Ankit 同西施慢慢咁行過嚟,唔怪之得 Ankit 之前可以拍晒心口啦,實物所見真係好得,高高瘦瘦,有前有後,個樣仲靚到 "揼" 一聲,呢種靚真係好主觀同個人,再襯上一身鮮紅色加金黃色花紋嘅印度服,難怪酒店大堂啲麻甩佬個個都望晒過嚟啦! 


我對 Ankit 同西施點點頭,Ankit 就講 


「老細,見到你就好喇,我想問下你地間房依家係咪多咗個女人?」 


「你上過去呀?」我好緊張咁問 




「係啊,頭先我上房搵你地,點知有個女人開門,我醒啊,咪扮搵錯囉,响條門隙度見到另一位老闆全身赤裸趴咗响地,口震震咁伸手向我求救咁,個女人見我眼定定,跟住就關番度門,我又唔敢再㩒鐘,點知佢會唔會拉埋我入去玩3P㗎,到時咪蝕抵晒,於是乎我唯有坐响度等多陣囉,多口問句,老細佢會唔會有生命危險㗎!?」 


「哈、哈,無事嘅、無事嘅,哈、哈,情趣、情趣嚟㗎!」我開始擔心花仔捱唔到呢關 


「咁依家 ……?」Ankit 咪一咪眼咁向我問 




「…… 係,唔 …… 我估佢暫時都分唔到身,幾多錢?我照比住你先!」我一邊問,一邊攞錢 


「吓!咁荀,既然錢都比咗咯,唔好嘥啦,不如你要咗佢,我擔保服務一流!」Ankit 講完之後就向西施打咗個眼色,企喺一邊嘅佢,忽然一手撟住我,跟住個頭就僕响我膊頭度,攪到我面都紅晒。 


就响呢刻,原本好寧靜嘅大堂,被一把尖叫聲所劃破! 




我即時轉身一睇 


"今次仆街了!"


啱啱果下尖叫聲,竟然係嚟自 Priscilla,唔知幾時開始,Priscilla 已經企咗响樓梯口度, 雖然同我有一段距離,但我睇得好清楚,又圓又大嘅一雙眼,不停流下眼淚,震顫着嘅一雙手遮住口鼻。 


呢一秒嘅畫面,好似時間停頓咁直插我心,唔啱嘅事,唔啱嘅人,响唔啱嘅時間出現,我望住 Priscilla,Priscilla 望住我 …… 同撟住我手嘅西施,比著係妳,妳會點諗!? 


"嘀嗒" 一秒,Priscilla 合埋雙眼,抹一抹眼淚,轉身就沿樓梯衝落下層,我即時撥開西施隻手,起勢咁追,落到樓下,我四圍咁搵,終於比我見到佢,低著頭一路喊,一路走嘅 Priscilla。 




我發力咁追,同 Priscilla 响黑白地板上追逐,情緒有點失控嘅佢走到盡頭,推門而出,我大嗌 


「Priscilla,Priscilla,你聽我說 ……」 


依家嘅佢根本聽唔入耳,Priscilla 一直响池邊上走,忽然一個左轉,走出酒店。 


酒店外面係漆黑一片嘅街路,雖然未至於伸手不見五指,但視野唔太擴闊,仲差少少距離就可以追到 Priscilla,我仍然不停咁嗌,可惜 Priscilla 未有停落嚟。 


突然一架私家車轉入酒店,Priscilla 未有察覺,遲嚟嘅響號聲,嚇到 Priscilla 比唔到任何反應,呆呆咁企咗响度,望住呢個畫面,我連跑帶跳衝向 Priscilla,將佢一抱入懷。 




一聲巨響,我同 Priscilla 一齊被彈飛幾米,我恨恨地躂咗落路旁,全身痛到郁唔到,跟住就聽到不斷有人叫我 


「嗚嗚 …… Da Vinci, 嗚嗚 …… Da Vinci …… 」 


呢刻我覺得好攰、好攰,眼前係漆黑嘅夜空,之後景象變得模糊,我就昏迷過去。