「你最多試過暗戀一個人幾耐?」我向一位認識多年的朋友問道。

「暗戀好辛苦㗎,堅持落去幾耐都好,對方係永遠都唔會知道㗎,何況,如果對方真係鐘意自己,又點會亳無表示?所以,我最多鐘意一年就迫自己放棄㗎啦。」她的笑容很輕鬆,相信她的笑靨背後並無隠藏着辛酸的單戀故事。

「咁你呢,你又暗戀過人幾耐啊愛情大師?」她反問,儘管我們相識於微時,但對於愛情話題,我倆甚少過問對方,她不主動牽起這話題,我也不敢問津。

我想,作為她的異性朋友,感情話題,是彼此不可捉摸的界限。

她首次談及感情生活,就只有一次,便是我倆初次見面的時刻。



「我啊?我暗戀嗰個人已經有六年咁耐啦。」我亦勾起笑容。

她驚訝得瞪大眼睛,隨即好奇地向我套話「等陣先!你講真㗎?Oh My God!咪住,係男定女嚟㗎?我識唔識?」

「女啦當然,你可能識掛......等陣!點解要問係男定女!」

「無啊,我見你收山之餘又Dry咗咁耐,以為你中途轉基咋嘛,不過,你直又好,Gay又好,只要你揾到自己鐘意嘅人,我一定會祝福你哋㗎!

話時話,到底個女仔係邊個嚟姐?我真係好好奇,到底邊一位令你咁牽腸掛肚,可以掛足六年咁耐?而且,仲要係我可能識嘅!」



「其實......」頓時,我啞口無言。

「比啲提示!我一定估到嘅,話曬我哋都識咗八年喎,我都記曬我哋啲Common friend㗎,只要你求其講佢一樣嘅性格比我聽就得!」

「好啦,我講㗎啦,你唔好後悔。

佢係一個好傻好可愛嘅人,會因為睇一套悲劇電影喊足一星期,聲稱自己太投入所以抽身唔到,但又會因為一啲生活上嘅小確幸而開心一個星期,呢種嘅性格,就由我認識佢耐咗先慢慢發現,之後,我就開始鐘意咗佢,原本,我打算將秘密埋藏係心底,永遠守口如瓶,但既然當時人親口問我,咁我就坦白承認啦,咁唔知當時人,又肯唔肯呢?」我鼓起畢生勇氣,吐出六年來的心聲並且偷偷觀察她的神情,只見她瞬間漲紅面頰,逃避我的神線。

「當時人......都覺得......ok啊。」她小聲、吞吞吐吐地說。



「Yes!不枉我等咗你六年!我終於得咗!我哋可以一齊啦!」我欣喜若狂地地喊道。

以上,純粹幻想。

要是我願意表白,我就無需暗戀她整整六年。

不願表白,只因害怕失敗。

害怕失去彼此的朋友身分,也害怕失去她,更害怕失去她的未來。

我不敢想像,她尷尬拒絕我的場面。

為何我會膽小如鼠?
因為,她早已為這段關係下定「友誼」的界線。
已有 0 人追稿