《單戀的故事》: Ch.19

分手？？？
我誤以為她一直處於蜜運之中，卻沒有產生過她也會分手的局面。

霎時間，我未能及時作出反應，亦不知該如何安慰她。

「有冇驚訝到擘曬大口咁誇張啊，好少事咋嘛。」原來我的面部表情都出賣了自己的內心想法。

「呃，唔係，只係有啲突然同埋無諗過姐。」我連忙作出掩飾，不，解釋。

「得啦得啦，同我講嘢唔洗咁偽術喎。



你唔知都好正常嘅，其實都只係好少事，幾句說話可以解釋得到。

因為佢仲掛住前度，所以我哋分手。」

「咁你就一直等佢五年？」我直接指出問題重心。

她擺出一副毫不在乎的樣子，視線遙望遠方，向我道出直相。

於我而言，她越想裝作毫不介意的樣貌，事實便是非常在意。



「嗰日，我直接表明心意，話我好鐘意佢，唔介意等。

但後來佢話唔想再害我，唔想再令我心碎，最主要嘅係，佢話，感情係好有趣同最古惑嘅事物，呢一秒佢對我有好感都好，佢都唔保證下個月、下星期可以維持得到，所以佢唔想拖住我，唔想浪費我時間。

至少佢知道自己唔會咁易放得低前度。

佢同我講，我哋兩個都係曾經被拋棄嘅人，所以一定會明白受過傷嘅心係要長時間先可以康復，即使康復咗，嗰一道不痛不癢、但深不見底嘅疤痕仲清清楚楚咁提醒自己，曾經跌得有幾痛，有幾傷，有幾苦。

『既然大家都明白，就更加要知長痛不如短痛嘅道理，趁我哋未愛得夠深就好分手啦，佢對我嘅傷害，我一個人受曬就夠啦，我唔想牽涉埋你。』佢最後講完呢句就走咗。



我駁唔到，應該係話，我唔知可以點講。

佢愛前度而自己受傷。
我愛佢而被佢心傷

好似變到愛人嘅定義就係傷害，唔通人都應該淨係識得自愛？唔再去愛人？

我答唔到自己，亦揾唔到答案。」

說罷，她突然站起來，向我揮手道別。

「等陣，你講完啦？咁快走？咁你單身咁耐係為咗等佢？」她的收結有點突然，使我反應不來。

「再講落去，我怕我會喊。



哈哈講笑咋，唔係，我有事要走先姐。

單身嘅原因......無話等佢嘅，只可以話除咗佢之外，暫時都未見合心意嘅人。

其實你真係幾有先見之明，原來揾到鐘意自己嘅人真係好難好難，揾到自己鐘意自己嘅人就難上加難。

好啦，我唔應該再講咁灰心失意嘅說話，今日見翻你好開心！但廢事阿嫂嬲，我哋都係少見啲好，最多就.....婚禮見？」她展露笑容。

「咁好啦......你唔好自己一個勉強啦，我揾到枕邊人，你都一定得㗎，相信自己有咩事Call我啦。」我仍然擔憂她是故作鎮定。

「你估你鄭嘉㯋咩~我又唔係陳凱琳。放心我，無事啊。」她頭也不回地爽快離開。

既然她態度堅定，我也只好目送她離開。



愛情，果然是所有人都必須學習的人生課題，我撐過了，所以你亦要好好支撐下去，我暗忖。

另一邊廂，在杜芷晴歸家的路上，她雙目凝視著手機螢幕，當中的版面為她與前度Harry的對話紀錄。

兩年前，她也許受了酒精影響，可能是禁不住好奇心，或許是太想念前度。

神差鬼使地，她傳送了一句Hi。

這句Hi，藴藏著關心對方的想法、自己對前度的想念，並且，試探對方有否同樣掛念自己。