《單戀的故事》: Ch.7

清晨時分，她終於睡醒過來，她看到自己正挨著我的肩膀，不消半秒，她隨即嚇得站起來，慌張地說著對不起。

「不知不覺就天光啦，趁仲有啲時間，你就坦誠咁講心事出嚟？」我開口道。

「我......首先我強調唔認同你對愛情睇法，你同人講定只可以拍拖三個月又點樣？咁代表唔會傷到人？或者人哋想用自己去打動你呢種睇法呢，有時候，就算相處好短時間，都可以對一個人念念不忘。

唉，算啦，你同佢一樣，永遠都唔會明白，淨係識玩人！」

「等陣先，你唔係因為認同我先喊㗎咩？另外，邊個係佢？又關我事？」我擺出黑人問號的樣子。



「我喊，係因為我諗起男朋友......聽完你講愛嘅定義，我不得不承認，佢的確係完全唔愛我。

其實我早就知道佢已經唔愛我，佢仲同咗另一個女人一齊，佢哋兩個而加就係上面咋嘛，所以我咪自己一個坐係度等佢哋走咗先翻上去。」她苦笑。

甚麼？我的閲讀理解沒有退步吧？她得知所有真相，卻仍裝作不知情，情願自己一人睡在街道也害怕揭發他的惡行嗎？

我禁不住怒火，當場指責她：「你係咪喊到跌咗個腦啊？佢咁都做得出仲算係你男朋友？佢已經比咗頂又大又綠嘅帽比你啦！點解你仲可以容忍？」

「因為我愛佢，所以我願意一直等，等到佢記得翻起我，唔再同其他人一齊。



但原來等唔係最可怕，而係我慢慢咁發現，佢已經失去咗當初愛我嘅感覺，而加相處多一秒都好似係我主動揾話題講先可以維持住，否則只有各有各做自己嘢，就算處於同一空間，都形同陌生。

我呃自己係諗多咗，佢仲好愛我，佢只係暫時迷失，最後一定可以無事。

因為當初租呢個單位嗰時，佢話係為咗令我哋感情可以有再進一步嘅昇華，想每日對住我而租，不過後來，我聽得出佢對我嘅語氣一日比一日冷淡，我唔知佢對我嘅感情變成家人定點樣，我只知道，佢後期已經不斷揾藉口唔上嚟。

而且，仲被我發現佢有第二個。

總總瑣碎事項，再加埋你嘅説話，令我知道唔可以再呃自己，係時候接受現實，接受佢唔再值得我去愛，唔好再浪費時間係呢啲無謂人身上......



但係，但係我真係好唔捨得......我唔想放低佢。

唉算啦，你肯定唔會明白我有幾痛，只會覺得我好無腦，點解要仲堅持愛一個唔愛自己嘅人，我反而想問翻你，乜愛一個人，要係需要解釋咩？」

「我明，我點會唔明。」我小聲喃喃自語。

「？」

「點都好，既然你決定咗放手，就要自己好好面對，嚟，我陪你上去。」

我嘗試拉她前進，她卻退縮地說：「真係要而加？好早喎，不如再等下先......」

我看不順眼，打算強迫她面對現實，長痛不如短痛，沉醉得一個美夢越久，更不願
睡醒過來。



換句話說，你要怎樣才能喚起一個裝睡的人？