消失的五年: 《二十三》

接過封信，放咗入袋，我無即時拆開，係唔想家姐牽涉太多入呢件事，就算我真係有咩事，起碼老豆都有人照顧！ 


同家姐交帶幾句，我就行去書櫃，拉開櫃桶，搵下有無嘢啱用，摷摷吓，竟然比我搵到本陳年紀念冊同幾張中學相，唔知有無用，攞咗先算！ 


臨走我就同家姐講，如果有咩特別嘢就即刻打比我，講完之後，我就由後樓梯行落四樓，响垃圾房嗰邊嘅出口離開！ 


時間 : 18:58 






上到巴士，坐响上層最尾，攞番封信出嚟，一開，入面有一張好舊嘅藍色戲飛，上面印住 


"寶聲戲院 Bonds Theatre 


七點半 7.30 p.m. 堂坐 Stall 






三十五元   $35 


每票只限一人              2459 " 


响呢張舊戲飛上仲有一個藍色蓋印嘅日期，一九九五年二月二十日，反轉後面，有一行用黑色原子筆寫嘅字， 






"今天很開心，可以和郭同學看周星馳的西遊記 。" 


郭同學？即係 …… 我？ 


觀塘寶聲戲院？周星馳嘅西遊記？ 


寶聲都拆咗成十幾年，張戲飛仲可以保存咁耐 ，當中一定有啲好重要嘅嘢，我唔記得咗 …… 究竟我同邊個去睇西遊記？睇啲字跡應該係女仔，一九九五年，中五嗰年，我記得當時就嚟會考，所以都無拍拖，諗嚟諗去都諗唔到，於是我攞番張畢業相嚟睇， 


唔 …… 王佩芝？唔會！蔡嘉文？應該無吖！張惠慈？無可能，佢係阿森條女，唔會嘅！ 






鍾可 …… 晴！！！ 


係喇！我有印象同佢睇過戲，但係 …… 點解會係佢呢？記憶中，我無追佢喎，點解佢要咁害我？佢又同條仆街有咩關係？我一定要問清楚！ 


我立即打開本紀念冊，一睇，比我搵到佢嘅屋企電話同地址，但都隔咗咁多年，試下打去無壞，果然，已經無呢個人，我估地址都應該改埋。 


望望手機嘅電話簿，亦都無佢嘅電話，成件事越嚟越難攪，時間無多，呼 ~ ~ 既然係咁，係時候搵下佢 -- 藍志豪。