《印度 · 尋油 · 台灣妹》: 《二十六》

「好，你幫我做一件事，我才告訴妳她在那裡！」 


我帶住沉重嘅步伐向房間進發，一步，一步又一步，門一開一關，花仔由床上直奔向我，不斷咁講 


「台灣妹啊，個台灣妹未走呀，你見唔見到啊，佢失驚無神再出現，一定有陰毛㗎，我怕咗佢，我打死都唔會再離開間房！」 


我一手扶住花仔，叫佢慢慢坐低，一手拍拍佢膊頭，我深呼吸咗一下，然後望住花仔講 




「兄弟，你聽我講，你攞住支神油先，一陣你可能有用，你頭先話過刀裡刀裡去，火裡火裡去，上刀山都在所不辭，係咪？」 


「係！」花仔流露出堅定不移嘅眼神 


「依家我有事相求，一生幸福喺你手上，你撐唔撐我？」我再問




「撐！！」花仔好肯定咁答 


「好，好兄弟，多謝你，你嘅犧牲係唔會白費㗎！」我上前同花仔嚟一個擁抱，眼角不其然流下一滴眼淚 


轉身開門，關門，花仔完全唔明我講乜，繼續坐咗响梳化，我背向房門，沉默一秒，就同 Heidi 互相交換匙卡，我就對 Heidi 講 




「謝謝你，但是可不可能對他溫柔一點！」 


「嘗試吧，Priscilla 是我好姊妹，你不要傷她的心，知道嗎？」Heidi 已經急不及待咁插入匙卡，臨開門前就講 


「一定！」我就答 


跟住 Heidi 就開門入房，門一關，隨即聽到花仔嘅尖叫聲，然後不斷大嗌 


「文~西，文~西，救我啊，文~西，救我啊…… 」 




悽慘、絕望、無助、以及歡笑聲，此起彼落，我心頭一酸，望住 Heidi 比我張匙卡，房號 214，用力握緊匙卡，再轉身向房門講 


「好兄弟，撑住吖！」之後就衝咗落去。


企响 214 號房門前面，同 Priscilla 只係一門之隔，但心情就十分複雜，自從今朝唔見咗錢包開始，我已認定無乜機會再面，又有邊個估到 Priscillia 竟然比我更勇敢，去到機場都番番轉頭，選擇留多兩日，身為香港仔，緊係要有腰骨，有承擔，係時候做番啲嘢。 


呢刻，心跳快到連自己都聽到，揸住張卡，手心出晒汗，最後我選擇咗撳鐘而無直接入去，我唔想嚇親佢。 


「叮噹 ~」 




我靜靜地等待開門一刻嘅來臨，十秒，二十秒，三十秒 …… ，點解無乜反應嘅？唔通响浴室聽唔到？ 


「叮噹 ~」 


再等咗多陣，依然無人應門，有啲唔對路，再等落去唔係辦法，於是我插入匙卡，一開一睇，除咗行李之外，發現唔到 Priscilla，唔知係咪見 Heidi 咁耐都未番，落咗去搵佢都未定。 


呢間酒店話大唔算好大，但要搵一個人都唔易，如果仲守株待兔，好似無乜誠意，既然係咁，不如出去碰碰運氣，睇下有緣究竟有冇份喇！ 


行到大堂，左望望，右搵搵，都唔見 Priscilla 蹤影，正要落去樓下餐廳之際，忽然聽到有人嗌 




「老細，呢邊啊！」 


喺印度聽到咁流利嘅廣東話，唔係花仔，最大可能就係 Ankit，果然無估錯，一身 Nike 打扮嘅 Ankit，不停向我揮手，睇真啲，喺佢側邊多咗一個人，一個唔知响邊度見過嘅女仔，啊~ 印度西施啊！