消失的五年: 《四十九》

「點啊，郭健東，記番起嗰日做過啲咩未啊？哈哈哈哈」莫心藍望一望我


「你條仆街黐線㗎！」


「做乜成日咁讚我啫，傻豬嚟㗎，唔好勞氣住，聽我講埋先。」莫心藍自顧自繼續講埋落去


「班人渣散晒無耐，救護車好快就到，當時家姐已經進入昏迷狀態，送到聯合醫院搶救，雖然保得住條命，但係醫生話家姐嘅頸椎骨嚴重受損，導致下肢癱瘓喎，雙手嘅活動能力都受到影響啊 .…」






「你知唔知係點啊？ 終身都要用輪椅代步，連最簡單嘅揸支筆都做唔到，食飯都要人餵啊！ 佢昏迷咗幾日，一醒番知道自己咁樣，一時之間，根本接受唔到，除咗喊，咩都唔肯講，有好幾次佢試過咬脷自殺，自殺啊！！」


「你知唔知家姐嘅夢想係咩啊？佢想做醫生，如果無發生依件事，佢可能已經做咗醫生喇！」


「郭健東，你話你地五個抵唔抵死？講啊，抵唔抵死啊！！！」






「你就係因為呢個原因，所以迫藍志豪跳樓，做到好似自殺咁，將聶振華、談俊龍同范一斌殺死，然後嫁禍比我？」我指住莫心藍咁問


「係，佢地全部都抵死，無一個值得可憐！！」莫心藍大大聲咁講


「佢地無一個值得可憐？咁我呢？發生咗咁多事，犧牲咗咁多條人命，你竟然同我講係因為一句戲言，一句連我自己都唔知有冇講過嘅戲言，就攪到我家破人亡？摧毀我一生？」






「我唔知道振華佢地有冇做過啲過份嘅事，就算有，都罪不至死，莫心蕙件事係意外，無人想發生㗎，但係你殺人、嫁禍，甚至牽連其他無辜嘅人，就罪無可恕！咁多個之中，最應該死嘅就係你條仆街，莫心藍！」我怒不可遏咁講


「哈哈哈 …… 依家咩都唔重要，喺我心目中，佢地四個都係抵死，而你 ~ 就係罪 · 魁 · 禍 · 首 …… 哈哈哈！！」莫心藍不停咁大笑


「我係罪魁禍首？我做錯啲咩啊？遇到你呢個癲佬我無說話好講，但係我老婆同個仔係無辜，佢地唔應該牽涉喺呢件事入面，你快啲放咗佢地啊，人渣！」我忍唔住衝去莫心藍面前，揸住佢衣領


「哈哈 …… 你老婆呀？啊 ~ 差啲唔記得咗添！」


莫心藍講完之後，輕輕推開我隻手，响梳化度攞起一個疑似搖控車嘅控制器，㩒咗幾下，一架搖控拖頭慢慢喺後面駛過嚟，好奇怪架車後面載住一個白色圓形嘅物體，望見莫心藍個得戚樣，我知道將會有啲唔好嘅嘢發生。






架車越駛越近，最後停咗喺我腳邊，我望望莫心藍，見佢一路笑，一路咬住手指頭，就講


「Surprise？哈哈哈哈 ……」


依家我可以睇得好清楚，响架拖頭後面係一個白玉色嘅 …… 骨灰盅，我慢慢彎腰將個骨灰盅攞起，一望，上面刻咗三個字 --


蔣 …… 家 …… 怡 ……


啊啊啊啊啊 …… 啊啊啊啊啊 …… 唔好啊！唔會係真㗎 …… 啊啊 …… 啊 ~~