關於少女的故事: 05-多邊形

唔止數學上既三角關係，人與人之間既三角關係，我都好討厭。

而我發現，我同宇宙同Emma就係一個三角形。

或者唔止Emma一個想追宇宙，係多邊形都唔定。

算啦，數學既野我唔叻，唯有返學等放學，放學飲可樂。

升上黎中一已經兩個幾月，除左劉曉晴之外，我地其實仲有兩個朋友：于夏君，同李永輝。





于夏君坐係我隔離，係我地1C班既班花，全級四大美女之一，性格平靜，清純，係個正宗女神。

而李永輝就坐係劉曉晴隔離，係一個肥肥地，女人形，gay gay地但又唔係真係gay既男仔，性格樂天，成日搞爛gag。

唔知點解，坐你隔離既同學未必係同你最friend果個。

就好似我同劉曉晴咁，一個東一個西，但仍然無阻我地既友情。

我地既1C班，成積中下，但勝在多靚仔靚女。





可能真係「人醜就該多讀書」啦，我地級精英班真係無乜靚仔靚女。

班男仔除左將我地級四個靚女封為四大美女之外，仲將幾個其貌不揚既肥妹仔封左做四大聖獸。紅藍黃綠四社，各有一個。

紅色有朱雀、藍色有青龍、黃色有白虎、綠色有玄武。

呢種比喻，比起直接叫人做豬扒，更加Mean一百倍。







劉曉晴：「Bonnie，不如我地勾手指尾呀？」

我：「下？點解呀？」

劉曉晴：「我地約定，你幫我追譚越其，我幫你追陳汝州，好無呀？」

我：「好，一言為定。」然後我就舉起右手跟劉曉晴的手結印。

一手接住一手，手指尾勾住手指尾。

黃寶靈同劉曉晴，就係咁成為左盟友。

我心想，每個女孩子，都會為了愛情不惜一戰吧。

而劉曉晴終於都決定左要我幫佢刺探軍情，去識譚越其。





最常見到譚越其既地方唔係1D班，而係籃球場。因為佢幾乎每個小息都會落去樓下籃球場打波。

小息，我落左去樓下籃球場，咁岩見到陳汝州同譚越其係度鬥波。

呢個時候，我莫名地緊張，心跳卜卜卜卜咁跳。

跟住我就係度睇波，等小息完既時候，先搵機會接近譚越其。

小息完結既鐘聲響起，我馬上走去譚越其面前，遞左一張紙條俾佢，然後就快步逃走。

字紙上面寫住：「可以做個朋友嗎？ [email protected]」







呢個時候，同樣係籃球場既宇宙好似望到我。

佢見到我將紙條交俾譚越其，死啦，佢會唔會誤會我係鍾意第二個，隨便撩人，水性楊花既女仔嫁？

我見到宇宙黑臉，答案似乎呼之欲出，唉。

我返到屋企之後，等左好耐，都未見宇宙online。

跟住譚越其加左我Msn，我地就傾計啦。

我：「Hi！」

譚越其：「Hi！」

我：「Hi Hi！」





譚越其：「Hi Hi！」

我：「Hi Hi Hi！」

譚越其：「Hi Hi Hi！」

我：「Hi到幾時？ xd」

譚越其：「點知你呀？」

我：「er…我都唔知講咩好。」

譚越其：「你做咩想識我既？」





實情係因為我想幫劉曉晴刺探一下軍情。

不過我隨便編個藉口：「er…因為我鍾意睇人打籃球囉。」