我係一個驅魔師，專幫人驅散妖魔鬼怪: 67
意想不到嘅人出現眼前。
係穆爾泰，穆樞機。
「點解……？」
「從一開始我搵你委託或者係錯，事情已經超出我哋預料，所以我決定正式向教廷尋求協助。」
「等等……我對付到龐亮，下一次我一定可以殺死——」
「夠啦。」霍靜截停我嘅話，「我已經決定咗，總言之你唔好再插手呢件案。」
我唔明白霍靜點解突然要做出咁嘅決定。
「連魔都對付唔到嘅驅魔師，同垃圾無分別。」
穆爾泰企喺霍靜隔籬，雙眼卻無正視過我。
「對唔住，令到你受到咁嚴重嘅傷，你就喺度好好靜養。」
霍靜向我低頭道歉之後，就同穆爾泰離開病房。
而我，就好似不被信任嘅人，被遺留喺原地。
「好喇，依家我就送你去做個詳細檢查——」
突然，幕簾又被人拉開。
「師父！哎呀！」一道笨拙嘅身影仆落病床上。
「……你又做咩？」我無言望住眼前呢個人。
「因為我收到電話話師父人入咗院，所以就即刻過嚟探你！」
除咗白寧之外，睡衣著束嘅Shelly同浩然都喺度。
「你哋……」我詫異望住佢哋。
「阿瞳因為要照顧佢細路，所以嚟唔到。」Shelly邊打喊露邊講，「真係……半夜三更無啦啦要人過嚟醫院。」
「睇嚟呢次連小凌都搞唔掂，俾啲妖魔鬼怪打到入院。」浩然半開玩笑地講。
「……多謝。」
我心中只有呢一句話。
「多咩謝呀！」白寧讕係熟咁搭住我膊頭，「師父有難，徒弟當然馬上前來救駕。」
「你唔係電話跌咗落屎塔度咩？點解又收到電話？」
「登登登登！」白寧從褲袋拎出iPhone X，「係咪好潮呢？」
我搶走佢部電話，一嘢掉落地下。
「喂呀！師父！」白寧捧住屏幕碎裂嘅電話，「你點可以對我心愛部電話咁做？師父正衰人！」
霍靜已經終於咗我哋嘅委託，我唔使再去追尋連環殺人犯。
但事情仲未完。
我必須要去解決呢一切。
「我有嘢想你哋幫手。」我向Shelly同浩然講。
「……嗯？」Shelly睡眼惺忪咁答。
＊
「嗚哇！師父掉爛我部電話，正衰人！」
「鬼叫你咁撚寸，又唔係用唔到。」
「師父去死，師父去死！」白寧成個細路咁大嗌。
我即刻撳住佢把口，然後話：「細聲啲，你想我俾人捉返入去醫院？」
白寧一臉無辜咁望住我，乖巧咁點頭之後，我先放開手。
而家我同白寧已經離開醫院，但我亦喺病房準備做詳細檢查。
無錯，我同浩然偷龍轉鳳，佢扮成我瞓喺病床，然後Shelly再拖延住醫生嘅時間，我就趁機離開醫院大樓。
而家佢哋應該俾人發現，不過我幫唔到佢哋。
自求多福。
「師父，你依家係咪諗住返屋企？」白寧問。
我搖一搖頭，然後話：「我驚差婆知道我走路，會叫黑警上門捉我。」
「咁你諗住去邊？去開房？」
「……邊個教你講埋啲咁嘅嘢？」
「嗯？」白寧卻一臉不解，「開房唔係開酒店房咩？」
算數……愈描愈黑。
「去你屋企。」
我跟住白寧上去佢屋企，原來佢屋企同道居喺同一層。
好彩無驚動矮肥瘦同佢師父，如果唔係應該俾佢哋趕走。
「到喇。」
白寧推開門，帶有道教氣息，簡若風格嘅大廳映入眼前。
我沿住大廳行一轉，基本上裝潢同道居有五分相似。
唯獨走廊裡面某間房房門同大廳風格截然不同。
我將手放落門柄時，白寧忽然大叫：「師父，唔入得呀！」
已經太遲。
我推開門，裡面係一間非常粉紅可愛嘅房間，裝潢非常有少女心，床上仲有幾隻大公仔。
白寧一嘢撞開我，衝入房攬住最大嗰隻狗狗公仔，扮可愛咁講：「呢間我間房嚟，師父唔入得！」
「我仲以為會成間房都係蔥。」
「蔥係食物，要放廚房。」
「……呢啲時侯你又幾有常識。」
「快啲出去！」白寧嘟起嘴巴。
「你有無聽過……公仔藏屍案？」
「喂呀！唔聽呀！」白寧一個公仔掟過嚟，「同我出去！」
傷者被虐待完之後，仲要好似老婆唔俾老公瞓房咁被趕出房。
於是我坐喺大廳梳化，順便重新包一包傷口。
「師父，你依家諗住點做？」
嚟白寧屋企途中，我已經將成件事話咗畀佢知。
「雖然霍靜唔俾我插手佢單案，但無話過唔俾我以個人名義去追查。」
「但你唔係話過唔會喺委託以外嘅情況接觸神怪事咩？」
「嗯……我的確講過。」
因為我嘅魯莽舉動，令若兒喪失性命。
所以我向自己發誓，唔會再喺委託以外嘅情況擅自驅散妖魔妖怪。
但係，我必須要去面對龐亮……
面對嗰個將我家人殺死，令我害死若兒……迫使我成為驅魔師嘅一切原兇。
「既然係咁，就由我嚟委託。」
白煙從褸袋飄出，化成少女嘅外貌。
「小凌，你已經唔係細路，我亦無能力干涉你決定。」
若兒企喺我面前。
「如果係你希望，我會同你並肩作戰。」
「若兒……」
「呢個係我嘅罪孽，我無資格阻止你。」若兒踎喺我面前，捉住我雙手，「但無論係點，我都會陪住你。」
「多謝你，若兒。」
委託成立——
若兒委託我去驅散龐亮。
之後呢幾日，我留喺白寧屋企養傷，而白寧就幫我出去買嘢，補充驅魔工具。
龐亮正製造一個大形法陣，每五日就會前往特定位置殺人並吞食靈魂。
根據嗰日停車場觀察，佢似乎仲喺目的地繪畫法陣。
但工廈已經被警察封鎖，我無法去查龐亮究竟畫咗啲咩法陣。
計埋停車場，龐亮差最後一點就完成法陣。
好彩我記得霍靜畀我睇過嘅地圖，我自己跟住google map地圖手繪一張地圖，搵出最後嘅目的地。
然後，只要今晚去到嗰度，就可以見到龐亮。
所有因緣……就由今日解決。
鈴鈴鈴——
突然收到電話，我拎起一聽。
「喂！凌大哥！」
「肥師兄？」我十分驚訝，無諗過肥師兄會打畀我。
「乜鬼肥師兄……依家唔係講呢啲時侯，你有無見過白師妹？」
「白寧……？」
我赫然醒起，白寧尋晚出去之後就無返過嚟。
「係呀！白師妹……白師妹佢尋晚開始就失咗蹤，唔知去咗邊呀！」