消失的五年: 《三十三》

「聽完你咁講，志豪同振華無辜慘死，我 …… 開始有啲擔心 …… 」一斌口震震咁講 


「我完全明白你所諗嘅嘢，咁 …… 不如你暫時搵個地方住住先，只要過埋聽日，所有嘢都會結束 ……」我握實拳頭咁話 


「唔好怪我多口，聽日比你搵到佢，你又可以點吖？依家你係通緝犯，又無證無據，佢唔認，你咬佢食呀！」一斌托一托眼鏡咁講 


「呢刻我仲未諗到，不過，我唔理咁多，搵到佢先算，我要問清楚佢點解要害到我乜撚都無晒，究竟我老婆同個仔係生係死，如果佢唔講，大不了攬住一齊死㗎啫！」我怒火中燒咁講 






「吓！咩計劃都無就去報仇？ 就算要同佢同歸於盡，都要有計劃先得㗎， 一個唔好彩，佢無事，你就白白犧牲，咁咪好on9，不如你襯依家仲有時間，計劃一下點做！」一斌一面認真 


「你又講得啱，我會好好諗下！係哩，呢幾年你地多唔多聯絡？知唔知佢住喺邊？」我點點頭，就問 


「以我所知，佢仲喺住响觀塘月華街嗰度，多唔多見？佢呢幾年神神化化咁，又成日飛嚟飛去，多數都係用 whatsapp 聯絡，見面就少啲！」一斌諗一諗就講 






「哦 …… 唔該晒你，你真係幫咗我好多！」 


「唔好咁講，大家坐埋同一隻船，有咩問題就打比我，時候都唔早，我番去執少少嘢，就去酒店住兩日，一唔一齊行？」


「好！」 






離開酒樓，落番彌敦道，向旺角地鐵站方向行，當我地行過咗山東街之後，忽然，「砰磅」「砰 …… 磅」 兩聲巨響，隨即聽到啲路人大叫大嗌，我同一斌回頭一睇，見到成地碎片，行前少少，發現有部冷氣機跌喺地度，仲有一個壓响一架私家車頂上面，好彩嘅係兩部冷氣機都無壓中路人！ 


同一時間，天空上面出現一張張長條形嘅紙條，萬天紙條，飄嚟飄去，有部分已經跌咗落地，睇真啲，呢啲白色長形紙條，原來係一張又一張嘅溪錢，點解 …… 會咁㗎？ 


我同一斌互望一眼，心諗，只要頭先行慢半步，我地就 ………… 


一斌深呼吸一下，就同我講 


「我諗 …… 我都唔可以獨善其身，如果唔係，下一個死嘅 …… 可能係我，阿東，你唔介意多個人幫手吖嘛？」 






「求之不得啦，阿斌！」我伸出右手，就講 


一斌亦伸出右手，緊緊握實，我知道成件事好快就可以結束！ 


談俊龍，我要你不得好死！