我係一個驅魔師，專幫人驅散妖魔鬼怪: 8【Chapter 2 委托二—貓又】

「唔該，我想問廁所喺邊度？」一個揸住拐杖嘅少女問。

「你都無得去廁所，問嚟做咩？」

「哥哥，我想玩捉伊因，同我一齊玩呀！」一個約莫五六歲嘅細路仔喺我面前揚嚟揚去。

「醫院裡嚴禁追逐，乖乖坐埋一邊先。」

有人會話，某啲地方容易聚集鬼魂，例如醫院同殯儀館。





呢種講法係正確，以科學角度嚟講，鬼魂係生物死後嘅殘餘能量體。佢哋脫離肉體後，通常會漫無目的喺附近徘徊。

咁係因為，失去掌管記憶嘅海馬體，令佢哋嘅記憶變得唔完全，甚至唔知自己係咩人，做緊啲咩。

無錯，喺我眼前飄浮嘅全部都係鬼。

「呢度好多我嘅同類。」一道純白色身影，彷似煙霧嘅少女喺我隔籬飄浮。

「若兒你做咩無啦啦出嚟湊熱鬧？」





「因為呢度陰氣太旺盛，好自然就被吸引出嚟。」

「凌仔？」穆姑娘嘅聲音從前面傳嚟。

「係？」我回過神。

「前面轉彎就到啦。」

「無問題。」我輕聲向若兒講，「你返入去先。」





「喔。」

若兒化為白煙消散空氣之中，眼前依然有好多鬼魂飄嚟飄去。

不過比起呢樣，我更介意一樣嘢。

「穆姑娘，都話你叫我凌先生就可以。」

「唔得，叫凌先生太見外啦！你話晒都係嚟幫我，當然要親切啲對你啦，凌仔！」

「唔使客氣，你畀錢委託我，我就會幫你。」

「唔得！我哋香港人成日俾人話冷漠，所以我要用行動話畀人知我哋其實都可以好nice㗎！」

想法係好好，但你可唔可以唔好用咁令人誤會嘅花名叫我？





事先聲明，我係直到不甩嘅直。

穆姑娘係今次嘅委託人，約莫比我大十歲左右，佢係呢區嘅社工，專門負責獨居老人嘅生活。

通常社工都有個特質，就係好擅長喺唔同環境唔同人互動，而我喺穆姑娘身上亦感受到呢點。

佢唔同其他委託人比較生硬，見面兩分鐘就主動破冰，態度親切得同朋友一樣，仲亂咁幫我改花名。

做得社工份人係唔同啲，而且今次委託內容亦關連到佢份工。

「到喇。」

房門被推開，一個瘦骨嶙峋嘅伯伯瞓喺病床上。





「自嗰日之後，張伯就一直無醒過，身體仲愈嚟愈虛弱。」

臉色的確唔太樂觀，虛弱得就好似隨時要兩腳一伸。

張伯係穆姑娘負責嘅其中一個獨居老人，好似前兩年老婆癌症死咗，仔女搬晒出去住，得返自己一個人喺屋企過人世。

對於社工嚟講，負責嘅每個case都係佢哋心血，因為佢哋每次都會交出心同對方溝通。

「明明已經趕走咗隻貓，但張伯嘅病情一直無好轉……」穆姑娘擔憂咁望住張伯臉容。

無錯，一切事源係源於一隻貓——

象徵不祥嘅「黑貓」。

兩個鐘前，我收到穆姑娘突如其來嘅緊急委託。





「雖然講你都唔信，但唔怕話你知……其實呢一帶附近有隻好可怕嘅妖怪！」

「噓——唔好喺café咁大聲。」

穆姑娘坐喺我對面，邊飲咖啡邊十分激動咁喋喋不休。

「聽落好似好荒謬，我所講嗰隻妖怪係一隻貓妖，佢會扮成流浪貓喺附近徘徊，專門危害一啲無戒心嘅人。」

你對住一個驅魔師講妖怪好荒謬，你會唔會覺得自己更加荒謬？

「呢幾個月已經有好多人受害，我聽過幾位受害人所講，事情經過都差唔多——有日有隻黑貓瞓喺街邊，睇落十分虛弱，體型非常瘦削，就好似無食嘢好多日咁，縮埋一舊喺度震。」

一如既往，我坐喺café角落，聽述穆姑娘講述詳情。





「佢哋因為見到唔忍心，所以帶咗隻黑貓返屋企。」穆姑娘突然瞪大對眼，「但無幾耐，噩夢就開始發生……」

穆姑娘一副講故佬嘅樣，睇嚟佢好擅長講故。

「咩噩夢？」我問。

「據佢哋所講，自從養咗隻黑貓之後，就開始出現幻覺幻聽，見到啲奇怪人影，聽到啲唔存在嘅怪聲。開頭情況只係零星，但之後愈嚟愈頻密，甚至影響到佢哋日常生活。」

「咁最後點？」

因為穆姑娘話有好多受害人，事情應該會有個完結，之後黑貓先去搵下個目標。

「最後受害人會大病一場，之後黑貓就會憑空消失，不知所蹤。」

不出意外嘅結局。

「連醫生都搵唔到佢哋病因，不過過咗一個禮拜左右，佢哋就唔知點解自然好返。」

「喔……」我微微點頭，「所以你想我幫你捉咗隻貓妖去？」

「無錯，但除此之外仲有一件事……」穆姑娘表情驟變嚴峻。

「咩事？」我疑問。

「我想你救救張伯。」