[專員≠Hugo] 我係溫文樂，奉命調查一宗垃圾站藏屍案: 三十七

呀健同芷晴步入左一間餐廳， 
正當我想跟埋入去既時候， 
我俾門口個女侍應截住左。 

"先生，請問幾多位？" 

為左可以以便監察， 
我特別要要求坐係呀健佢地附近。 

同一時間，我決定打俾芷晴。 




雖然我掙扎緊相唔相信芷晴， 
但見到呀健呢隻大色狼係佢身邊， 
我就點都唔安心。 

"芷晴，你係邊到？" 

"我做緊野呀，遲D打俾你。"芷晴草草就收左我線。 

可惡！究竟芷晴點解會同呀健一齊？ 
咪住...唔通...芷晴都查到呀健有問題？ 




但係佢又點解可以埋到呀健身呢？ 

呢個時候，我見到呀健係芷晴耳邊細聲講大聲笑， 
我真係睇唔到落去喇。 
我決定離開，今晚先再問清楚啦。 
=========================================================== 
一個人獨坐家中既我，顯然有少少頹廢。 
雖然我好想相信芷晴， 
不過卻不停胡思亂想。 
原來我好怕芷晴會捨我而去， 




原來我既心早已經俾佢霸佔左。 

等下就一個鐘，等下又一個鐘， 
零晨兩點，芷晴居然仲未番黎。 
我亦抵擋唔住睡魔既呼喚， 
係梳化訓著左，連電視都冇熄到。 
=========================================================== 
第二日中午，我俾一個電話嘈醒。 
打黎既係呀燊。 

"樂仔你仲訓緊？！出左事呀！ 
你快D開電視啦！"隔住電話，我都聽得出呀燊既驚恐。 

我仲未意識到發生緊咩事， 
恰巧電視正正播放緊新聞既片刻。 





"琴晚零晨，一名女子被發現倒臥係慈雲山， 
送院搶救後不治。"女主播字正腔圓咁報導緊。 

我呆呆咁坐左係到， 
"送院搶救後不治"呢七個字則不停係我腦海出現。