關於少女的故事: 03-女人湯丸

放學，我返到屋企，即刻打開電腦，登入Msn，輸入：「[email protected]」

之後我就add左佢啦，佢亦好快咁accept左我。

「ˊˊˊ#× 宇宙 ×ˋ!!」在線上。

我打開對話視窗，諗緊要打咩開場白。

「Hello！ 我係黃寶靈呀。」呢句好唔好呢？





我望住個Enter掣好耐，猶豫緊咁樣講岩唔岩呢？

我心跳加速，小鹿亂撞，唉唔理啦，Enter！

宇宙：「Hi，你係今日搵我但又唔出聲果個女仔？」

我：「係呀……我叫做Bonnie呀，D曲奇好唔好食呀？」

宇宙：「OK呀，幾好味。」





我：「咁你做緊咩呀？」

宇宙：「等緊同學打信長囉。」

我：「有咩好玩呀？」

宇宙：「er…用技術黎殺人囉。」

於是乎，我用Foxy Download左魔獸爭霸3同信長既地圖。





同宇宙玩左兩局之後，我就無玩，因為我完全唔識玩，好複雜，費事連累宇宙。

鍾意一個人既特徵之四：投其所好，即使你唔鍾意。



後黎，我無再同宇宙玩信長，我問佢，不如玩跑Online啦，佢都話好。

雖然同佢打信長D朋友頗有微言，話玩跑Online好on9，但佢一於少理，陪我一齊玩。

「豈！」、「我跳！」、「Jump！」，我習慣開住聲玩跑Online。

我用開「明明」呢一個角色，因為佢真係好cute而且一開始揀就可以免費用。

我係跑入面個名叫做「寶靈ovo」，而陳汝州就叫「宇宙ovo」。





我同宇宙同一組，一齊玩接力場，依稀記得個場名叫做超級跳躍。

宇宙真人跑步好快，贏左一百米既第一名，估唔到佢連係game入面，都一樣跑得好快。

我淨係識得高空DJ，而宇宙仲識埋低空DJ，仲成日都跑得快過我。我鍾意跑第一棒，因為如果落後左，之後都可以依靠宇宙扳回優勢。

不知不覺，日日同宇宙玩跑Online既日子，成為左我F1時候最快樂既日子。

日日Mon住陪電腦，等佢登入Msn或者跑Online，就係我每日放學最期待既事。

鍾意一個人既特徵之五：每日都好期待佢在線上。







攞到宇宙個Msn之後，順理成章，我就攞埋佢既電話號碼。

我同佢都係人仔台，Message免費任send咁濟。

而家望住部Sony Ericsson推蓋手機，真係充滿哂回憶。

時間又到左每兩個星期一次既家政堂。

而家政堂我次次都係同劉曉晴同一組。

仲記得果日我地整湯丸，搓D糯米粉，搞到我地成手都係白色粉末。

我係度洗手，劉曉晴突然講：「丫！你話D湯丸似唔似你個陳汝州丫拿？」

我：「下？邊度似呀？」我覺得有點荒謬。





劉曉晴：「男仔之家，又白又滑喎。丫，我知佢似邊個啦，似呀王力宏呀。」

我：「陳汝州靚仔D。」

劉曉晴：「哈哈哈哈，唔靚仔點做女人湯丸呀？」

我：「咩野係女人湯丸呀？」

劉曉晴：「意思即係可以係女人堆入面打混，迷倒唔少女人既俊俏少年囉。」

佢繼續講：「唔止係Emma呀，連D老師Miss都偏心佢嫁。」

講起Emma，我就嬲啦。因為諗返起陸運會果日，佢影相既時候都有請陳汝州食波餅。