【校園】現實與平行時空的愛情故事: 第四十章 – 一件影響一生的事-2 (改變)
- 第四十章 – 一件影響一生的事-2 (改變)
有時候，人係因為自己未盡力，當失去左時就後悔。
會怪責自己點解唔好好盡力去做好件事，好好對待其他人。
有人話「生命冇Take 2」
不過當真係有「Take 2」時，又係咪會再一次盡力做好呢？
…………………分隔線…………………
我返左黎當年同詠珩分手前既果一個暑假，一個影響好大既暑假。
我仲記得呢一個暑假，我不停排練舞台劇同表演，但回想起，其實詠珩係睇唔到我所做既呢一切。
佢感覺到既就係我呢個男朋友陪唔到佢，所以我決定要離開舞台，專注係自己心愛既人。
係排練前一日，我打電話比梁Sir。
「梁Sir，今年我唔參加舞台劇啦。」
「下？點解呀？」
「我知自己想要啲咩，但當中要有取捨，所以我唯有離開舞台。」
「嗯。咁好啦，既然你決定好既，你就勇敢去做你想做既事啦！加油！」
「好！多謝！」
就係咁，我離開左舞台。
上一次因為排練舞台劇而好少時間陪詠珩，今次就有成個暑假陪佢，一定可以行到落去！
好快我就約左詠珩去街，陪佢做佢想做既野，係旺角掃街食野，行下化妝品店，偷偷地去機鋪打機，大家拖住手行街。
有一日，我同佢約左係佢屋企附近既快餐店做暑期功課。
突然佢問我「楓呀，你暑假唔係有舞台劇要排練咩？」
「係呀！不過我唔想因為舞台劇而失去左同你相處既時光。當我要排練既時候就需要好多時間投放落去，慢慢就會失去左同你一齊相處既日子。我希望我每一分一秒都有你陪我係身邊，冇野比你更重要。」
「傻豬。我知你愛我，但我都想你開心，我知你會平衡到，你去做你想做既事啦！」佢帶住微笑咁講，真係好甜。
於是，我諗到一個方法，既唔洗投放太多時間落去舞台劇，又可以有份參與舞台劇，就係做入台後既後台工作人員，只係需要入台果三日先需要幫手，其餘時間可以繼續同詠珩拍拖。當然我都有同佢講過果三日我陪唔到佢，佢都表示理解。
呢個暑假，我地幾乎日日見，每一日都係附近快餐店做暑期功課，間唔中就會出下街。到夜晚，佢要返屋企食飯，食完飯又會同佢傾下電話，有時傾傾下我地大家都會訓著左，到醒左先知原來大家都訓左，cut線之後繼續訓。
有時候，詠珩會話我知佢屋企冇人，會叫我偷偷地上佢屋企，一齊做功課同玩電腦。我介紹左一隻網頁遊戲比佢試玩。佢本身唔係一個中意玩遊戲既人，但就係中意用腦，所以呢個策略性網頁遊戲就吸引到佢玩。我地之間慢慢又多左一樣野溝通，玩遊戲。
有一晚，我地傾傾下電話，佢話「下年我地唔同班啦，我A班，你B班。」
「唔緊要啦！隔離班好近，我可以小息過黎搵你，而且我地都係揀左物理，到時咪可以一齊上堂囉。」
「又比機會你成日偷望我啦！」
「係呀！我最中意就係望住你上堂。時間會過得快好多。」
日復日，夜復夜，好快就過左個暑假。
-中四-
我照舊如常陪佢返學放學，返學會係佢屋企樓下坐係到等佢，每一日望住佢行過黎都覺得好開心，可能曾經失去過，依加重新擁有就會更加珍惜。
佢好百厭，有時佢會靜靜雞係第二條路走過，諗住扮見我唔到，我就會靜靜雞係後面跟住佢，然後係後面一下抱住佢。係返學呢條路，穿過商場之前，我地會拖住手行，過左商場之後就已經到返學果一條路，我地就會鬆開手。一黎避免比老師見到唔係咁好，二黎係佢屋企人未知道我地拍緊拖，佢唔想咁快比佢屋企人知道住。
佢家中有父母同一個家姐，個家姐大我地一年，讀同一間中學，所以好容易比佢家姐見到。
佢同佢家姐關係唔係話好親密，只係好一般既姊妹關係，佢有講過佢地細個會親密啲，但唔知因咩事而關係疏離，可能係人大左，社交圈子唔同左，會同其他朋友玩。
我仲好記得佢同我講過佢家姐為佢作左首歌，係改編自「有隻雀仔跌落水」。
「有個阿妹跌落水，我撈起佢，佢話我衰。有個阿妹跌落水，被水，沖去」
有時我會係到諗，我都冇同屋企人講我拍緊拖，我同詠珩應該幾時要比屋企人知道我地拍緊拖呢？又幾時要見家長呢？唔知。
或者我地暫時仲係一個學生，應該做既事就係讀好書，畢業先再算。
岩岩升上中四，同詠珩分左班有啲唔習慣。同班有好多新面孔，女同學比較多啲。不過其實我一早已經識得佢地，係佢地唔熟我姐。
好快去到我生日果日，上一次因為呢一日而分手，我唔想再因為呢一日而分手。
呢一日，我冇覺得好攰，只係一直好期待，我同詠珩講好左放學後去沙田行街，暑假期間我地都成日去果到。新城市廣場上面有個平台花園，果到有兩張類似鞦韆既凳可以搖住黎坐，我地好中意坐係果到Hea，好舒服。
去到放學，我係佢班房等埋佢放學，然後一齊去沙田。
佢係班房出黎面帶笑容，我好中意佢笑，笑得特別靚。
然後我地一齊行出學校。去到巴士站，我地就拖住手，好甜蜜咁拖住手。
係巴士上面，我地好快就坐低左，亦好快就一齊訓著左。
冇幾耐就好快去到沙田。
我地冇目的咁周圍行下，行下服裝鋪，化妝品鋪，行下史露比樂園。
我見到有唔少小朋友係到玩，我就諗起，如果將來可以同詠珩結婚生小朋友就好啦。
突然佢就問我「你中唔中意小朋友？」
「嗯？中意呀！你呢？」
「我都中意。」
「將來我地生幾多個好呀？」
「邊個話同你生呀？」佢扮嬲咁轉個面。
「兩個？三個？」
佢依然扮嬲。
「你唔係想生隊足球隊呀？」我偷笑。
「唔睬你呀！」佢都偷笑。
之後我地去左平台花園果到坐。
坐左係個鞦韆到，拖住手，佢將個頭放左係我膊頭到，靜靜地感受下二人世界。
好舒服，好寧靜。慢慢等到天色慢慢由藍天白雲變成微紫金黃色天空。
我知佢天黑就要返屋企，所以我諗起身走。佢拖住我拉返我坐低。
「我想係到坐多一陣。」佢對眼水汪汪咁望住我講。
「好啦。」
「我有樣野送比你。」佢打開書包，打算拎啲野出黎。
「你合埋眼先。」
我點頭，合埋眼。
「你摸下，估下係咩黎？」詠珩比左一樣野我。
摸摸下，有個膠杯裝住一個公仔既野。我就知道呢個係佢自己整既一份禮物黎。
「咩黎嫁？」
「你打開眼睇下。」
我打開眼之後，果然真係我上次收到佢果份遲黎既生日禮物。
「咁得意既？你整嫁？」
「係呀！中唔中意呀？」
「中意呀！多謝你！」
「你生日呀嗎。最緊要你中意。」佢微笑咁講。
「其實有你陪我已經好足夠。我想以後每一年既今日都有你陪我過。」
佢微笑黎回應我。
最後，我地影左一張合照就返屋企。呢一張合照我會好好保存，作為我電腦同電話既背景相。
希望我同詠珩真係可以開開心心一齊落去。