【校園】現實與平行時空的愛情故事: 第三十九章 – 一件影響一生的事-1 (轉變)

- 第三十九章 – 一件影響一生的事-1 (轉變)
 
人生中總會有唔少事件會令人有所改變。
 
生離死別往往最令人開心同傷心。
 
但中間過程中又有幾多人已經有所感受呢？
 
…………………分隔線…………………
 




中學畢業之後，我去左一間野雞大學讀酒店課程。
 
雖然唔係名牌大學，但係都有啲規模。
 
係市區都有大學既分校，唔洗去到好遠返學。
 
有一日，依然如常返學，朝早返八半，唔好彩遇到天地堂。
 
朝早上完堂都係10點，要起碼等到下午2點先有另一堂上。
 




我去左附近老麥坐低，拎起袋入面既NDS打機。
 
係我好專心打機既時候，有一個人拍一拍我既膊頭。
 
「先生先生，你跌左支筆呀！」佢指向地下。
 
我眼尾望左一望，真係有支筆係地下，但支筆唔係我。
 
之後我再望返果個人就已經唔見左。
 




我繼續打機。
 
唔知打到幾耐，打到攰，收機。
 
我望一望地下，醒起支筆仲係地下。
 
我見支筆冇人要就自己袋起佢。
 
呢支筆睇落好普通，同普遍既原子筆冇咩分別，於是就袋返係我個筆袋。
 
日復日，夜復夜。
 
繼續我返學既日子。
 
雖然沉悶既上堂，但係就有忙碌既日子。




 
不停做Assignment同Project。
 
放學不停做，不停做，做到連自己訓著左都唔知。
 
「喂！喂！」有把聲音好似叫緊我？
 
「喂！醒醒！」好似有人拍緊我膊頭。
 
「喂！！！」好大聲嚇醒左我。
 
我見到一個女仔，著住一條全身白色連身裙，手上拎住一支筆，一支好熟悉既筆，係我之前執到既果支筆。
 
「我係咪發緊夢呀？」我問
 




「你話呢？」女仔答
 
「呢到係邊到？」
 
「呢到係你既夢境，我就係比你救左既果支筆既筆仙」筆仙答。
 
「點解我會見到你既？」
 
「我地既然有緣遇到，就想問下你有冇啲事後悔但又想補救返？」
 
「有！有好多，想補救返同初戀女朋友既關係，唔想咁快就分手，我想同佢一生一世；想補救返同沛珩一齊既美好日子，唔想就咁就冇左；想補救返同阿飯既關係，唔想只係朋友，唔想佢去台灣而我同唔到佢係埋一齊。」
 
「嘩！你都幾貪心。不過我中意你誠實。拿！你望下我身後面。」筆仙身後有一條線，當中有唔少分支線，但好多都斷左，慢慢得返一條直線，又慢慢有好多分支線，不斷重複。「你見唔見到有一條直線同分支線，呢啲就係你既人生。當中有好多事發生係你身上，但你依然會係呢一條直線上面繼續你既人生，可能當中會有啲事影響左你，但你依然會根據你本身既人生去行。你想改變你既人生唔困難，只要你用我呢支筆畫落去，就可以有機會改變你既人生，但當中有咩風險，你要自己承受返！」
 
「知道！咁我係咪可以開始畫落去啦？」我問。




 
「拿！」筆仙將支筆比我。
 
我拎起支筆，望兩望，搵到屬於我同詠珩既時間線，我一畫，一道白光發出。
 
我醒左。
 
睇返時間，係同詠珩分手前既果一個暑假。
 
我真係返左黎呀！