[專員≠Hugo] 我係溫文樂，奉命調查一宗垃圾站藏屍案: 七

"無可奉告。"我以官腔回應佢。 
我亦唔想呢單關乎Candy清白既案件會引起太多人注意。 

"唔係呀呀SIR，你一定問到D咩既！公眾有知情權架！" 芷晴居然想問到底。 

"單案仲調查緊，我真係冇野可以同你講呀記者小姐。"我皺皺眉，覺得佢好煩。 

"咁呀…我張卡片呀呀SIR！你有咩消息就話我聽丫！即call即到！" 
我望望卡片上既資料。 





呂芷晴，香港電視實習記者。 

我揮揮手，打發呢個麻煩既女記者。 
點知佢成碌木咁企係到，完全冇走既意圖。 

"呀SIR咁你電話呢？你唔俾我我點搵你呀？" 
我對住呢個小女孩竟然冇哂辦法，我俾左個電話佢之後就趕佢走。 
唔係，正確黎講，係我俾佢趕走。因為佢要訪問個個婆婆喎。 

某程度上，記者係我地天敵，睇黎我要小心D先得。 




呢個時候，呀燊打番俾我。 

“樂仔？喂我幫你查左佢老公喇，身家都幾清白，不過你番黎再講啦。” 

鏡頭一轉，東九龍總區總部。 

“點呀呀燊，有乜資料？” 我拍拍呀燊膊頭。 

“許家富，普通商人，從事出入口貿易既生意。 
雖然唔係大富大貴，不過都算有少少錢。 




冇案底，初步顯示兩口子一直非常恩愛，最近亦冇同人結怨。 
除左係早兩月，佢地曾經因為嗌大交而報警，列作普通家庭糾紛處理。 
問番相關既伙記，聽講許家富懷疑死者出面有第三者， 
仲因為咁郁手打過死者，不過因為死者當時唔追究，所以就冇左件事。” 

冇可能，Candy有第三者？我同佢拍拖咁耐，我好清楚佢為人。 
許家富…呢個人，相當有嫌疑。睇黎我要去拜訪下佢。