「你成日問我係邊個、係邊個、係邊個,到咗呢刻我唔怕話你知,我叫莫心藍,係莫心蕙嘅細佬,細家姐兩歲,同樣讀天樂中學,你可能無留意我,但我好早就認識你! 


一九九二年,我啱啱升中一,家姐讀中三,我地感情好好,佢好錫我,每日我地都一齊番學,一齊放學,喺學校遇到咩事,家姐都第一時間幫我,呢一年係我第一次聽到你個名 -- 郭健東! 


有次無意中聽到家姐同同學傾電話,期間提起你個名,望見家姐甜絲絲個樣,我就知道有啲嘢,於是我第二日小息偷偷行過家姐班房,留意到佢不時偷望一個男仔,嗰個男仔就係你! 


一九九三年,家姐中四,呢一年我知佢唔係咁開心,番學放學都苦口苦面,我問佢做乜唔開心,佢笑笑口話無嘢,雖然佢唔肯講,但我知道點解,因為佢唔能夠同你一班,有幾次我喺三樓走廊望上去,見到家姐偷偷望落下面球場,我望落去,見你喺度打緊籃球,再望望家姐,見佢睇到入晒神,面紅紅,笑咪咪,嗰刻我知道家姐一定係暗戀你! 






九五年,你地中五嗰年,發生咗一件改變咗家姐嘅一生嘅事,喺二月九號嗰日,聶振華、藍志豪、范一斌同談俊龍呢四個人渣,放學之後無走,鬼鬼鼠鼠約埋响 5B 班課室度睇寫真,就係嗰本《內田友紀寫真集》,世事就係咁橋,就响我地行緊樓梯落商場嗰陣,家姐忽然記起漏咗本書喺課室,於是叫我喺度等佢,佢就番番去攞,好唔好彩,比家姐撞到呢件事,以家姐嘅性格緊係搶走本書,諗住告發佢地,爭搶之間,本書一分為二,佢地四個見唔對路,聶振華同范一斌即時衝去攔住度門,談俊龍就用手揞住家姐把口,淨番嘅藍志豪不停响家姐耳邊講,叫家姐唔好舉報佢地,就嚟會考,比人踢出校好大鑊,佢地仲話咩都可以應承,家姐諗咗陣,做咗個 OK 手勢,談俊龍就慢慢鬆開隻手,家姐跟住同佢地講 


「呢半本咸書我 keep 住先,你地記住爭我一樣嘢,我聽日會講比你地知要做啲咩!」 


講完之後,家姐將本書收埋喺書包,然後再離開學校,我見佢好開心咁行番嚟,就問佢咩事,佢話要去買啲嘢,叫我番屋企先,見佢古古怪怪咁,咪偷偷地跟蹤佢,落到觀塘,家姐上咗寶聲戲院,買咗兩張聽日七點半西遊記嘅戲飛! 






第二日嘅小息,家姐捉住聶振華埋一邊,佢知道聶振華同你一班,又有兩句,就同佢講叫佢將張戲飛交比你,仲要保守呢個秘密,之後戲院發生嘅嘢,已經唔駛我多講啦,家姐睇完套戲番屋企,開心到成晚瞓唔著,揸住張飛自言自語,仲响背後寫咗幾隻字,到天光都無瞓過。 


會考臨近,家姐知你會去翠桃樓嘅自修室溫習,每日佢晨咁早就落去霸位,坐喺一個幾起眼嘅位置,希望你發現佢嘅存在,點知你望都無望過佢一眼,但家姐無放棄,依然日日去自修室 …… 


直至五月五號,我永遠都唔會忘記呢一日 ……






呢日係家姐嘅生日,佢一早起身,扮到靚一靚,仲鼓起勇氣寫咗封情信比你,襯你唔留意,放咗喺你枱面,封信寫住約你响翠柳樓嘅平台等,佢一直等、一直等,點知嚟嘅竟然係 …… 嗰四個人渣,佢地揸住封信嚟到,就同家姐講話你收到封信之後,睇都無睇就掉咗落垃圾桶,仲同佢地講 


「都唔知邊件豬八戒寫封咁嘅嘢,啲字又醜怪,靚極有限,咪攪我!」 


我家姐聽到之後好傷心,不停咁喊,班人渣見到咁,仲不停咁取笑同侮辱我家姐,話佢醜怪、姣婆、唔知醜,圍住佢地大大聲咁將封情信讀出嚟,家姐一時睇唔開,就個爬咗上個壆度,班人渣唔單止無停口,仲變本加厲,越笑越大聲,跟住一步一步行過去,家姐比佢地嚇一嚇,就失去平衡 …… 由平台跌落地下,班人渣見玩出火就鳥獸散 ……」