時間 : 12:12 


既然你要迫我入牆角,好,我一定會咬到你頭破血流為止! 


一斌肯幫手,好多事情都好辦好多,我地過馬路,行去朗豪坊,上四樓,經天橋過酒店,一斌就到櫃檯訂房,我喺大堂留意附近環境! 


攪掂手續,一斌將條門匙交比我,同我講 






「我要番公司交低少少手尾,好快番,你上房休息陣,有咩要就打比我!」 


「不如我同埋你去,多個人好照應!」我接過鎖匙就講 


「頭先咁都無事,我估暫時都唔會有咩意外,你把握時間計劃一下,下一步應該點做!」一斌拍拍我膊頭 






「咁 …… 你自己小心,有危險即刻打比我!」 


「好!」 


講完之後,一斌就行番過去朗豪坊,雖然有啲擔心,但佢咁堅決,唯有分頭行動! 






搭上37樓,3710 號房,門匙一開,再鎖好,一間好光猛嘅雙人房呈現眼前,望見一張咁舒適嘅床,睡意即時湧現,瞓喺張床上面,唔 …… 冷靜落嚟,腦海出現番兩個重要問題,嗰兩條一大一小嘅鎖匙究竟有乜用?仲有就係嗰張戲張,又會係邊個嘅? 


每每覺得順利嗰陣,危機其實四伏,點都好,只要搵到俊龍,咩迷都會解開!! 


個人長期處於緊張狀態,一放鬆,加上張床又軟熟,不知不覺就瞓著咗 …… 


眼前漆黑一片,咩都睇唔到,一把男仔聲不停叫喚 


「爸B,爸B,我好辛苦啊!」 






「老公,你快啲嚟救我地啦!」忽然,又有另一把女人聲 


「爸B,呢度好黑,我一個人好驚啊,你快啲過帶我走啦!」把男仔聲再次出現 


「係咪你啊?家怡,Michael,家怡,Michael ………… 」 


「哈哈哈哈 …… 郭健東,你同我死!!!!」一把男人聲大笑大嗌 


啊啊啊啊啊 …………






嗄嗄嗄 …… 原來 …… 係發夢,嗄嗄 …… 依家幾點啊?嘩 ~ 成個天黑晒,乜已經咁晏㗎嗱,仆街! 


時間 : 20:21 


「你醒嗱?」忽然有把男人聲咁講 
我轉身一睇,原來係一斌,佢無著上身衫响浴室行出嚟,雖然燈光好暗,但我睇得好清楚,一斌胸口上面有條長長嘅疤痕,都有成二、三十厘米長,以我估計應該係做開胸手術所致,一斌見我睇得咁入神,就開口講 


「我細細個已經發現有心漏病,十零歲就要做開胸手術,呢條咁長嘅 "拉鏈" 就係咁樣嚟!」 


著番件衫,一斌再講 






「休息夠未?夠嘅就起程!」 


「去邊啊?」我問 


「襯你瞓覺嗰陣,我諗到條橋,不如反客為主,雞仔捉麻鷹,頭先打咗去旅遊社問,知道俊龍今晚十一點會到香港,咁我地可以預先响月華街準備, 一見到佢落車,就捉佢上車,到時你想點都得!」一斌就講 


「唔 ………… 」 


「阿東,你有意見?」一斌向我問 






「唔係,我只係覺得好似 …… 好似 …… 唔知點咁!」聽完一斌咁講,我就話 


「信我,我地同一陣線,有我幫你,唔駛擔心喎!」一斌微笑回答 


諗深一層,我又真係諗唔到其他方法,無計可施之下,一試無仿! 


「好,我沖過涼就出發!」