冷不提防,我跑到到走廊盡頭轉角之時,對方竟然真係企左係到冇走到。 
我呯一聲就撞左埋去對方到,兩個一齊跌左係地。 
嗯,好似軟綿綿咁既。 

我一抬頭,居然係一個女仔。 
好熟面口,我係邊到見過佢呢? 
我見佢冇走既意圖,就企番起身,拍拍身上既塵,然後出示我既警員證。 

“警察,小姐麻煩你身份證。你係到鬼鬼鼠鼠做咩呀?” 





對方乖乖咁遞上身份證,呂芷晴。 
我突然記起,原來佢就係個日採訪藏屍案個個記者,唔怪得咁熟面口啦。 
要形容佢既話,佢絕對係真人靚過上鏡。 
雖然化上淡淡妝容,但掩蓋唔住佢青澀既味道。 
瓜子口臉,水汪汪既眼睛,完美既笑容, 
不失為做主播既好材料。 
如果要彈既,佢只係一個扮大人既細路,完全冇成熟既味道。 

“呀SIR,我係記者黎架,我打算係到做資料搜集咋。” 
呂芷晴伸伸脷,似足一個做錯事俾人發現既小朋友。 





“咁點解我叫你就走呀?”我見佢係記者,語氣稍為放鬆。 

“我岩岩跌左野落樓梯,咪跑落去執番囉。 
跟住我就聽到你叫我唔好走,我咪行番上黎唔走囉。” 

我哭笑不得,居然係咁。 
呢個小朋友,有趣有趣。 
不過作為一個差人,基本上對記者係要退避三舍。 
你都唔想你講既野,第二日上左報紙或者新聞架? 





“下次小心D喇。做資料搜集就唔好咁鬼鬼鼠鼠啦。” 
我向電台查詢完呂芷晴既資料,就俾番身份證佢。 

正當我想轉身離去,呂芷晴卻突然開口。 
“係呢呀SIR,我岩岩見到你係個單位出黎,你係咪黎調查琴日個單藏屍案架?” 
果然係記者,少少線索都唔放過。
已有 0 人追稿