【懸疑】《連登連環殺人事件》: —-第四章—- 2.
「內鬼？」
「喂唔好玩啦MK晴......」康仔笑說。
「我好認真架。」MK晴凝重的說，她堅定的氣息讓康仔愣住了。
「懷疑自己人係一件好嚴重既事。」胡文軒鄭重的說：「如果你有證據既話請你攞出嚟，唔好順口開河。」
「胡Sir，我有證據。」
她掏出了電腦匙卡，在眼前揮了揮。
「你地個個都忽略左樣野，就係當時Safe House果道門之前已經set好左，只有我地重案組組員既人先可以開到，因為只有我地先擁有呢一張開到鎖既電腦匙卡。」
MK晴讓眾人看過匙卡後，收回褲袋裡續說：「試問喺煙霧瀰漫既時候，羅明亮又邊可能會偷得切條匙卡，然後再喺電光火石之際開門殺人？唯一解釋係，有自己人趁亂打開左道門，或者比左張匙卡羅明亮。」
聽到她的分析後，所有人也露出驚恐的表情，互相對望，屏著氣息。
原來內鬼一直就在身邊嗎？
MK晴果然是隻小辣椒，影姨注視著她，暗暗佩服。
MK晴微微揚起嘴角一笑，那是眾人也認同她的說法後所展出的表情。她說：「可惜由於Safe House並唔常用，所以依然係舊式門鎖，無辦法用電腦系統追查當時邊張卡打開道門。」
「既然係咁，就無必要再一直對自己人有所猜忌啦。」胡文軒建議：「我地應該由羅明亮既言論入手，再......」
「不過！」MK晴打斷了他的說話：「根據我既觀察，我大概知道內鬼係邊個。」
眾人哇然。
「內鬼就係......」
她把右手手指高舉，再仿效偵探小說金田一的指向盤問室大門方向。
「就係你啊，子熹。」
「我？」子熹愕然。
「唔好亂講喎！」芊芊站起來說：「子熹先唔係啲咁既人。」
「MK晴，你有咩證據先？」
MK晴踱步向前，佇足在眾人中央，以明朗的聲音說：「大家諗下，子熹攞住定位追蹤系統，跟左羅明亮咁耐都可以比佢成功闖入嚟Safe House。正常嚟講，佢入得總部就應該要捉住佢啦，我唔係想懷疑自己人，但係明知道佢好大機會落手，咁樣放佢入嚟會唔會太過分？」
「如果咁樣就將我定奪為內鬼，會唔會牽強左少少？」
「我只係按常理推斷。」
「我當時無捉住羅明亮，係因為我都懷疑佢有同黨，想等佢出現之後一網打盡。」
「但係你放佢入總部既做法實在好可疑！」
「係我叫佢咁做既！」胡文軒厲聲一喝：「咁我係咪就係果個內鬼？」
MK晴怔了怔，閉口不語。
康仔望向MK晴，她一臉忿忿不平。
她一向也視子熹如偶像般，為何這次會認定他是疑兇之一？
「未搞清楚羅明亮所講既野係咪屬實之前，唔該唔好喺度互相猜忌，影響重案組士氣。」
「同意。」影姨說：「過兩日兇手就會再搵下一個目標，到時我地就會知道羅明亮係咪就係殺人兇手。」
「即係又要死多個人？」MK晴虛笑一聲：「如果重案組既辦事方式係咁既話，我諗我唔係好適合喺呢一度。」
她擲下掛在胸前的員工證，氣沖沖的走向大門離開。
「砰！」關上門的聲音。
錄音室再次回歸寧靜，這種靜寂，強烈得叫人心緒不安。
眾人的心情經過一番討論以後，變得更沉重起來。
康仔拾起MK晴的員工證，握在手心裡，略有所思。
掛鐘的短銀針，冉冉的升至十一時。
胡文軒解散了各人，叮囑大家早點回家休息，說今天工作辛苦了。
他本人卻被警隊一哥召見，需要到會議室開緊急會議。
子熹、影姨、芊芊和康仔，四人並肩慢步離開總部。
煩悶的雨雲過了，冷風陣陣的吹過來，街道上的榕樹樹葉搖曳擺動。
橘色的街燈，柔和地亮起灰濠的夜空。抬頭望天，有一兩顆星星格外地閃爍。
「胡Sir今晚應該有排比人照肺喇......」影姨開口打破沉默。
康仔嘆氣說：「無辦法啦件事搞大左，個兇手仲要喺總部落手，擺明剃警隊眼眉，胡Sir孭硬呢個獲架喇。」
「唉，我替佢擔心咋。」
子熹垂頭，望著自己的步履說：「我感覺...我地呢Team人有機會解散。」
「點解咁諗？」康仔問。
「唔知啊...但係喺MK晴當時話有內鬼果一刻，我就冒出左呢個感覺。」
「子熹你唔好怪佢頭先咁樣啦。」芊芊說：「MK晴應該係想快啲查出真相，先至會誤會你係壞人。」
「傻啦。」子熹給芊芊一個溫婉舒適的笑容：「我當然明白啦。」
芊芊看著子熹，微笑頷首。
逕至十字路的分道口，四人收慢腳步停下來。
「我行呢邊啊。」
「我直行啊。」
「子熹呢？」
「我喺呢度搭車。」
「咁大家各自返去啦。」
「早啲休息啦大家。」
子熹向幾人揮揮手道別，便到一旁的巴士站等候。
車站冷冷清清的，風冷颼颼的吹拂在他的臉上，他放鬆的把腰背靠在欄杆。
獨自於車站等了約十分鐘左右，車便到了。他踏步上車，掏出八達通於車長旁邊的電子箱拍卡，發出清脆「嘟」的一聲。
巴士上層空無一人，子熹找了近車尾的左邊位置坐下。
折騰的一天，終於算是過了。
他嘗試不去憶想今天發生的每件事，他想把腦袋掏空，令自己可以不帶情感的放空。
不經覺間，車便到站了。他拖著疲憊的身軀和腦袋下車，慢步回家。
凌晨十二時，回家的街道上早已沒有人影，空蕩蕩的。
子熹慢花了五分鐘走到自己所住的屋苑大門，到達後他發現一個熟悉的女子正守候在門前。
女子低頭專注地滑動著手機，不時舔舔嘴唇，
烏溜溜的短髮，紅潤的雙唇，還有亮晶晶的眸子，子熹對她的出現感到驚訝。
「Carmen？」
Carmen抬頭，看見子熹後舒懷的一笑。
「終於返嚟嗱？」
「你一直等緊我？」
「係啊！」Carmen忽然抓著他的手肘：「帶我上你屋企。」
「下，你想做咩？」
「我想傾一傾單case，想知道今日發生左咩事。」
「你做咩咁想查清楚呢件事？」子熹納悶。
「因為我作為連登admin，好想搵出真相囉。」
「咁點解係揀同我一個傾？」
「因為我上次同你天台傾過後，覺得你信得過。」
子熹注視著Carmen，她真誠的態度刻在臉上。
「我喺度等左兩個鐘喇，求下你啦。」她前後晃動著子熹的手肘。
「唔得。」子熹搖搖頭：「始終重案組查緊既資料唔方便隨便同人講。」
「最多...我比你咩咩喇。」Carmen忽然吐出一句。
「咩咩？」
「即係...比你咩咩我囉。」她羞紅了臉。
「你講咩啊？」
「咩咩，即係男女之間果樣野呀......」
「即係咩啊？」
「無野喇！」Carmen放棄似的推開子熹的手：「當我無講過啦。」
Carmen漲紅著臉，哼了一聲大步離開。
「等等。」走了幾步後，子熹叫住了她。她咧嘴愜意的回頭。
「回心轉意嗱？」
「唔係想同你咩咩啊。」子熹說：「如果你話我知你一直查呢件案既真正原因，我就同你講今日既事。」
「咩意思？」
「你唔係覺得，我會信你上次既說法，真係以為你為左份工去查呢件事下話？」子熹瞇起眼睛說：「你肯坦白既話，咁我咪同你傾傾單case囉。」
「真正既原因......」
Carmen陷入思緒，笑容隨著涼風消逝而去。