【懸疑】《連登連環殺人事件》: —-第八章—- 2.

連埋住帶著康仔回到祖信有限公司，使用會議室商討接下來的計劃。
 
一路中，康仔跟連埋住講解關於調查所得的事情，他才知道原來重案組之中有內鬼。
 
兩人從對話中，漸漸化解互相之間的矛盾。
 
很快，他們便到達公司。甫入會議室，康仔便緊皺著眉。
 
他心想：又是這間陰陰沉沉，放滿雜物，混有鐵鏽味的房間。
 




尤其是牆身，跟監獄的幾乎沒兩樣。
 
找個位坐下來後，康仔發現上次所見的薄薄一層灰塵，依然留在桌上。
 
他忍受不了的開口：「你幾時先肯執下呢間房？」
 
「唔執得住啊。」
 
「你懶就懶啦。」
 




「我就係貪呢間房夠亂夠污糟，尤其係呢堵牆，夠哂爛。」
 
「你係咪傻架？」
 
「緊係唔係啦，呢個係我計劃之一嚟架。」
 
「計劃？」康仔馬上亮起了眼：「你已經諗到辦法查落去？」
 
「當然啦。」
 




「只不過......關呢度環境咩事？」
 
連埋住賊賊的笑，從雜物箱裡掏出一部單反相機。
 
相機？康仔困惑的搔頭。
 
他再拿了一張紙與筆給康仔。
 
「快寫。」
 
「寫？」
 
「寫你自己連登既用户名啊。」
 
「點解要咁做？」




 
「唉啊你真係唔識架喎，你要攞住張野，對住鏡頭影張相，然後擺上連登嘛。」
 
「下！？原來你帶我上嚟，根本無打算幫我，而係有心玩我？」康仔連忙站起來，變得緊張兮兮。
 
連埋住苦笑一聲：「唔係啊......你影完自己擺上連登，再打一段煽情既文字，咁啲連登仔先會可憐你，幫你手查案架嘛。」
 
康仔半信半疑，深思一會後續問：「但係佢地可以點樣幫到我呢？唔通我將我查到既所有資料擺哂上討論區？」
 
「緊係唔係啦，一陣個幕後大佬mon post（監視帖文內容進展）既話，咁咪功虧一簣？」
 
「照你所講，咁我地應該點做？」
 
「你只要拿拿聲影張相，影得有幾樣衰得幾樣衰就得架喇，其他野我會處理。」
 




「哦......」康仔無可奈何，唯有跟他所說的去做。
 
他先在紙上寫上自己的連登用户名：
 
［ 28歲（A0）］
 
然後宛如通緝犯一般，靠在牆壁前提高了紙，目無表情的望著連埋住。
 
他呆呆滯滯的臉容，加上整個現場環境，看起來十分逗趣。
 
「啱喇，企直啲，眼神憂鬱啲。」
 
連埋住半蹲地上，把相機貼近眼前，指揮著康仔如何擺pose。
 
我到底在幹什麼...康仔腦袋反問著自己。




 
「唉啊，如果你著埋黑白間條衫就完美喇。」連埋住抱怨道。
 
「你係咪想查案架其實......」
 
「信我啦你，呃你做乜喎。」
 
最後康仔被拍了幾張正面和側面的樣子，跟準備收監的通緝犯完完全全沒分別。連埋住欣賞著相機拍下的照片，滿意地點頭。
 
「咁而家要點呢？」康仔問。
 
連埋住舔舔上唇專心按動手機：「你只要等睇連登討論區既熱門區就得架喇。」
 
「就係咁簡單？」
 




「比你見識下網路世界既威力啦。」
 
他花點時間打段文字後，把文字連圖片一同上載，然後咧起嘴角對康仔深深一笑，康仔不禁打個冷顫。
 
「做咩啫你...？」
 
「上連登睇下啦。」
 
康仔打開手機按進討論區，眼睛注意力自然的投放在一個發光置頂的帖文。
 
---------------------------
 
「連登神探全面進場，世紀垃圾廢男在此（有圖）」
 
---------------------------
 
是這個吧？
 
按進此帖文後，他瞪大眼睛，發現自己的臉蛋被放了上來。
 
「喂！」他大為不滿的喝著連埋住：「乜野世紀垃圾廢男啊？仲要擺我個樣，姐係唱衰我啫！」
 
「你睇埋落去先啦。」連埋住揉揉他的背脊。
 
康仔對他怒視一眼，繼續閱讀下去。
 
——————————————-
#1 連埋住
 
[康仔的圖片］
 
呢個人就係史上最無用既世紀廢男！
 
身為重案組警察，唔單止花左好多時間都捉唔到個兇手，仲要眼白白望住自己心愛既人比佢殺死。
 
除左垃圾兩字，無野更加適合形容佢。
 
不過，佢發現呢單案件既幕後兇手，依然逍遙法外。果位兇手，仲要有機會係佢重案組既同事！
 
佢而家工作都辭埋，就係為左令愛人沉冤得雪，查出真相。
 
呢舊垃圾，好需要你地既幫忙，一齊搵出真兇。
 
如果你有興趣幫助佢，請親臨觀塘祖信有限公司，我地需要您架！
 
——————————————-
 
「咁樣靠唔靠譜架？」
 
「你連色相都出埋，仲有咩好驚？」
 
「我就係擔心啲同事會見到。」
 
「見到又點？」
 
「會知道我調查緊佢地，如果mon post既話，更加會了解到我下一步做啲咩。」
 
「所以我咪特登叫啲人直接上嚟公司，避免你同事發現我地調查方向。」
 
「係咪真係得架......」康仔再三質疑。
 
連埋住不耐煩的嘖一聲，然後遞他一疊白紙：「乜你咁婆媽架？你趁而家概括下案件既基本資料，同埋你調查所得既資料先啦，費事一陣有連登仔嚟，你都唔識話番比佢地知咩事。」
 
「唉好啦。」他接過白紙。
 
康仔然後專心的記錄案情重點。
 
連埋住隨即走出了會議室，剩他一人繼續工作著。
 
每次兇案時的疑點......每個同事可疑之處......阿田的資料......他一一寫下來。
 
記錄的時候，偶爾聽到大門外有些吵雜聲，不過他並未理會。
 
過了半小時，他終於把所有案情的重要線索寫錄下來。感覺好像中學生考完連續幾科考試一樣，有種解脫的感覺。
 
康仔拿著十幾張寫滿頁的紙，瞧瞧門扉。
 
「條友去左邊呢？」
 
走出去一看，不只是連埋住，辦公室的其他員工也不知所蹤。
 
發生了什麼事嗎？走火警？
 
不久後，連埋住才從大門外喘吁吁的回到公司辦公室。
 
「搞乜啊你？」
 
「跟我嚟...」
 
帶著納悶的臉，康仔跟著他一步步走上樓梯，直到到達天台的時候，他怔住了。
 
空矌的天台上站滿了人，男女老幼也有，連埋住的公司員工正控制著眾人秩序。乍眼一數，可能有近五十人。
 
他們皆以雄心壯志的眼神望著他。
 
發生什麼事......
 
康仔馬上掏出手機，按進剛才連埋住發佈的帖文，驚覺帖文已經有四萬個讚好。
 
留言更是爆滿，通通也對康仔表達憐憫和支持。
 
他揉揉眼，以為自己正在發夢。
 
連埋住看穿了他的困惑，笑著拍拍他的膊頭。
 
「係網路既威力啊。」
 
他說罷回頭望向眾人，大喊一聲：「我地係咩啊？」
 
「連登仔！！！」
 
康仔不禁展現笑容——他再也不是孤身一人了。
 
 
 
 
 
在康仔的解說和連埋住的指揮下，一眾連登仔分成三組人，分別處理不同的內鬼調查任務。
 
起底組——負責針對討論區的資訊，查找每個涉案人物的可疑證據。例如在「傷心小棧」的舊帖文中尋覓與案件相關的用戶，並嘗試起底。另外亦有人會著手調查暗網，檢查與阿田交易軍事武器的角色是何人。
 
行動組——負責針對內鬼的真人調查，分開跟蹤重案組的成員，嘗試從他們的日常行為上，找出關於案件的有用資料。
 
分析組——負責為其餘兩組提供支援，當兩組人在調查中有所發現，會馬上跟他們通報。他們會盡快整合資訊，再分辨誰人比較大機會是兇手。
 
康仔觀察了三組人。
 
起底組的成員有不少是上次麥記快餐店的巴打們，他們因為四眼男的死感到痛心，因此前來這裡。
 
行動組的成員出奇地以老人家為主，當中還見到王伯，看來是為了阿宜的死找出真相。
 
分析組的成員當中，有些看起來是富有人士，有些看起來非常年輕，也有些是家庭主婦。康仔湊過去一問，才知道他們的親人或朋友是今次連環兇殺案的受害者。
 
「我地一早都唔信警方既講法架啦，單案邊有咁簡單！！」
 
「我個仔係無辜架！！」
 
「一定要搵出真相！！」
 
各人氣勢高漲，抱著必須找出真相的決心。
 
連埋住甪乘著氣勢，走到眾人跟前，仿佛指揮著一對軍隊般開腔：
 
「今次我地既行動可能非常困難，但大家只要同心協力，一定會破案既！」
 
「好！！！」
 
他還開了一個WhatsApp群組，把所有人加了進去，有甚麼要事也在群組中溝通。
 
有一瞬刻，康仔認為連埋住的號召力比起胡Sir還要高。
 
分工好以後，他們便開始四散而去，準備調查行動的工作。
 
祖信公司的員工也回到辦公室，跟進案情事務。
 
天台只剩下康仔和連埋住。
 
康仔抽出了煙，把煙盒遞給連埋住，他也取出了一支。
 
兩人眺望著遠景，吞雲吐霧起來。
 
「點啊？我呢條橋係咪唔錯先？」
 
「確實係既，雖然你踩到我好盡，不過有成效就得啦。」
 
「呢招叫苦肉計，捉住連登仔憐憫既心理。」
 
「哈！我以前仲以為連登仔十之有九都係冷血架添。」
 
「有好多都比現實中吹噓自己係好人既人，來得更有人性。」
 
天上漸漸聚合烏雲，好像要下雨了。
 
冬天的雨總是格外的冷。