 


啊啊啊啊啊 …… 


其實 …… 我一早已經預計到有呢一天嚟臨，但係真係嚟到，呢刻嘅震撼同傷感，遠遠超出你所估計同承受！ 






呼天搶地過後，我再問 


「咁 …… 老豆？？？」 


「突然失去個老伴，老豆唔想我擔心，口就話無嘢，但係就成日心神恍惚，前兩日喺屋企跌親，我啱啱先喺聯合探完佢，老豆都一把年紀，跌一跌唔多唔少都有影響，不過，醫生話情況叫做穩定。」家姐就講 


「對唔住啊，家姐 …… ，呢幾年 …… 你一定好辛苦！」我好內疚咁講 


「兩姐弟，唔好講呢啲，你點啊？出面有好多警察搵你，你自己一定要小心！」家姐一面擔心咁話 






「我會㗎喇，家姐，你有無家怡响加拿大嘅電話？」 


「我無吖，每次都係佢打比我，有緊要事？」 


「 …… 無事，我想知道佢地依家點啫 ……」我唔想家姐擔心，所以無講 


「我嘗試諗辦法問下你外母吖，係啊，今朝收到封信係你㗎！」 


家姐講完之後，响櫃度攞咗封信比我，一個用黃色信封嘅信！