《印度 · 尋油 · 台灣妹》: 《十二》

見到已經著晒睡袍嘅 Priscilla，坐咗响梳妝枱前，仲向我微笑咁講 


「對不起，讓你等了太久！」 


「沒所謂，哈、哈、哈」我苦笑着，即時諗起N年前有個寬頻廣告 "優惠嘅野眨下眼就無㗎喇！" 


其實男人沖涼唔駛好多時間，十分、八分鐘咩都攪掂（某部分啲皮過長除外），過咗陣，我响浴室度行出嚟，見到 Priscilla 已經瞓咗响床上面，我放輕腳步走近，熟睡中嘅公主不減一點可愛，我為佢蓋好被，跟住緊係 …… 




嘩哈哈 …… 


轉身死去梳化啦，唔通擒佢咩！！ 


坐响梳化發呆期間， 突然聽到手機發出 "咇" 一聲，開機一睇，終於收到花仔強嘅訊息 




"文西，我同 Heidi 都安全無事，搵你地唔到，我地啱啱番咗酒店，我地間酒店叫 THE OBEROI GURGAON ，地址係 443 Udyog Vihar, Phase V Gurgaon, Haryana 122,016，仲有你今晚番唔番嚟？" 


" Priscilla 已經瞓咗，加上依家咁夜，聽日先番！" 我打完訊息就發出 


好快又收到花仔回覆 




"記住、記住同記住搵服務員買避孕套，唔好攪出人命，聽日見！：P " 之後就離線。 


正一死仔，我係啲乘人之危嘅人嚟咩？！ 


應該唔係 …… 啩！


知道花仔同 Heidi 無事，終於放下心頭大石，鬆一口氣，心事已了，不知不覺就瞓着咗。 


响夢入面，我聽到有把女聲叫我 「 Da Vinci， Da Vinci ……」我睇唔清楚佢個樣，淨係知道佢有著衫，咁即係唔係發緊綺夢啦，佢再行近啲，㖿 ~ 阮兆祥，咪住咪住，唔係，佢好似係盧覓雪，仲跟手一野 “車“ 埋嚟！ 




嗄嗄嗄 …… 嚇到我醒咗，我定神睇清楚，發現 Priscilla 彎住腰响我前面，雖然我啱啱醒，但我仲分得清阮兆祥、 盧覓雪定係 Priscilla，就問 


「Priscilla，什麼事，妳不是睡了嗎？」 


「你睡沙發很辛苦的，其實 …… 你可以一齊睡，床子大大的，我們可以每人一方！」Priscilla 面紅耳赤咁講 


「不用了！這沙發很舒服，妳回床睡吧！」我扮晒婉拒咁話 


「睡沙發那會舒服，你别騙我吧！」Priscilla 可愛中帶點生氣咁講 




之後佢嘗試用雙手將我拉起，咪玩啦，輕量級對重量級，越級挑戰，當然唔成功啦！我見佢好認真咁拉我，呢份堅持令我諗起八九年六月四日，响中國一群有理想、有抱負嘅學生，佢唔理會強權，甚至連坦克車都唔怕，心裏面就係抱住呢份堅持，時至今日佢地果份精神仍然存在，但係 Priscilla 唔同，佢都有呢份堅持，不過支持唔住，最後頂唔順放棄咗，就咁坐响梳化度扮瞓，唉 ~ 叫佢同我一齊瞓梳化，我當然唔忍心啦！於是我就講 


「好吧！我投降了！」我講完之後，做咗一件自己都覺得奇怪嘅事 ……