[老師有甜] 戀上兒子學校的老師: 第四章

一個星期之後, 我正響自己開嘅小型地產舖內, 客人打電話黎同我講, 「吳生, 我今日有啲事, 要改四點先可以落黎簽臨時買賣合約!」 我正開始有啲煩惱住, 四點, 我要湊志仔放學去補習社喎, 但舖內幾個職員又已經出左去帶客睇樓, 咁點算至好呢?
 
但客人又話唔可以提早同晏啲, 我正惆悵緊嘅時候, 跟住我就唯有打電話去學校, 諗住通知校方可唔可以比志仔暫時多留響學校度一陣先, 等我做完野之後就會趕去學校再接佢放學。
 
我按住電話打去學校, 接電話果個居然就係陳老師, 我同陳老師講左我打黎嘅目的, 跟住陳老師就同我講, 「吳生, 不如咁吖, 放左學就等我幫你帶志仔去補習社度先啦, 等你做完野之後跟住就可以直接去補習社度接番志仔咪就得囉!」
 
陳老師嘅提議令我感動不已, 「但咁樣會唔會麻煩倒妳呀?」 陳老師再講, 「唔會, 好小事黎啫, 你到時就去補習社度湊志仔得架嘞!」
 
收線之後, 我就開始繼續努力地工作, 終於個客黎簽左約之後, 跟住好快我再揸車落去補習社度, 泊好車後, 我行入左呢幢商業大廈再搭 lift 上樓, 遠處已經望到單位之內嘅陳老師正呆坐住響度等緊。
 




我加快腳步行到入補習社之內, 「唔好意思呀陳老師, 累妳要幫我湊志仔黎呢度添!」 陳老師又再用一貫甜笑嘅表情黎咁同我講, 「唔緊要, 志仔而家響入便補緊習, 不過今日星期五會比較多功課做, 所以補習社話佢可能要八點先至走得喎!」
 
八點, 我望吓隻錶, 而家先至係五點幾, 我再同陳老師講, 「我有車響下便, 咁不如我揸車先送妳番左屋企先啦!」 陳老師再笑住同我點頭示好。
 
同陳老師一齊搭 lift 落到樓下之後, 陳老師跟住同我講, 「其實志仔佢真係好乖同好生性, 佢話我知其實你真係好辛苦, 又要番工又要湊佢番放學, 番到屋企仲要煮飯洗衫同幫佢溫習, 吳生, 我同志仔一樣都覺得你真係好叻呀!」
 
我個電話又響起, 係客人打電話比我問有無新租盤可以介紹, 但此刻陳老師聽倒我嘅對話之後, 心下即時諗起正想搬屋逃避前度男友呀俊嘅事。
 
我收線後, 陳老師跟住就編左個故事黎同我講, 「吳生原來係做地產經紀架, 咁啱嘞, 我同媽咪而家住緊果度, 個業主話響下個月租約到期之後就會大幅加我地租, 而家我正留意緊其他區有無啲比較平租啲嘅屋可以搬, 係呢吳生, 唔知你可唔可以幫倒我咁呢?」
 




我問左陳老師而家佢住響邊、 屋嘅面積同交緊幾多錢租, 跟住我就攞個平板電腦出黎 check 完之後就話。
 
「我有個客, 佢長期留響外地但就有幾間屋擺低左比我負責幫佢管理同放租嘅, 咁啱其中一間屋上星期個租客就搬走左, 租金方面我可以同個業主傾唔好收得咁貴, 唔知陳老師有無興趣而家上去睇吓間屋咁呢?」
 
陳老師聽到之後, 即時好開心咁點左一吓頭就嗌好。
 
我揸車同陳老師去到呢個租盤嘅大廈樓下度, 上左樓後, 跟住我同陳老師就入左呢間四百零呎而裝修得好簡約嘅兩房單位之內, 陳老師似乎幾鍾意呢間屋咁, 見佢不時望吓房內嘅間隔, 一時就欣賞住窗外嘅美景。
 
陳老師笑住同我講, 「間屋其實我都幾鍾意, 但至於租金方面……」 我同陳老師講租金方面我可以盡量幫佢同業主叫低啲, 而其實響心入面我亦希望真正能夠幫倒陳老師佢, 我即時 Whatsapp 比個業主同佢傾談租金方面嘅問題, 好快趣, 個業主亦答應我能夠以低過市價黎將呢間屋租比陳老師。