消失的五年: 《四十七》

時間 : 14:54 


正進行擴闊工程嘅屏廈路，沙塵滾滾，望住一架又一架嘅重型貨車响上面穿梭，道路兩旁係數之不盡嘅貨櫃場、回收場，一個個唔同顏色嘅招牌，海暉回收、邁豪物流、華健運輸 ..….…，行到去鳳降村路交界，眼前有個黃色嘅招牌，上面寫住「森記貨倉」！ 


森記貨倉外圍，用綠色圍板重重圍住，鐵閘並無上鎖，我輕輕力一推，跟住慢慢行入去，左手邊有一個用鐵架砌成嘅工作室，門打開咗，望向入面，一個人都無！ 


離開工作室，繼續向前行，喺一個疊一個嘅貨櫃山，我沿路咁繞過貨櫃陣，途中不停張望，幾分鐘後，行到盡頭，出現一間白色尖頂形嘅大貨倉，感覺話我知就係呢度！ 






一步一步咁行近，噗噗、噗噗、噗噗 …… 嘅心跳聲，快到連自己都聽到！ 


呼 …… 呼 …… 呼 …… 


企喺趟門前，揸住長形嘅金屬把手，手心出晒汗，呼咗口氣，向左一推，原來度門鎖住咗，望住把手旁邊嗰匙窿，我徐徐伸手入袋，攞出淨番嗰條銀色鎖匙，插入，一扭，「嚓」一聲，合埋眼，深呼吸一吓，再一推，要開始喇！ 






開咗度鐵門，入面環境好暗，只得屋頂上面微弱嘅陽光，定神一睇，個貨倉面積好大，又高，兩邊係一層層嘅鐵支架，大概兩層樓高，近門口位有樓梯，可以行上上層！ 


我小心翼翼咁行入裏面，心跳依然咁快，好似想爆炸咁，我大嗌一聲 


「出嚟啊！我嚟咗喇！」 






等咗一陣，但仍然鴉雀無聲，我不斷向兩邊望，四周圍放置好多舊傢具同大型雜物，一塊塊舊式人手繪畫嘅電影廣告板、一個個重型貨車嘅車呔、幾座石雕、連旋轉木馬拆淨嘅幾隻木馬都有！ 


忽然，「嘭」一聲，鐵門被關埋，呢一點都係我意料之內，隨之而嚟係音樂聲，同今朝一樣嘅純音樂，一把笑聲同時響起，「佢」終於出現！ 


著咗套黑色西裝嘅佢，神態自若咁由中間行出嚟，不發一言行去側邊張梳化度坐低，不停搖晃手上個紅酒杯，合埋雙眼，一副好享受嘅得戚樣！ 


「我已經嚟咗，快啲放咗我老婆同個仔，我任你處置！」 


條仆街無理我，繼續自我陶醉咁坐响度，我忍唔住行到佢面前，好大聲咁同佢講 






「仆街，你玩夠喇，有咩就講，唔好嘥時間！」


條仆街依然無反應，好似當我透明咁，隔咗一陣，佢放低杯酒，慢慢伸手入褸袋，攞咗個搖控制嘅物體出嚟，向前一㩒，一個大型嘅投射白幕從對面鐵架緩緩降落，跟住佢再向身後一㩒，投射器就開啟！ 


我好奇咁轉身望向螢幕，畫面入面全白一片，乜都無，右下角出現一個日期同時間， 


"10-01-2009 15:23"


即係我失蹤之前嘅一個月，鏡頭一轉，影住一間好似病房咁嘅地方，中間放咗張床，床上面有一個滿頭白髮嘅女人，鼻插住一條氧氣喉，雙眼半開半合，面容瘦削，瘦到凸出一對顴骨，一把男人聲就講 






「家姐，你醒醒，你有冇嘢想講？」 


個女人聽到之後，嘗試掙開雙眼，但唔太成功，嘴微微張開，眼見佢嘴唇不停咁震動，用咗好耐時間同好大力氣，先講到兩個字 


「報 …… 仇 …… 」 


講完之後，雙眼流下兩行眼淚，畫面就咁停咗 …… 


個男人張開雙眼，然後望住我，就講 






「郭健東，你認唔認得佢啊，我諗你都唔記得㗎喇，佢就係莫心蕙，比你地害到跳樓嘅莫心蕙啊！」 


「你都黐線㗎，我邊有害過佢啊，你一定攪錯，我記憶入面從來無害過佢！」我理直氣壯咁話 


「我無攪錯，我家姐唔會講大話，佢親口同我講話係你地五個害死佢，聶振華臨死之前親口承認咗，係佢地四個間接害到我家姐跌落樓㗎！」個男人略帶激動咁講 


「你都講係佢地四個啦，咁關我咩事啊？」我就話 


「哈哈哈哈 …… 哈哈哈哈 …… 」個男人彎住腰咁大笑 






「你笑乜撚嘢，講啊，關我咩事吖？！」見佢咁嘅反應，我即時再追問 


「哈哈哈 …… 你仲唔知你做錯啲咩呀？好，我就等你死得眼閉，將成件事講出嚟，幫你回憶吓吖！」