嗰晚我喺香港仔隧道穿越咗: 調查

新年快樂，身體健康！完咗新年又係時候要update，好多讀者pm我話想知道成件事係點，我都希望可以完整講哂成件事，希望得啦。

上次講到生擒咗港督曾蔭權，因為我係唔可以喺九龍皇帝曾灶財面前現身，所以要趁佢未到之前快啲問咗我想知嘅嘢。

「你同英國喺度做啲咩秘密實驗？」

「實驗？我哋無做任何實驗。」

「無？唔駛呃我，如果無，我又點會無喇喇嚟咗呢度？」





聽到我講呢句，唔單止曾港督，就連同我一齊作戰嘅小部隊成員都覺得好奇怪，個個Nick Young上身，黑人問號。

「我完全唔知你講乜，我只係知英國要我守住呢度，作為踏板，等佢哋可以進入同監視中國。」

「真係咁簡單？定係有啲秘密收埋咗唔講你知？」

「一定唔會！我係英國一分子，唔會有嘢瞞我！」

「好一隻忠誠的狗，但係佢哋係唔會感激你，你而家只係棄子！你有無啲咩秘密文件收埋？快啲拎出嚟！」





「秘密文件？有我都唔會畀你。」

時間1分1秒咁過，曾皇帝好快就會嚟到，我無時間再同佢消耗，於是拎起把刀仔隊住佢條頸，再慢慢重複一次：「秘密文件，拎出嚟！」

「唔駛嚇我，我有咩大場面未見過？我嚇大嘅！」

聽到呢句我火更大，竟然當我契弟？用刀尖淺淺咁吉咗入去佢條頸度，滾燙嘅紅色液體沿住刀鋒滴落地下。

「唔好殺我，我真係唔知咩秘密文件。」曾港督開始慌亂，而其他人都走上前制止我。





我將把刀仔狠狠擲落地下，轉身就走，行到門口醒起備戰時香港島軍隊只騷擾尖沙咀同紅磡海岸但唔登陸嘅事，於是就問：「之前點解只騷擾尖沙咀同紅磡而唔攻埋入嚟？」

「哈哈哈哈！」笑而不語係一個好乞我憎嘅答案，我都無耐性再同佢傾。

「反正你已經係階下囚，我哋聯軍一定會審到你講。」於是我就向黃竹坑出發，不過先去銅鑼灣，因為無地圖同gps，完全唔知點行過去，唯有用之前零碎記憶。

中環行去銅鑼灣用咗大約個半鐘，因為沿途要避開新界九龍聯軍，而且山路居多，時間自然增加。去到銅鑼灣，補充一吓體力之後，就向黃竹坑方向行去，我要去返我醒嘅地方調查。

憑住殘餘嘅記憶同直覺，喺山上揾咗幾個鐘，終於到咗我覺得係我醒嘅地方，個個山頭同花草樹木都差唔多，老實講，我都唔知有無去錯地方。我喺度仔細尋找任何蛛絲馬跡，但係都無任何發現。

可能我去錯地方，不過我印象入面，4圍嘅景色係咁上下，於是我繼續喺呢個山頭調查，前前後後調查咗3個鐘，咩線索都揾唔到，我好洩氣咁瞓咗喺草地休息，望住個漸變深藍嘅天空，睇嚟只好認命，我側身瞓抱住成個人瑟縮一團，眼淚不受控制咁流出嚟。

通常電視劇主角喺呢啲時候就會發現到啲之前發現唔到嘅嘢然後劇情大逆轉，但可惜事實係唔會有啲咁戲劇性嘅事出現，我就係咁唔覺意瞓著咗。

人腦係人體入面一個好神奇嘅部分，有時清醒時係無咩用，但就會喺夢入面幫你解決好多問題，而我嗰晚都發咗一個夢，夢入面個山同我嗰時個山有啲唔同，但4圍啲環境都係差唔多，而嗰個山特別嘅地方係啲花草樹木都有好整齊非天然嘅切口，而中心點仲係寸草不生，非常奇怪，當我想行過去睇清楚啲時，就1腳踏空跌咗去1個無重空間，然後我就嚇醒咗。





天色都仲係好昏暗，但嗰個夢令我無辦法再入睡，於是我就靠月亮光動身前往夢中嘅地方。

原來個山只係距離我5分鐘路程，而嗰度就係我車禍醒返嘅地方，4圍嘅環境同我夢中基乎一模一樣，分別只係啲花草樹木高咗。我係度4圍查看，發覺直徑兩米範圍內嘅所有植物都有整齊切口，就好似係嗰個空間嘅嘢消失咗咁，附近除咗呢個地方之外，都無其他地方係咁。而中間寸草不生嘅土地嘅質感同其他又明顯唔同，係比較軟。

綜合咁多證據，我推斷嗰度係出入口，但呢個出入口點開啟就完全未有頭緒，憑住呢啲資訊，夠唔夠同九龍皇帝贖罪呢？又或者帶佢嚟望一望會好啲。

於是乎我係沿路做標記，然後就直接去揾曾皇帝報告我嘅發現。