消失的五年: 《四十三》

時間 : 08:29 


喺銅鑼灣地鐵站 E 出口一出，由記利佐治街行向維園，再沿維園外圍一直走，過對面馬路，就係香港中央圖書館。 


行樓梯上去，企响水池旁邊，抬頭一望，望住呢座咁巨型嘅建築物，不期然令我諗起家怡同 Michael，我地曾經响呢度渡過一個愉快嘅星期日，曾經 …… 


一到九點，我就推門入大堂，走去詢問處，向職員小姐表明來意，佢指示我上四樓 - 《逾期報刊儲存庫》！ 






門一打開，我就即時走去櫃檯，同位職員講 


「小姐，我想問呢度係咪可以搵到一啲舊報紙？」 


「係啊，先生，麻煩你首先填妥份表格，然後出示身份證！」個小姐好有禮貌咁話 






「好 …… 啊！」 


揸住張表格，我猶疑咗一陣，填寫資料之外，仲要出示身份證，身份 …… 證呀，咁點好呢？ 


我轉身，慢慢行埋一邊，咁遠嚟到，博唔博好？！一唔小心，部電腦顯示到我係通緝犯嘅資料，咪好大鑊！ 






但係事到如今，無得唔博，我填完張表，再行番櫃檯，遞比個小姐，佢接過張表格，就要求我出示身份證， 


噗噗、噗噗 …… 


個小姐揸住張身份證，然後望望張表，再望一望我，面帶笑容咁交番張身份證比我，好有禮貌咁叫我等一陣，我即時呼咗口大氣！ 


隔咗幾分鐘，個小姐手上面攞住一個紅色嘅文件夾，入面放咗好多已經發黃嘅舊報紙，一九九五年五月五日嘅舊報紙！ 


個小姐提醒我只可以喺呢層睇，有需要仲可以影印，我接過文件夾，就行去閱讀區度坐低！ 






坐响藍色嘅梳化，我慢慢翻開啲舊報紙，好仔細咁留意當中所發生過嘅新聞，尤其係啲意外事件，睇完一版又一版，一份又一份，都唔覺有任何同呢件事有關嘅新聞！ 


花咗成個幾鐘，完全搵唔到，究竟點解？點解？我係咪忽略咗啲咩？ 


一九九五年五月五日 …… 五月五日？五月 …… 五日！ 


係喇，一定係，我知點解喇！