Emma,全名王心瑜,係啦啦隊長,讀4B班。

佢個樣麻麻,但係就胸前偉大,目測應該有E Cup。

對比起岩岩發育既我,胸前波平如鏡,佢真係無得輸。

而我覺得我個樣只係比一般好少少,連中上樣都稱唔上。

咁,如果我要係陳汝州身邊咁多女仔中突圍而出,我要點做先得呢?





有人話,要留住一個男人,首先要留住佢個胃。

所以我決定,每次家政堂都俾心機整野食,然後送俾陳汝州。

「陳汝州,小宇宙。」我一路攪拌D湯丸,一路輕唱。

我諗,請佢食湯丸應該好過請佢食波餅掛。

一黎,我無Emma咁姣,二黎,我無波。





我諗,最後果句先係重點。

所以我由中學起就日日飲木瓜奶,或者係飲豆漿。

為左吸引男仔,女仔真係可以在所不惜。

我筆起D湯丸,食左幾啖,幾甜,仲諗起宇宙,情不自禁甜笑起上黎。

鍾意一個人既特徵之六:但凡諗起佢,都會甜笑。







劉曉晴:「你做咩係度偷偷地甜笑呀?」

我:「有咩?無呀。」

劉曉晴:「諗起你個小宇宙呢?」

哈哈,知我者莫若劉曉晴。不過我一樣唔認:「無呀!」

我:「你幫我識左陳汝洲,咁幾時到我幫你識譚越其好呀?」

劉曉晴:「千其唔好!我未準備好!」

劉曉晴係一個好大膽既人,可以完全唔怕羞咁樣幫我上2C班搵陳汝州,但一講起譚越其,佢就即刻便到好細膽。





因為係鍾意既人面前,我地都好怕,好怕會做錯事,令到佢扣減對自己既印象分。

想留個最好既第一印象俾人,所以每講一句都小心奕奕。

但我而家已經過左呢個階段啦,成日都好想同宇宙傾計,即使係好無聊既野都好。

「你食左飯未呀?」、「食左咩呀?」、「你做緊咩?」

呢幾句,我成日都問。

鍾意一個人既特徵之七:個腦成日都諗住佢。







我地將炮製好既湯丸放入三個食物盒,準備將其中一盒送俾宇宙。

係家政堂入面,我俾老師試味,都有90分嫁,唔知宇宙鍾唔鍾意食呢?

呢個時候,係第二個小息,我地去左2C班搵宇宙。

劉曉晴:「喂,陳宇宙,Bonnie整左D湯丸請你食呀。」

宇宙:「好呀,咁岩我都見肚餓。」

宇宙伸手接過食物盒同匙羹,食得津津有味。

見到佢開心,我都好開心。

鍾意人既特徵之八:「見到佢快樂,自己也同樣快樂。」





跟住,我背後突然間有把女聲:「宇宙,我買左薯條俾你食呀。」

我轉過頭,發現係Emma,我地雙目交投,令我察覺到有些微敵意。

宇宙:「正!多謝哂。」,宇宙都係食得津津有味,不過佢遞一遞包薯條俾我,問:「食唔食呀?」

我:「唔洗啦。」

原來,宇宙係一個大食積,唔知佢個胃係咪有個黑洞係度呢?

跟住,我地就返返自己班房,上數學堂。

身為一個少女,我最憎既就係數學。
已有 0 人追稿