【懸疑】《連登連環殺人事件》: —-第二章—- 1.
「唉啊，你地終於返嚟拿？」
升降機門甫開，影姨已經在重案部門前的走廊等著子熹幾人，她見到他們後焦急踉蹌的跑去。
「我就快要癲喇，救命啊......」影姨似是熱鍋上的螞蟻。
芊芊握著她顫抖的手：「冷靜啲先影姨，有事慢慢講。」
「噢...」她嘗試調整紊亂的呼吸。
「搜查令果邊搞唔點咩？」胡文軒問。
「我已經向相關部門申請左，而家審批緊，我地等多陣應該會有回覆。」
「咁你做咩仲咁心急咁既？」
影姨發瘋了的喊：「因為嚟左個肥婆啊！」
「下？」
「二百鎊，煩過金剛經既大肥婆，佢死都唔肯走啊！」
幾人莫名奇妙的對視一眼。
「佢而家喺邊？」
「坐左喺你個位啊，呀胡Sir！」
他們連忙過去瞧看是怎麼一會事。轉進辦公室一刻，映入眼簾的是鼓漲的橙色特大氣球。揉揉眼睛，才發現那是個穿著橙衣服的胖女人。
MK晴站在她的身旁服侍著她，那胖女人不段大吵大鬥，一邊埋怨辦公室空氣污濁，一邊要求要有零食給她吃。子熹從日本買回來放在公司的燒餅已經被她清光了，地上散滿包裝紙和餅屑。
「嘩，係你地啊！」MK晴仿佛找到了救贖，退回子熹身後。
胡文軒的位子被弄得一片狼藉，文件翻得亂作一團，就連他心愛的煙灰缸也被當成垃圾桶放包裝紙。他額現青筋，眼睛狠狠瞪去胖女人。
「呢舊肥野坐左我個位，仲要整到咁污糟......」
「胡Sir，我馬上去叫保安趕走佢，等佢唔好阻住我地做野。」康仔說。
但MK晴伸手攔著康仔，搖搖頭說：「唔得啊，唔可以趕走佢。」
「下？點解啊？」
「因為......」
「因為你地既職責係需要全力保護我囉。」
胖女人以不可一世的態度開口插嘴說，她的聲線高尖得刺耳。眾人聽罷皆是愕然。
康仔和胡文軒不禁失笑。
「保護你？無啦啦做咩要保護你？仲有啊，點睇你都好安全喎。」
「你咁既款，保護番我地都仲得啵。」
她聽著不悅，隨即拿出手機，開出討論區頁面按進「傷心小棧」的帖子，再向幾人展視畫面內容。
——————————————-
#7肥媽公主
（細字）「小妹厭倦左生活喇，成日都遇上壞男人，如果可以一死亦無妨。」
厭倦左？咁有無厭倦埋右？
——————————————-
「留名既呢個用户就係我，我會係兇手之後既目標，所以我報左警要求全天候24小時保護。當時個警察話呢間案係重案組跟開，咁我咪過嚟囉。仲有，我個名叫做阿宜，唔係肥野。」她彆扭的說。
眾人看過手機屏幕後一臉困惑。
子熹指左屏幕，納悶的在影姨耳畔嘀咕。「點解我唔明佢寫啲乜？咩係「厭倦右」？」
影姨輕聲答道：「我諗...因為有左就有右掛。」
「呢啲叫做幽默。」阿宜豎起耳朵聽到他們的話，神氣的說：「討論區啲人不知覺得我幾有趣。」
「你咁有趣，個殺人犯點敢殺你啊？」康仔調侃。
「個殺人犯傻架嘛！你有無常識架？之前果幾個留名既好多都出現不測，我而家生命受到好大威脅啊！」阿宜大罵。
胡文軒對於阿宜的態度大為不滿，皮膚上多了不少激動而成的坑紋，他踏步上前，跟阿宜對質。
「所以你就覺得我地一定要保護你？」
「當然啦，呢個就係你地警察要做既野。」
「你會唔會將所有野睇得太理所當然呢，呢位阿宜小姐？」
阿宜見他一直駁斥著她，五官扭曲起來，說話變得不客氣：「你地警察嚟架咋，叫你做就做啦。連登個個都話你地係狗架咋，狗啊！」
「哈！」胡文軒目瞪口歪，差不多把近日的煩躁一古腦兒爆發出來：「你當我地重案組警察係咩呀？私人保鏢？我地既職責係破案同捉兇手出嚟，就算明知兇手下個會殺既人係你，都唔代表我地要卑躬屈膝保護你呀，明未啊！」
他震怒的一段話，令全場頓時靜下來，只剩下呼吸聲。
阿宜的嘴巴張得大大的，表情中可見她滿腔怒火。她沒有繼續跟胡文軒爭持下去，卻低下頭來專注在手機上，快速的按動屏幕，不時瞪胡文軒幾眼。
「你做咩啊你？」胡文軒對她怪異的行為感到有些不安。
她沒有回應。
「我問你啊！你做乜啊你？」
「擺你地上連登，公審你地啊！」阿宜吆喝，那兩顆金魚眼睛撐大得快要掉下來。
阿宜雙手手指頭就似打字機一般，沒有停頓過，唇上喃喃讀著文字：「重案組警察自私自利，捉唔到連環殺人犯，就將怨氣擺落受害者一方。重案組一個扮哂係隊長既老野，係咁噴口水亂罵人，把口仲要成陣臭煙味，暗戀我想溝我又唔認......」
「喂，你唔好亂講野好喎！」胡文軒撲上去，意圖搶奪手機。
「非禮啊！！」阿宜大呼，把龐大的身軀背向他保護著手機。
兩人在胡文軒的位子旁邊拉拉扯扯，桌子上的相架東歪西倒，電腦椅也被撞翻地上，其他人勢色不對，馬上過去分開他們。
「停手啦胡Sir，比人睇到唔好啊。」
「由佢出post啦，呢啲人中意講咩就由佢啦。」
胡文軒氣喘喘的吐出一句：「佢而家含血噴人啊，屈我地重案組啊，點可以由得佢啊？」
阿宜趁子熹等人抓住胡文軒時，從空隙逃出來退得遠遠的，她臉上泛著層層油光，汗流浹背：「痴線架，都唔知係咪黑警嚟，我唔要你地保護喇，你地仲惡過殺人犯。」
「係你喺度挑戰我地底線在先。」胡文軒整理一下衣衫鈕扣。
阿宜擺動身子，打算離開之際，門方卻傳來一浪笑聲。
「啊哈哈哈哈哈哈......」
眾人把注意力放到大門，只見三位身穿深綠色西裝的男人走進重案組範圍。
走在最前的男子手上握著蘋果，徐徐的咬了一口蘋果，滿足的晃晃頭。
影姨心頭一顫：「係隔離重案B組個高級警司「蘋果陳」。」
蘋果陳掃視了阿宜幾眼，然後露出牙齒的笑了，他有一隻門牙是金牙，房燈照射底下格外閃爍。
「肥妹仔，唔駛急住走喎，我啱啱喺出面聽到哂你地既對話喇。保護你呢個咁緊要既責任，當然要交比重案組啦。」
「下，你係邊個？我唔要你地保護啊，我要走啊。」阿宜打算步出門口，卻被其餘兩個西裝男擋住。
「你走左去，之後會好危險架。或者......留喺度食啲野先？」
蘋果陳向西裝男揚揚手，他們拿出了好幾個蘋果出來給阿宜。阿宜見有蘋果吃，離開的意慾隨即減退。
他處理好阿宜後，一步步的邁近聚人，芊芊目測他約六十歲，不遠已經嗅到濃烈的古龍水味道，蘋果陳的眼眸銳利，直刺向胡Sir。
「胡Sir，乜咁失策啊？」
胡文軒瞪著蘋果陳，一聲不吭。
「呢個肥妹仔好需要你地架嘛，就咁樣趕人地走，咁樣好咩？」
「重案組做野唔駛你理，你顧掂你自己B組啲野先算啦。」
「嘩，好大口氣喎哈哈哈。」蘋果陳好像很滿意胡文軒的反應：「平時見你份人笑口噬噬，講野衰衰格格架啵，做咩呢排變得咁暴躁啊？莫非，係因為破唔到案？」
蘋果陳言語中帶含諷刺的腔調，臉依舊掛出笑容。
「都係果句，唔關你事。」胡文軒毫不客氣：「重案B組呢啲低級組別做咩過嚟我地重案組？我地呢度唔係隨便可以比閒雜人入嚟。」
「唔好咁見外啦，我地曾經都係戰友嚟架嘛，以前稱兄道弟架喎。」
「我地喺十年前就已經唔再係兄弟。」
「你仲記得果件事？唔係咁小氣下話。」蘋果陳像隻上了電的搖頭公仔般，左右扭著頭。
「都幾難唔記得架喎，比曾經最好既兄弟出賣......」
「拿，唔好用出賣呢個字。當時我只係覺得你未有能力勝任重案組既工作，如實地向當時既高級警司反映意見啫。睇下你而家，咪做左高級警司囉，幾威風！」
「我係靠自己既實力爬上嚟既，就算有你呢種小人，我都無怕過。」
蘋果陳咯咯的笑說：「好啦好啦，最叻係你。我地講翻今次件事先。你知啦，上頭好關注呢間case，仲特登揀比你地呢組去查。但係呢？遲遲都未查到，睇你地既情況，我諗連一個可以鎖定既疑兇都無。」
「你想講啲咩，唔好喺度轉彎抹角。」
「我想講。」蘋果陳拋拋手上的蘋果：「上頭交代，你地再唔努力少少，咁我地組既人就可以取代你地重案組。等你到時可以帶埋你無能既伙記跌落B組，甚至係C、D、E......」
「你特登過嚟就係提醒我地努力啲？」
「又唔係嘅。」蘋果陳奸煨的說：「我順便睇定我之後既工作環境啫。」
他再次咯咯的大笑。
這個蘋果陳果然是有預謀而來的，原來一心覬覦胡Sir的位置，子熹暗忖。
原本來了個麻煩的胖女人已經足夠心煩了，現在還禍不單行，恰巧讓蘋果陳發現了剛才的一切醜態，胡Sir這次確是騎虎難下。
「蘋果陳真係小人一個，次次喺我地有事既時候喺背後插我地幾刀。」影姨暗想。憂憂的看著胡文軒。
「你可以放心。」
胡文軒卻未有退縮，挺身走向蘋果陳，把胸膛貼到他前，以更高的身形優勢從上俯視他：「我會好好保護果個肥女人，兇手亦都會好快查到出嚟。而你，只會永遠都喺B組，永遠都係比我低既踏腳石。」
蘋果陳就似咬了一口辣椒，緊緊繃著臉盯著他。
胡文軒比蘋果陳階級要高，是不爭的事實。他強硬有力的說話，令蘋果陳無話可說。
「無咩事既話，唔該離開呢度，你阻住我地重案組做野。」
「好。」蘋果陳知道爭辯下去也沒意思，他冷笑：「我拭目以待。」
他回過頭，跟阿宜點點頭，然後步履輕快的帶著兩個隨行者離開。
「走啦，返去食你地既蘋果啦。」MK晴對他們吐唇頭做個鬼臉。
蘋果陳離開後，古龍水的味道慢慢消散。
胡文軒目送他們後，放鬆的坐在電腦椅子上，掏出菸叼在嘴上點火，吐出一團白煙。他的臉容疲憊無光。
他感到身體有點無力，果然是因為年齡大了吧，他想。
影姨見狀，前去為他按摩肩膊，他舒服的嘆口氣。
芊芊瞧向阿宜，她好像吃撐後睡意漲上心頭，坐在靠牆的壓克力椅上打盹。
辦公室緊張的氣氛漸漸緩和，一切回復正常。
「終於靜落嚟喇。」康仔雙臀舉高伸個懶腰。
MK晴乘機搔搔他的腰部，他嚇得彈了起來，MK晴說：「你既意思，即係話胡Sir頭先太嘈啫？」
康仔連忙說：「拿，唔好曲解我意思啊，我講緊係今日發生既所有事咋，胡Sir我無串你架。」
MK晴見康仔狼狽解話的樣子，不禁窺笑起來，康仔扯著她的金髮報復，兩人又開始打鬧起來。
「係喎，你地今日調查果邊既情況點啊？」影姨向子熹問道。
「一塌胡塗啊。」子熹自嘲的笑了笑：「兇手捉唔到，仲要多一個人遇害。不過，我地搵到啲關於兇手既線索。」
胡文軒忽然閃亮的眨眨的眼：「線索？快講。」
「兇手有好大機會係個女仔，年齡同芊芊應該差唔多，大約二十幾三十歲。個女仔今次偷走左受害者既電腦，而受害人原來係個電腦天才，我懷疑因為佢知道左啲關於兇手既秘密，將啲證據記錄左落電腦度。」
「後生女仔啊。」胡文軒歪歪頭：「你地調查既過程入面，有無見過有類似既可疑人物？」
子熹的腦海突然閃過束馬尾的女孩的臉，她是「祖信有限公司」的其中一個員工。
「無......無咩印象。」他回答。
胡文軒咬咬指尖，皺皺眉頭。此刻要處理的事情甚多，想要一步登天的破案是不可能的事，大概需要好好分配工作，才能逐步找出更多線索吧。
過了一會，他想通了什麼似的點頭。
「決定好喇，一於分三組。」
「分三組？」眾人望向胡文軒。
他先指著子熹：「首先，我同子熹一組負責搵出兇手，我地等搜查令一出之後，過去「祖信有限公司」要求佢地交出所有資料。」
「好。」
他扭動脖子，望望後方替他按摩的影姨：「影姨同MK晴負責幕後支援，資料上既野就交比你地，討論區上面每個關於呢件事既post都研究下有冇可疑用戶，有既就馬上向我匯報。」
「知道。」影姨和MK晴齊聲應道。
「最後...」
胡文軒瞧向康仔和芊芊咧嘴奸笑：「你地負責全天侯二十四小時保護個肥婆，唔好比佢有任何閃失。」
「點解係我！我最怕肥膩野架......」康仔仰天大喊，幾乎要哭出來。
芊芊扁嘴的看看阿宜，垂頭不語，阿宜還是睡死一般。她顯然也不喜歡這個安排，但沒有反映出來。
胡文軒望著睡得像死豬一般的阿宜，無奈的苦笑：「無辦法啦，始終要有人睇住佢，最多案件完哂之後，我請你地食番餐飯啦。」
「三餐，再加兩包煙。」康仔討價還價說。
「殺你。」
康仔雖說是妥協了，但他深深知道這是項不討好的工作，認為這樣比起調查兇手要麻煩多了。二十四小時保護目標是極度累人的事，對象這次還要是有嚴重公主病的阿宜......單單想到之後幾天的景象，康仔已經苦惱得要瘋了。
確切地感受到他痛苦的人，大概只有芊芊了。
「各位，聽我講幾句。」
影姨拍拍手取得聚人注意，語重心長的說：「雖然我唔係一個好識講鼓勵說話既人，但係我都跟左胡Sir做事有幾十年，見證過唔少風風雨雨。依我睇，今次算係其中一次最難既case，而且關乎到我地重案組既生死存亡。呢場仗，我地只許成功不許失敗，我希望大家可以全力以赴，快啲破案！」
「好！！」幾人以如雷貫耳的聲音回覆。
康仔說：「你最好快啲同我捉個犯出嚟啊子熹，等我唔駛繼續對住個肥女人！」
「嘩你咁講，搞到我捉到都唔想話你知喎。」
「係囉，肥女人幾襯你吖，反正你都係單身啫。」
「你講咩啊MK晴，你咪又係無人要！」
「你就無人要啊，係我眼角高咋。」
芊芊見眾人鼓舞起來，臉頰拉扯的笑了。她漫不經心的望向玻璃窗外，原來天色已換成黃昏過後的藍黑色，滿天也是波浪形的雲朵，月亮高高懸掛著。
漫長的戰役要開始了。