曾經我抱怨時間流動得太快,使我無法留住她,現在,我認為時間的速度恰到好處。

要是把我的心路歷程寫成小說的話,那些作者,或會美化為成長的蛻變吧?

蛻變嗎?我亦難定義自己這五年來的思想變化,但唯一能夠肯定的是,我成功放下對她的執著。

驀然回首過去,原來再難過的難關,都一一被我克服,不禁令我佩服自己堅毅不屈的精神。

可能要嘗過苦澀難吃的果實,方可品嚐到回甘的滋味。



也許,人生道理亦是如此。

人生路途上,還是要狠狠摔過一跤才能深深體悟到處世之道,不然,再多的時間亦無法理解。

那一句你好,是時候發送。

我們,是時候再聚。

「你,最近還好嗎?」我裝作麥浚龍Juno的聲線向她問好。



「哈哈哈傻仔,托你嘅福,我過得幾好。」她笑言。

儘管闊別五年,幸好仍能馬上打破尷尬的局面,看來彼此還是成為朋友更為適合。

「咁你又過成點?五年無見,你好似黑咗又大隻咗?」她問道。

「幾好啊,我又唔似啲電視情節嘅男女主角咁,一散心就飛去外國咁有錢。

係你拒絕咗我之後,我諗咗好耐,有段時間覺得自己係世上最慘嘅人,為咗令自己可以轉移呢種感覺,我好極端咁走去in社工,睇下接觸多啲唔同人會唔會改變到諗法。



點知佢又收我喎,我係入面由助理開始做起,做做下又發覺幾有意義,後來寄情工作就放低咗。」我簡單地講述這幾年的經過。

「真係咁簡單?你係咪漏咗啲嘢無講。」她懷疑地質問。

我唯有坦白地承認,「真係無嘢暪得過你雙眼。

係咁嘅,因為嗰度唔夠人手,加上我表現好,所以做咗一年半就升職,工作上係要同Partner一Team解決唔同case。


原本我都當佢係普通同事㗎咋,咁有時為咗打好工作關係,完咗Case都會同佢食下飯慶祝下,除咗公事就當然會講下私事。

不過我當時都怕佢會誤會,所以間接咁話自己暫時都未有信心開展新戀情,畢竟唔想hurt到人,我自己受苦就夠啦,無為牽涉到其他人。」

說到這裡,芷晴的臉色非常難看。



「你無事嘛?你臉色突然差咗好多喎,洗唔洗翻屋企休息下?叫Harry嚟接你?」

她急忙揮手拒絕:「唔洗唔洗,我無事,你繼續講埋落去,我聽得入神姐。」

我不以為然地繼續憶述:「咁當時大家都保持一定距離,唔會私底下咁約對方見面,不過關係已好好,始終係日見夜見,呢種關係大概維持咗兩年到。

過咗無耐,我感覺到佢有意無意咁想約我出去,雖然覺得佢都會係幾好嘅對象,但都怕自己未準備好,所以一直迴避,只限於公事上嘅見面。

直至有日佢突然無翻工,問同事又唔知佢咩事唔翻,當時我好緊張,好擔心佢係咪出咗咩事,但工作問題又唔可以即時走咗去,唯有照做,不過當日完全無心情處理Case,無辦法集中到精神。

霎時,我明白到佢對我係好重要,我已經習慣佢係我身邊,不知不覺咁對佢有好感,亦都慢慢放低咗你。

之後我一放工就message 佢,到夜晚先收到佢回復,未收到之前真係連飯都食唔落,好怕佢會有事。

原來陪咗佢14年嘅狗狗走咗,所以佢都無心情翻工,咁我當然有好好咁安慰佢啦,仲同佢message咗成晚,希望可以令佢無咁傷心。



從嗰日開始,我哋關係更加親密,最後係大家都鐘意對方嘅情況下就一齊咗,計計埋埋,已經有兩年啦。」一想起她,我便不自覺地泛起笑容。

「我都話你一定會揾到屬於自己嘅幸福,Call me預言家~

係喎!咁阿嫂知唔知我同你出嚟見面㗎?我怕佢誤會喎。」她大為緊張。

我從容不迫地回答:「唔怕,佢好大方㗎,我報定案㗎啦,佢好放心。」

「咁係因為佢唔知我同你嘅過去姐,呢個世界,無女人真係大方㗎,始終聽到對方係異性朋友,點會唔怕喎?但又無理由話唔得,所以唔得都要得。

假如佢知道你曾經鐘意我就仲死,口就話唔在乎,但心就一定怕你對我仲有意思,想你自己醒目而主動話唔去。

女人心,男人都係唔會明㗎啦。」她唏噓不已。



「乜真係咩?我覺得男女之間仲要猜度就太辛苦啦。但我哋都係清白又唔洗怕嘅,如果要避諱下,你下次揾Harry出嚟,我又叫埋女朋友嚟?當互相認識下?」

「我單身狗嚟咋,我同佢五年前已經一早分咗手。」她苦笑。
已有 0 人追稿