我係一個驅魔師，專幫人驅散妖魔鬼怪: 29

「白寧小姐，你呢身打扮幾有風格下。」

「呢件係牛仔道袍嚟，因為著住正規道袍出街好怪，所以就著住呢件衫。」

「估唔到睇落年紀輕輕，原來係一位道士，失敬失敬。」

「過獎過獎，我都唔係好犀利咋，呢位凌先生犀利過我十萬倍添！」

「哦……話說我最近想開套殭屍片，又諗住加個類似白寧小姐你咁嘅新潮道士角色落去，白寧小姐唔介意嘅話可以嚟試下鏡。」





「真㗎？」

「當然，白寧小姐資質唔差，我相信幫你執一執或者上到大銀幕都唔定。」

「咳咳。」我乾咳一聲，「不如講返正題。」

「啊！唔好意思呀，講太多題外話。」

呢個一頭攣毛，戴住黑超，全身牛仔打扮嘅人叫Derek，係個導演，專門拍港產靈異片。





聽講佢前排拍咗套殭屍片好收得，套片紅到大陸同馬拉。唔知係咪因為咁，就擺到個人好大派咁。

的確，有唔少出名嘅人都好信神怪呢家嘢，但又唔想公開畀人知，所以多數都會偷偷地請人去搞呢啲嘢，就好似我前排就接過單養鬼仔嘅委託。

Derek嚟到之後就一味咁撩白寧，一副老江湖嘅姿態。

但白寧好似對呢方面無反應，仲沾沾自喜充大頭，都唔諗下半個鐘前叫緊邊個做師父。

而且Derek呢個人，直到而家都無正面望過我一眼。





「係喇，呢次我嘅委託係咪會由白寧小姐全門負責？」

「負責嘅人係我，佢係嚟做助手。」我冷冷咁講。

「哦……咁真係可惜，純粹問下啫，無咩惡意。」

前言撤回，佢唔單止係麻煩，仲乞人憎。

「開始前我要提一提，由呢刻開始到委託完結為止所有嘢都要保密，唔可以洩露畀任何人知。」

點知佢話：「我梗係唔會爆響口啦，我仲反而擔心你會洩露畀其他人知添！」

「凌先生唔會係亂咁爆人秘密嘅人嚟嘅，Derek先生你大可放心。」白寧加把口。

「Fine，我都係講下啫。」





我拎出錄音筆，撳咗錄音掣後同Derek講：「無問題你隨時可以開始。」

「咁樣嘅，大約從一個月前開始，我就不停發到同一個夢。」

「咩夢？」

Derek收起啱啱嗰副不可一世嘅態度，倒吸一口氣，展現出好認真嘅表情。

「喺一條好黑嘅街道，有個長髮白衣女鬼追殺我。」

「係點樣追殺？你詳細啲描述一下個夢嘅情況。」

「個夢大概就係我喺條街蕩失咗路，於是我就搵路走。正當我行行下，無啦啦有個白衣女鬼出現我眼前，咁見到啲咁嘅嘢，我第一時間梗係即刻轉身就跑啦！但當我跑到下個轉角位，佢又再次出現喺我前，無論我點跑都撇唔甩佢！」





「跟住呢？佢係點樣殺你？」

「佢就好似當我係玩具咁玩，追到我無力再跑，想放棄嘅時侯，佢就會行埋嚟，雙手捏住我條頸……每次去到呢度我就會嚇到忍唔住醒返。」

「幾耐會發一次呢個夢？」

「初頭幾日一次，之後愈嚟愈頻密，依家幾乎晚晚都夢到咁制。」

「每次夢到嘅場景位置都係一模一樣，無任何變化？」

「係。」

我留心聆聽Derek每句話，而白寧則好安靜咁坐喺我身邊，成個聽唔明老師講嘢嘅小學生。

「重點係個夢真係非常非常真實！跑緊嗰陣真係會喘氣同埋對腳會攰，跌低嗰陣個人會痛，俾隻鬼捏住條頸時真係有種唞唔到氣嘅感覺，就好似真人都俾佢捏住一樣！」





Derek講講下，講到甚至連個人都喺度喘氣。

「Derek先生你冷靜一下先，唔使咁急，慢慢咁講。」白寧講。

短短聽Derek對夢嘅描述，已經可以得出一個結論——

呢個噩夢，係針對Derek本人蓄意形成。

以近代精神分析學詮釋，夢係瞓覺嘅時侯大腦活動產生嘅映象，而夢境係自身潛意識嘅反映。

舉個例——當你成日睇驚慄恐怖片，發夢時就自然會發噩夢；當你成日諗住同一個人，發夢時就自然亦會夢到嗰個人。

不過雖然Derek係專拍港產靈異片嘅導演，但佢嘅情況並非普通噩夢。





有種講法，夢境其實係由大腦電流磁場形成嘅另一個異空間，當我哋瞓覺時意識會轉移到異空間中，由潛意識主導下進行活動——即係所謂嘅「夢」。

部分靈體可以透過某啲渠道入侵他人夢境，例如怨魂、魅魔，以及喺夢境之間徘徊，專門侵蝕夢境嘅夢魘。

夢中夢、夢中猝死、睡眠窒息……好多時其實係呢啲靈體作怪。

「其實，做我哋呢行嘅人好多都會忌鬼神，我自己本身信佛，都有問師父拎條開光佛珠鍊鎮下。」

Derek展現手腕上條珠鍊畀我哋睇。

「但都係唔掂，所以先嚟另謀高就。」Derek望向我，「聽講你自稱驅魔師，咩靈異事件都解決到，唔知你幫唔幫到我解決到呢？」

我甚少處理呢類超自然案件，因為要處理非處於三維空間嘅妖魔鬼怪，難度會幾何級別上升。

「如果你可以好好合作，或者唔難解決。」

「如果係錢嘅話我大把，要幾多有幾多。」

「唔係呢個意思，你只要答我兩條問題就得。」

Derek疑惑咁望住我。

「你有無試過為咗拍戲，做咗啲禁忌嘅事，例如唔尊敬死人，或者觸犯咗某啲禁忌儀式？」