消失的五年: 《三十二》

一斌聽到我咁講，都好愕然，我就將志豪條新聞遞比佢睇，佢睇完之後，雙眼擘到大一大，不期然咁企咗起身，我用手拉一拉佢，就話 


「其實我都係你舊同學，今次搵你並無惡意，你坐低慢慢聽我講先好唔好？唔會阻你好多時間！」 


一斌停滯咗一秒，就乖乖咁坐番响度，我就將成件事講比佢聽，中間修飾咗我間接害死志豪部分，一斌聽完，就講 


「乜你就係郭健東！」 






「係啊！咩事 ？」我好疑惑咁問 


「我好似記番起少少嘢，我可唔可以睇下張相同本書？」一斌就話 


於是我就攞咗張穿窿相同埋嗰半本內田友紀寫真集出嚟，放响枱面，一斌將本嘢攞上手，翻開嚟睇，就講 






「呢本寫真集 …… 好似 …… 」 


「好似咩啊？」我心急咁追問 


「好似係俊龍㗎！唔係，唔係，我記得喇，肯定係俊龍！」一斌放低本書，攞起張相嚟睇 






「俊龍？咁點解得番半本嘅？」我又再追問

 
「唔 …… 我 …… 隱約 …… 記得 …… 應該係中五，係啊，中五嗰年有日小息，阿龍神神秘秘拉咗我去男廁度，跟住喺件衫入面攞咗呢本嘢出嚟，咁啱比隔離班嘅振華同志豪撞到，於是四條友關埋度門喺度睇，點知 …… 睇睇下有人拍門，唔記得係阿蔡 sir 定羅 sir，總之有阿 sir 收到風，我地驚得濟咪諗住搣爛本嘢毁屍滅漬囉，點知嗰阿 sir 用鎖匙開門，最後人贜並獲，個個記小過，俊龍記大過，大概係咁上下！」 


「咁 …… 同我有咩關係？」我一面疑問咁追問 


「當時有傳 …… 」一斌欲言又止咁 


「你講啦！」我好不耐煩咁講 






「有傳報串嗰條友叫 郭 · 健 · 東！」一斌就話 


「我？？無可能，我完全唔知呢件事，更加無報串！」我好激動咁講 


一斌見我咁激動，都唔敢再出聲，隔咗一陣，我就話 


「就算真係我，都唔駛記仇記咁耐吖，有咩咁大不了啫，依家死人啊，佢黐撚線㗎！」 


「咁我又唔知喎，會唔會當中仲有其他嘢？」一斌望一望我，就話 






「無，一定無，我前幾年見過佢，大家仲有講有笑添！」 


「咁奇怪？但 …… 我好記得上年聚餐，有人提起我地嗰屆有人死咗，仲要係比人謀殺，期間提起過郭健東呢個名，唔知點解阿龍聽到你個名之後，竟然笑起上嚟，係狂笑嗰隻，嗰刻大家都好奇怪，有人問佢做乜，佢一路笑，一路話無嘢無嘢！」一斌皺皺眉咁話 


「談俊龍，你條仆街，我一定要問清楚你究竟發生咩嘢事！」