可能新年就近,政府收爐,啲人有holiday mood,所以少咗人監視,今日又有時間同大家update。

我潛入軍隊扮士兵嘅策略好成功,無人發現到我。喺凌晨3點,正常人都瞓到豬咁嘅時候,我哋九龍新界聯軍兵分兩路,東軍喺清水灣登船攻入香港島嘅小西灣,西軍喺荔枝角登船攻入香港島嘅薄扶林,再兩面夾攻直攻中環曾蔭權港督嘅官邸,即使香港島有人放哨,佢哋都無估到我哋會兜咁遠水路攻過去,所以到佢哋發現時,我哋已經登哂陸,雖然中間有零星反抗,但都好輕易解決。

而我所在嘅西軍喺薄扶林登陸,我登陸之後亦都隨軍繼續攻入中環,而無自己1個去香港仔隧道,因為直覺話我知港英政權會掌握到1啲資料,而呢啲資料絕對有助我返到去自己世界,所以呢仗非勝不可。

我哋由薄扶林攻上去西環,好明顯西環嘅防備係強咗,戰事陷入膠著狀態,敵軍嘅補給源源不絕,拖長嚟打對我哋絕對不利,加上佢哋嘅武器比我哋先進新式,唔速戰速決,我哋嘅勝算係無限接近0。

不過呢啲情況其實一早已經係預計之事,指揮住呢面軍隊嘅大帥係斌哥,係老死就好說話。我慢慢退到佢身邊,然後同佢講我諗到嘅方法,佢發現嗰個係我,就好願意接受我嘅意見。





「雖然佢哋嘅軍備係先進啲,但始終都唔係全自動,啲大炮每次發射完要隔大約10秒先可以有第2砲,而為咗彌補呢個空檔,佢哋將啲炮台分三組射擊,只要我哋睇準時機,破壞其中1組,咁其餘兩組就唔難解決。另外啲大炮射程有限制,自身3米內射唔到,佢哋啲步槍機槍就係彌補呢個缺點,所以瘋狂掃穿,要想接近就必先清除咗佢哋先,我提議揾1隊準嘅射手遠距離狙擊佢哋,當然唔係射普通箭咁簡單,而係射綁住炸彈嘅箭,落地爆炸,等佢哋驚,我哋就乘機進軍令佢哋失哂分吋,然後一舉殲滅。」

「好,傳令落去,立即組織1隊20個人嘅狙擊小隊,喺附近高地進行狙擊。」

「但唔好咁快射住,要再揾多1隊人上山埋伏,因為我哋呢大隊要扮撤退,引佢哋嚟追擊我哋,等佢嚟到呢個位再用落石,咁先可以殺佢一個措手不及,然後弓箭手見到呢個signal,立即狙擊佢哋嘅槍手。」

於是我哋開始撤退,不出所料嘅係對方立即追擊,當佢哋追擊部隊去到啱啱我哋駐軍嘅地方時,喺高地埋伏嘅小隊立刻用落石壓佢哋,我哋大軍立即轉頭再攻,而弓箭手亦同時向敵軍射炸彈,頓時佢哋亂作一團,斌哥見勢命1隊騎兵隊去將炮手清理,轉眼間,香港島嘅守軍便潰不成軍,落荒而逃,而我哋都將繳獲到嘅軍備據為己有,雖然唔係全部都識用,但總比冷兵器好。

攻陷西環之後,我哋就進軍上環,不過上環出奇地易平定,基本上無咩阻礙,敵軍數量唔多,一下子就攻陷,揮軍直接香港島權力中心中環,而根據作戰計劃,我哋要等埋東軍先一齊圍攻中環,因為咁嘅勝算最高。





等咗大約兩個鐘,終於收到東軍嘅訊號,於是我哋兩軍同時圍攻中環,作為權力核心,重兵駐守,頑強反抗,寧死不屈係正常,但如果係得老弱殘兵,貪生怕死,舉手投降又係咩玩法?中環莫非只係一個虛有其表嘅空城?

無錯,眼前事實話我哋知,中環真係一個空城,不過係一個空城計,當我哋發覺有唔妥嘅時候,我哋已經被香港島大軍團團圍住,佢哋二話不說一嚟就殺,唔單止外部被圍攻,唔知幾時軍隊內部都開始有內奸,1時之間我哋聯軍腹背受敵,分唔到敵我,由朝打到晚,血流成河,鮮血令維多利亞港都染成淡淡嘅紅色,嗰陣血嘅鐵銹味到而家我都仲揮之不去,我哋大軍起碼無咗3分2人先勉強殺得出重圍,但係仲未完,後面不斷有追兵,我哋靠住夜晚天色黑暗,跑上太平山躲避先僥倖逃脫,但係我哋已經返唔到去,因為我哋嘅船已經被俘獲,而我哋呢隊等到天光都會畀人搜出嚟,根本只係等死,唯一嘅方法係奇蹟發生,不過哪有奇蹟?

時間一分一秒咁過去,東面嘅天空泛起魚肚白嘅光芒,我哋受疲累困擾徹夜未眠,打算豁出去光榮戰死,當然我唔想喇,但都無辦法。

「嘭!嘭!嘭!」、「bomb!」遠處傳嚟轟炸同爆炸聲,香港島4處都烽煙四起,維多利亞港上面多艘3桅戰艦互相炮轟,同時香港島周圍都被戰艦轟炸,睇嚟奇蹟發生,九龍皇帝曾灶財同鄉議局主席劉皇發都親自出征救我哋,面對兩國全力進攻,港督曾蔭權縱然顯得疲於奔命,但仍勉強能應付,畢竟兵力懸殊,要不是有先進武器,恐怕一早已經被擊敗。

「呢個時候,我哋係時候出手,為港英政權補上最後嗰刀喇!」





「好!我哋殺呀!」、「衝呀!」我哋一伙人嘅士氣大振,之前嘅疲累一掃而空,直搗黃龍,攻入中環政府山嘅禮賓府,期間遇神殺神,遇佛殺佛,氣勢如虹,好快已經佔領禮賓府,但就係唔見曾蔭權蹤影。

於是我哋順手攻打埋隔離嘅政府總部,呢度就有比較多兵駐守,花咗我哋唔少時間先攻入門口,由兵力嚟睇,港督曾蔭權應該係度。我哋逐層逐層咁洗樓,將香港島軍隊殘黨逐一清除,到最後終於揾到曾蔭權,我哋將佢生擒,直接宣告呢場戰爭以我哋聯軍嘅勝利作結束。