[老師有甜] 戀上兒子學校的老師: 第六章
終於都夠鐘再上番 Eliane 嘅屋企, 幫佢搬完柜之後, 我發覺 Eliane 似乎真係悉心打扮過一番咁, 薄薄嘅淡妝, 一條筆直嘅連身短裙。
Eliane 笑住同我講, 「吳生, 今次為左我搬屋嘅事真係麻煩左你好多, 咁啦, 如果唔介意嘅話, 我想搵日請你同志仔兩個一齊出去食番餐飯當係多謝你嘅幫忙!」
我亦笑番住同佢講, 「邊個請都好啦, 可以幫得倒人嘅咪就幫囉, 況且我亦都有 commission 收嘅, 正確啲講其實應該係我多謝番妳至啱!」 雖然我同樣對 Eliane 亦都有啲感覺, 但我同 Eliane 一樣都係唔知應該要點講同點做, 先至可以令到大家都知道對方嘅心意會係點。
我響個袋攞左個剛買嘅新門鎖出黎, 跟住我就再同 Eliane 講, 「同妳換埋把新鎖去, 因為始終之前有人住過, 同埋….妳把門鎖似乎刪得都唔係咁好!」
Eliane 聽倒之後正一臉感動咁話, 「係呀, 我成日上黎都覺得把鎖唔係刪得咁好, 有時度門直情會自動打開左添, 唔該哂你呀吳生!」
幾日之後, 下晝時份, 我收到學校打電話黎, 話志仔響學校突然發高燒, 校方要求我立刻到校帶志仔去睇醫生, 收線之後, 我急到即時就揸車去到學校度, 接左志仔之後, 跟住我再揸車就帶志仔去法國醫院度睇急症。
經檢查過後, 志仔証實係患左雙病毒感染, 而需要即時入院留醫同治療, 正幫志仔辦緊入院手續嘅時候, 我個電話響起, 係 Eliane 打黎比我, Eliane 好急咁問住我, 「吳生, 志仔佢而家點呀?」 我講左志仔嘅情況比 Eliane 知道之後, Eliane 跟住就話會趕黎法國醫院呢度搵我地。
辦好入院手續之後, 我陪住志仔上到病房, 跟住再無幾耐之後, Eliane 亦都已經趕到黎, 「吳生, 志仔點樣呀?」 見 Eliane 正一面擔心咁嘅樣, 我安慰住佢, 「應該唔會有大問題, 醫生話係關乎近排出面啲病毒傳染得太犀利, 所以好多小朋友都有呢種情況發生咁喎!」
Eliane 聽倒之後已經鬆左一口氣, 同 Eliane 兩個一齊響病房度陪住志仔, 響醫院叫飯食過之後, 跟住志仔居然同我講, 「爹啲, 陳老師都好攰架嘞, 你不如送陳老師番屋企先啦, 我自己一個人響度打機就得架嘞!」
陳老師啤住志仔黎講, 「喂, 邊個話比你打手機架, 而家你咁樣病左, 要早啲休息個人先會快啲好番架, 你仲係咁曳嘅, 一陣我就叫醫生入黎同你打針架!」
志仔好驚咁話, 「唔好呀陳老師, 我唔打機嘞, 至多我而家就瞓嘞!」 講完志仔就用張被懞住個頭黎咋瞓, 而我同 Eliane 兩個就正相視而笑住。
Eliane 睇黎都好似好攰咁, 所以我亦同佢講話揸車送佢番屋企先, 我知 Eliane 同佢媽媽暫時都仲係住響舊居果度, 但 Eliane 同我講, 話想先去新屋度執少少野, 跟住我就話陪佢上樓幫吓佢手。
上到 Eliane 間屋之後, 見已經有好多一袋二袋咁放左響個廳中間度, 但Eliane 就開始好似有啲唔自然咁, 「吳生, 隨便坐吖, 我….不如都係斟杯水比你先啦!」
Eliane 走左去斟水, 但等左一陣之後, Eliane 又急急腳響廚房度行番出黎, 「唔好意思呀吳生, 原來我啲水樽仲未裝水, 個熱水壺響邊呢? 等我摷佢出黎煲番啲水先!」 Eliane 開始好似亂哂籠咁。
我起身行去佢面前度講, 「唔使咁客氣架, 我睇妳今晚都好攰架嘞, 不如我都係車妳番屋企度早啲休息啦!」 Eliane 好似有啲唔想咁, 「我…..呀係嘞, 我仲要執吓啲野先, 我成日都話要上黎執野, 但就成日都比藉口自己懶唔肯開始去做野, 啲野一路搬黎就愈整愈多, 我真係…….」
但突然, 屋內所有燈光盡熄, 而門外走廊就響起有人問係唔係停電呀, 伸手不見五指, 但就感到有人正緊貼住我, 兩隻手臂已比人用力地按住, 我知 Eliane 覺得有啲驚, 我安慰住佢黎講, 「無事嘅, 可能係大廈跳 fuse 啫, 呢啲情況一般等一陣緊急維修過後就會有番電架嘞!」
Eliane 無出到聲, 但我就隱約聽倒佢響我面前嘅沉重呼吸聲響, 我條頸正感受到佢呼出黎嘅氣息, 漆黑環境之中, Eliane 已經將我愈拉愈緊, 愈貼愈埋。
Eliane 嘅雙胸經已正微微輕貼住我胸膛, 又輪到我開始覺得有啲緊張起黎, 呼出嘅氣息已經由我頸部上移到我下巴之處, 我知 Eliane 此刻正抬頭面向住我。
我亦開始逐漸緊張不已, 我知 Eliane 塊面就正近在我咫尺之處, 而我亦隱約望倒 Eliane 正在凝視住我, 手正斗膽開始輕攬住 Eliane 兩邊腰肢, 而突然一吓衝動就令我俯首輕吻住佢兩片柔軟紅唇。
輕吻過後, 我已經開始有啲意亂情迷, 靜左一陣之後, 漆黑之中有人突然就將我緊抱住起黎, 烈火似乎已經變成開始一發不可收拾。
