消失的五年: 《五十二》

支槍發出「啪」一聲，莫心藍望見我垂低頭嘅同時，佢嘴角一戚，並無遵守承諾，即時按掣，合埋雙眼，準備迎接巨響嘅來臨！！ 


可惜，等咗一陣，唔知咩原因，出面無預期嘅爆炸聲，有嘅竟然係貨倉鐵閘強行被打開嘅聲，「嘭」一聲之後，十幾個飛虎隊同警察一齊衝咗入嚟，大嗌 


「全部人咪郁，放低支槍！」 


莫心藍呆咗，從佢嘅表情睇得出，佢完全無諗過有呢一刻，幾秒前，佢仲笑唔停口，但係依家，佢唔單止笑唔出，仲比另一個情景嚇親，因為我仲未死！！ 






我緩緩咁抬高頭，張開雙眼，高舉右手，連隨將手上支槍掉咗落地，狠狠咁釘住莫心藍！ 


「點解，點解會咁㗎，講嘢啊，郭健東，你個仆街呃我，郭健東 ……」莫心藍不停咁問 


「我呃你？邊有啊？槍我又開咗，點知會無子彈啫，頭先講過我一定會比個滿意嘅結局你，乜依家你唔滿意呢個結果咩？做咩笑唔出啊？！」 






聽到我咁樣答，莫心藍忽然間狂笑大嗌 


「哈哈哈 …… 哈哈哈 …… 啊啊啊啊啊 ….…」 


然後用力扯爛自己件恤衫，上身露出一條長長嘅疤痕，就講 






「㗅㗅 …… 郭健東，你記唔記得呢條疤痕啊？之前同你提過嘅心漏病之外，我仲裝咗個心臟起搏器，以防萬一，喺上面加咗個安全制，你以為咁就可以贏到我呀？哈哈，我話你知我係唔會坐監，我係唔會輸㗎，哈哈哈哈！」 


講完之後，佢用力將個電話掉落地下，碎片四散，同一時間，我望住莫心藍，佢好似無咗靈魂咁，成個人躂咗落地，郁都唔郁！ 


見到咁嘅環境，我無理會周圍嘅警察，忍痛衝埋佢身邊，伸手摸一摸佢頸動脈，竟然 …… 無咗脈搏！


身邊啲警察即時用對講機叫救護車，而我就好自然咁大嗌 


「快啲攞部去纖震器嚟啊！」 






「莫心藍，你害死我老婆同咁多人，講真，我真係好想你死，但係 …… 就咁死，實在太便宜，我同你講，只要有我喺度，都唔會比你咁早死㗎！」我對住莫心藍講 


响我身邊嘅警察，正準備替我鎖上手扣嘅一刻，我就問 


「我係救護員，可唔可以將佢交比我試吓？」 


個警察望望佢上司，見佢點點頭，我就立即打開部機，將兩塊電極片貼响莫心藍嘅右邊膊頭對落同左邊腰部間，然後分析，部機隨即發出電擊嘅聲音，一㩒，電流即時通過莫心藍，身體震動一下，再摸，仍然無脈搏 …… 


「仆街，你咪駛指意死啊！」 






兩分鐘心外壓後，再分析，指示電擊，一㩒，電流再次通過，我望住部機，原本直線嘅畫面，突然發出 


「咇 …… 咇 …… 咇 …… 咇 ……」 


再摸佢頸動脈，笑一笑，細細聲响佢耳邊講 


「哈，有排你坐啊，莫心藍」 


呢個時候，三個救護員啱啱趕到，一睇，係輝叔，佢見到我即問 






「東，你點啊？」 


「我？頂得住，你快啲送個人渣去醫院，唔好比佢死得咁舒服！」我㩒住傷口咁講 


「好，咁你等多陣，我叫多架車嚟，你自己小心！」輝叔拍一拍我就講 


「無問題，遲啲再傾！」 


佢地迅速將莫心藍送上救護車後，就著晒警號咁離開！