消失的五年: 《五十一》
「啊啊啊 …… 嘶 …… 啊啊啊啊 …… 啊啊啊 …… 啊 ……」我㩒住傷口，大聲慘叫
「郭健東，你做咩啊？吞槍啊，你射膊頭托呀！」莫心藍好失望咁話
「今日 …… 我 …… 嚟得呢度就無諗過離開，死 …… 我就預咗，啱啱呢槍當我欠你又好，欠你家姐都好，下一槍 …… 我一定會比個滿意嘅結局你，依家我只係想喺死前聽吓我個仔把 …… 聲？」我忍住傷痛咁講
「哈哈哈 …… 郭健東，你以為打傷自己，我就會比你聽到個仔把聲呀？哈哈 …… 發夢啦你！」莫心藍好得戚咁恥笑緊
「莫心藍，我依家 ……. 求吓你，求你話比我知，究竟 …… 我個仔喺咪仲未死！」
我雙腳跪落地下，將自己嘅尊嚴完全放棄，垂低頭講
「莫心藍，只要你話比我知，你叫我做咩都得，我扮狗，汪汪，你當可憐我話比我知得唔得？」
「哈哈哈哈哈 …… 嘩哈哈哈哈哈 …… 真係笑到流晒眼水，為咗個仔，你真係扮狗都得喎，哈哈哈 …… 好、好！」莫心藍一邊講，一邊响褲袋度拎咗部手電出嚟
「哈哈哈 …… 見你仲乖過我之前養嘅生滋狗，我唔怕講埋比你知，你個仔唔單止仲未死，依家就响出面黃色有哈哈笑公仔嗰個貨櫃入面，你記唔記得嗰個貨櫃啊？你咪响嗰度渡過咗五年囉？哎吔，我真係無記性，之前無話你聽咩？噢，唔緊要啦，知唔知都一樣啫！哈哈哈 ……」
「莫心藍！！！」
「仲有仲有，你知唔知我做咩揸住個電話啊？你以為我會比你聽吓佢把聲呀？你唔駛指意啊，只要我輕輕力㩒個掣，「嘭」一聲，你個寶貝仔到時就會粉身碎骨，哈哈哈 …… 唔好諗住博啊，博唔過㗎，快啲吞槍啦，我等你爆頭好耐喇，哈哈哈！」
「你個人渣 …… 天有眼㗎！！」我怒睥一眼
「天緊係有眼啦，等咗十幾年，我終於可以同家姐報仇，哈哈哈哈哈 …… 依家我數十聲，你唔吞槍，我就送你個仔一程，ARE YOU READY？ ……
十 ……
右手緊緊揸實支鎗
九 ……
慢慢舉起
八 ……
抬高頭
七 ……
合埋雙眼
六 ……
呼口氣
五 ……
「噗噗 、噗噗 ……」
四 ……
緩緩張開口
三 ……
槍嘴對準
二 ……
「啊啊啊啊啊啊啊 …… 」
一 ……
「哈哈哈哈哈哈哈 ……」