消失的五年: 《四十二》
一九九五年五月五日 ……
照日期嚟睇，五月呢個時候應該正值會考搏殺階段，我仲記得當年同肥仔華佢地幾個差唔多日日都去翠桃樓嘅自修室溫書，由朝溫到晚，當然，溫到悶悶地，間中都有吓女，同隔離校嘅女仔吹吓水啦，但又真係唔覺有咩事發生過！
條仆街比得呢個日子，呢日一定發生過一啲嘢，既然諗唔到，最有效嘅方法就係上網搵吓有咩線索，打 "一九九五年五月五日"、"05-05-1995" …… 等相關字眼，結果得出一堆毫無關係嘅資料！
一九九五年五月五日 ……
十八年前 …… ，想知道十幾年前發生過啲乜，但連上網都搵唔到嘅話，唔 …… 唯好用啲原始嘅方法 -- 搵舊報紙，舊報紙、舊報紙 …… 咁 …… 邊度可以搵到？
圖書館！！！！
上圖書館網站，搵舊報紙一欄，攪咗一大輪，最終得個吉，再打 "搵舊報紙"，啲人留言話要搵咁舊嘅報紙，一定要親身去圖書館先可以睇到，
時間 : 07:27
附近最近嘅圖書館喺瑞和街街市，但要搵咁耐歷史嘅資料，為免白行浪費時間，直接去香港中央圖書館，九點開門，依家搭車過去差唔多。
行上地鐵站，忽然傳嚟響過不停嘅警號聲，由遠至近，一望，幾架警車、救護車同消防車啱啱經過消防局對出迴旋處，轉入開源道！
我急步走去觀塘廣場出口，見到大量黑煙湧上天空，街上好多市民停响開源道圍觀，我望一望，就搭扶手梯上月台！
响月台望過去，啲濃煙越嚟越多，細心啲睇，啲煙嘅源頭好似嚟自鴻圖道，感覺話比我知，啲黑煙可能同俊龍條屍有關 ……
列車駛到，呢刻都唔理得咁多，就算同條屍有關，都無補於事，上車去銅鑼灣要緊！